សម្រាប់ឪពុកម្ដាយ ឬអាណាព្យាបាល ការចំណាយលុយឱ្យកូនរៀនសូត្រត្រូវគេចាត់ទុកថាជាការវិនិយោគដ៏ល្អបំផុតនៅក្នុងវិស័យអប់រំ និងជាការវិនិយោគរយៈពេលវែងមួយជីវិត (life-long)។ អ្នកខ្លះមិនខ្លាចនឹងចំណាយទៅលើការរៀនសូត្ររបស់កូនទេ ទោះបីតម្លៃសិក្សាប្រចាំឆ្នាំរាងខ្ពស់បន្តិចក៏ដោយ។
នៅវៀតណាម សាលាអន្តរជាតិខ្លះគិតតម្លៃសិក្សាប្រចាំឆ្នាំរហូតដល់រាប់ម៉ឺនដុល្លារឯណោះ។ ឃើញថាមិនចាញ់ប្រទេសអភិវឌ្ឍនៅទ្វីបអឺរ៉ុប និងអាមេរិកប៉ុន្មានទេ។ សព្វថ្ងៃនេះ សាលាអន្តរជាតិដែលថ្លៃជាងគេនៅហាណូយគឺចន្លោះពី១ម៉ឺន ៦ពាន់ដុល្លារសម្រាប់ថ្នាក់មត្តេយ្យ (preschool)ទៅ៣ម៉ឺន ៥ពាន់ដុល្លារសម្រាប់ថ្នាក់មធ្យមសិក្សា។ តម្លៃនេះគិតនៅក្នុងមួយឆ្នាំ។
ដូច្នេះ ឃើញថាទម្រាំកូនរៀនចប់ថ្នាក់វិទ្យាល័យ, គ្រួសារនីមួយៗត្រូវចំណាយលុយច្រើនគួរសមដែរ។ សូម្បីតែអ្នកមានល្មមៗក៏សឹងតែញ៉ាកម្ដងៗ។ ប៉ុន្តែដើម្បីអនាគតកូន, ពួកគេនឹងបន្តចំណាយ។ គេគិតថាឱ្យកូនរៀនសាលាថ្លៃៗ ភាគច្រើនកូនមានអនាគតល្អ។ សាលាទាំងនេះមានអ្នកជំនាញច្បាស់លាស់ខាងវិស័យអប់រំ។ គេមានវិធី និងយុទ្ធសាស្ត្រល្អៗក្នុងការបណ្ដុះបណ្ដាលមនុស្ស, ការអភិវឌ្ឍមនុស្សទាំងរាងកាយ និងសតិបញ្ញា និងការតម្រង់ទិសរបស់សិស្សឱ្យដើរនៅលើមាគ៌ាត្រឹមត្រូវ។
ងាកមកមើលប្រទេសវៀតណាមឯណេះវិញ។ សព្វថ្ងៃនេះនៅទូទាំងទីក្រុងហាណូយមានសាលារៀនអន្តរជាតិចំនួន១៣កន្លែង ដែលគិតថ្លៃសិក្សាក្នុងមួយឆ្នាំៗរាប់ម៉ឺនដុល្លារ។ នៅក្នុងចំណោមនោះ, សាលាអន្តរជាតិយូណាយធីតណេសិននៅហាណូយ និងសាលាអន្តរជាតិអង់គ្លេសនៅហាណូយគិតថ្លៃសិក្សាខ្ពស់ជាងគេ។ តម្លៃសិក្សានៅយូណាយធីតណេសិនសម្រាប់ឆ្នាំសិក្សា២០២៣-២០២៤ មានចាប់ពី១ម៉ឺន ២ពាន់ ៥រយដុល្លារ ទៅ៣ម៉ឺន ៥ពាន់ដុល្លារ អាស្រ័យលើកម្រិតសិក្សា។
ចំណែកសាលាអន្តរជាតិអង់គ្លេសនៅហាណូយមិនទាន់ប្រកាសតម្លៃសិក្សាសម្រាប់ឆ្នាំថ្មីនៅឡើយទេ។ ប៉ុន្តែគេដឹងថាកម្រិតសិក្សាថ្នាក់វិទ្យាល័យសម្រាប់ឆ្នាំ២០២២ត្រូវបង់៣ម៉ឺន ៤ពាន់ដុល្លារក្នុងមួយឆ្នាំ។
សាលាអន្តរជាតិបារាំងគិតលុយធូរថ្លៃជាងគេ ១ឆ្នាំបង់៩ពាន់ដុល្លារសម្រាប់សិស្សដែលមិនមែនជនជាតិបារាំង ឬវៀតណាម។ ចំពោះសិស្សថ្នាក់វិទ្យាល័យដែលជាជនជាតិវៀតណាមបង់៨ពាន់ ២រយដុល្លារក្នុងមួយឆ្នាំ។ សាលាខ្លះមានកម្មវិធីបញ្ចុះតម្លៃពី៣%ទៅ៥%សម្រាប់សិស្សដែលដាក់ពាក្យចូលរៀនមុនកាលកំណត់ ឬសិស្សដែលមានបងប្អូនរៀននៅក្នុងសាលាជាមួយគ្នា៕
ប្រភព៖ Vietnam Express
ចែករំលែកព័តមាននេះ