សហរដ្ឋអាមេរិក៖ សិស្សពូកែម្នាក់នៅអាមេរិកឈ្មោះដេននីស ម៉ាលីក បានីស (Dennis Maliq Barnes) ត្រូវសាកលវិទ្យាល័យរាប់រយកន្លែងផ្ដល់អាហារូបករណ៍ដោយសារពិន្ទុរបស់គាត់មានកម្រិតខ្ពស់។ ត្រឹមតែអាយុ១៦ឆ្នាំ, គាត់អាចរៀនផ្លោះថ្នាក់ និងប្រឡងបញ្ចប់ថ្នាក់វិទ្យាល័យដោយជោគជ័យ។ លទ្ធផលប្រឡងសញ្ញាប័ត្រទុតិយភូមិបង្ហាញថាគាត់ទទួលបានពិន្ទុនៅលើរង្វាស់ជីភីអេ ៤,៩៨ (GPA 4.98)។
នៅថ្នាក់វិទ្យាល័យ, គាត់រៀនពូកែពេក ដល់ថ្នាក់អាចរកបាន២៧ក្រេឌីតសម្រាប់សន្សំទុករៀនផ្លោះមុខវិជ្ជា១ចំនួននៅថ្នាក់មហាវិទ្យាល័យ។ ក្រោយពេលប្រឡងជាប់បាក់ឌុបភ្លាម, គាត់គិតតែពីដាក់ពាក្យស្នើសុំអាហារូបករណ៍ទៅសាកលវិទ្យាល័យប្រហែល២រយកន្លែងនៅសហរដ្ឋអាមេរិក។ ជាលទ្ធផល, សាកលវិទ្យាល័យជិត១៩០កន្លែងប្រកាសផ្ដល់អាហារូបករណ៍១០០%សម្រាប់ការសិក្សាដោយឥតគិតថ្លៃ អមដោយការផ្ដល់ប្រាក់បំប៉នសម្រាប់ការស្នាក់នៅ, ថ្លៃអាហារ និងថ្លៃចំណាយដទៃទៀត។
គ្រាន់តែទឹកប្រាក់អាហារូបករណ៍ពីសាកលវិទ្យាល័យចំនួន១៥០មានជាងដប់លានដុល្លារបាត់ទៅហើយ។ ប៉ុន្តែមិនមែនបានសេចក្ដីថាគាត់នឹងទទួលបានទឹកប្រាក់ទាំងអស់នេះទេ។ គាត់អាចទទួលបានពីមហាវិទ្យាល័យណាមួយដែលគាត់សម្រេចជ្រើសរើសចូលរៀន។ ចំនួនប៉ុណ្ណឹងត្រូវគេចាត់ទុកថាជាអាហារូបករណ៍ដែលបំបែកកំណត់ត្រានៅសហរដ្ឋអាមេរិក។
ពិន្ទុរបស់គាត់នៅវិទ្យាល័យអន្តរជាតិទីក្រុងញូអ័រលៀន (New Orleans), រដ្ឋលូស៊ីអាណា (Louisiana) ជាមោទកភាពដ៏ខ្ពង់ខ្ពស់បំផុតសម្រាប់សាលារបស់គាត់។ ពីដំបូងឡើយ, គាត់មិនដែលនឹកស្មានថាចង់បំបែកកំណត់ត្រាអ្វីទេ។ គាត់គ្រាន់តែចង់ដាក់ពាក្យទៅសាកលវិទ្យាល័យឱ្យបានច្រើនតាមដែលអាចធ្វើទៅបាន ដើម្បីជ្រើសរើសគ្រឹះស្ថានឧត្ដមសិក្សាដែលសមតាមបំណងរបស់គាត់។ បន្ទាប់ពីដាក់ពាក្យទៅសាកលវិទ្យាល័យ២រយកន្លែង, ស្រាប់តែសាកលវិទ្យាល័យជិត១៩០កន្លែងទទួលយករូបគាត់។
គាត់មានគម្រោងចូលរៀនបរិញ្ញាបត្រវិទ្យាសាស្ត្រកុំព្យូទ័រ។ ប៉ុន្តែគាត់ក៏ធ្លាប់ធ្វើការជាបុគ្គលិកស្ម័គ្រចិត្តនៅក្លិបមេធាវីនៃរដ្ឋលូស៊ីអាណា (Louisiana)បានមួយរយៈផងដែរ ទីនោះស្ថិតនៅមិនឆ្ងាយប៉ុន្មានទេពីវិទ្យាល័យដែលគាត់ធ្លាប់រៀន។ ដូច្នេះ ក្រៅពីកុំព្យូទ័រ, គាត់ក៏ចង់រៀនច្បាប់ផងដែរ។ យុវជនបានីស ចាប់កំណើត និងធំដឹងក្ដីនៅទីក្រុងញូអ័រលៀន (New Orleans) រដ្ឋលូស៊ីអាណា។
កាលពីមុននេះ, គាត់មិនទាន់ដឹងថាសាកលវិទ្យាល័យដែលត្រូវរៀនមានចម្ងាយប៉ុន្មានពីផ្ទះរបស់គាត់ទេ។ បើពិនិត្យឃើញថាសាកលវិទ្យាល័យណានៅជិតផ្ទះជាងគេ ហើយស្របទៅតាមអ្វីដែលគាត់ចង់បាន គាត់នឹងសម្រេចជ្រើសរើសរៀននៅសាកលវិទ្យាល័យនោះ។ ឥឡូវនេះគាត់កំពុងតែខ្វារក និងកំពុងតែជ្រើមជ្រួលសម្បើមណាស់។ ចិត្ត១ចង់រៀននៅជិតផ្ទះ។ ប៉ុន្តែចិត្ត១ទៀតចង់ហិចហើរអណ្ដែតត្រសែតទៅកាន់ទីកន្លែងឆ្ងាយៗ។ គាត់ថាគាត់ចង់ប្រឡូកខ្លួននៅក្នុងសង្គមថ្មី។
យោងតាមព័ត៌មានបច្ចុប្បន្នភាពចុងក្រោយ, យុវជនដេនីស ម៉ាលីក បានីស បានប្រកាសថាគាត់សម្រេចចិត្តចូលរៀននៅសាកលវិទ្យាល័យខ័រនែល (Cornell) នារដូវស្លឹកឈើជ្រុះ។ មានន័យថាបន្ទាប់ពីគាត់បញ្ចប់ការសិក្សាជាផ្លូវការពីវិទ្យាល័យអន្តរជាតិទីក្រុងញូអ័រលៀននាថ្ងៃទី២៤ ខែឧសភាខាងមុខនេះ៕
ប្រភព៖ Associated Press, CNN, The Guardian
https://edition.cnn.com/2023/04/27/us/louisiana-teen-gets-over-170-college-offers-reaj/index.html
https://apnews.com/article/new-orleans-student-scholarship-offers-a7b8619fc57e677e913447ed325007c1
https://www.theguardian.com/us-news/2023/may/06/dennis-maliq-barnes-scholarship-record-cornell-university
អត្ថបទដទៃទៀតដែលទាក់ទងនឹងវិស័យអប់រំ
មិននឹកស្មានថាសាលាកំពូលៗនៅវៀតណាមតម្លៃសិក្សាខ្ពស់កប់ពពក
និស្សិតម៉ាឡេស៊ីចាក់សាំងដុតខ្លួនឯង បន្ទាប់ពីប្រឡងធ្លាក់ញយដងពេក
ប្រឡងធ្លាក់១៨ដងទម្រាំនិស្សិតច្បាប់ម៉ាឡេស៊ីម្នាក់បញ្ចប់ថ្នាក់បរិញ្ញាបត្រ
ចែករំលែកព័តមាននេះ