ខេត្តស្វាយរៀង ៖ ក្នុងសភាពស្គមស្លេកស្លាំងដៃជើងញ័រទទ្រើតដោយសារជំងឺនិងវ័យចាស់ជរា លោកយាយតូច សុន អាយុ៧៦ឆ្នាំ អង្គុយនៅក្នុងកូនខ្ទមដ៏ទ្រុឌទ្រោម ប្រុងតែនឹងបាក់របស់គាត់ បានលើកម្រាមដៃដប់ប្រណមទាំងទឹកភ្នែករលីងរលោងស្វែងរកសប្បុរសជនដែលមានចិត្តមេត្តាជួយសង្គ្រោះជីវិតដ៏លំបាកវេទនារបស់គាត់ដែលរស់នៅឯកោគ្មានកូនចៅចិញ្ចឹមមើលថែ ហើយមានជំងឺរ៉ាំរ៉ៃប្រចាំកាយទៀតផង ។ លោកយាយតូច សុន កំពុងរស់នៅក្នុងកូនខ្ទមធ្វើពីស្លឹកត្នោត និងឫស្សីរបស់គាត់នៅក្នុងភូមិថ្នា ឃុំគោកព្រីង ស្រុកស្វាយជ្រំ ក្នុងជីវភាពក្រីក្រ តោកយ៉ាក គឺរស់ដោយសារគេឱ្យគាត់ម្នាក់បន្តិចៗ បើគេភ្លេចឱ្យគឺអត់អ្វីហូបតែម្តង ព្រោះលោកយាយមានជំងឺក្នុងខ្លួន៣ឆ្នាំមកហើយមិនអាចចេញទៅរកអ្វីបានដោយខ្លួនឯងនោះទេ ។
ជួបជាមួយភ្នាក់ងារកោះសន្តិភាព លោកយាយបានរៀបរាប់អំពីខ្សែជីវិតដ៏កម្សត់របស់គាត់ទាំងសំឡេងខ្សាវៗមាត់ញ័រទទ្រើត និងទឹកភ្នែករលីងរលោងថា ឪពុកម្តាយបងប្អូនសាច់ញាតិរបស់លោកយាយត្រូវពួកប៉ុល ពត សម្លាប់អស់ទៅហើយនៅសល់តែលោកយាយម្នាក់ប៉ុណ្ណោះ ។ ក្រោយសម័យប៉ុល ពត លោកយាយមានប្តីឈ្មោះអ៊ំ រស់នៅជាមួយគ្នាក្នុងភូមិក្តុម្ពី ឃុំគោកព្រីង តែគ្មានកូនចៅទេហើយមកដល់ឆ្នាំ១៩៩៦ ប្តីលោកយាយបានធ្លាក់ខ្លួនឈឺជាទម្ងន់ ធ្វើឱ្យលោកយាយត្រូវលក់ស្រែនិងទ្រព្យរបស់ទាំងអស់ដែលមានដើម្បីព្យាបាលប្តីប៉ុន្តែនៅតែមិនជា ហើយស្លាប់នៅចុងឆ្នាំនោះ ។ ក្រោយពីប្តីស្លាប់ទៅក្នុងវ័យជាង៦០ឆ្នាំ ដែលក្នុងខ្លួនគ្មានអ្វីសោះ លោកយាយបានត្រឡប់មកភូមិកំណើតវិញ ហើយសុំដីអ្នកស្រុកសង់កូនខ្ទមមួយនៅជាប់ផ្ទះម្ចាស់ដីរស់នៅដោយប្រកបរបរស៊ីឈ្នួលដកស្ទូង និងច្រូតស្រូវឱ្យគេដើម្បីចិញ្ចឹមជីវិត ។
លោកយាយតូច សុន ចាប់ផ្តើមរស់នៅក្នុងជីវិតឯកោនេះរហូតបានរយៈពេល១០ឆ្នាំ ក៏ត្រូវម្ចាស់ដីលែងឱ្យនៅ ព្រោះគេសង់ផ្ទះថ្មី ។ លោកយាយបន្តទៀតថា ដោយគ្មានលទ្ធភាពសង់ខ្ទមថ្មីនៅ លោកយាយក៏ទៅសុំលោកយាយម្នាក់ទៀតឈ្មោះសុខ សាប់ មានវ័យស្របាលគ្នានិងនៅក្នុងភូមិជាមួយគ្នានៅជាមួយ ហើយលោកយាយសុខ សាប់ ក៏រស់នៅតែម្នាក់ឯងដែរ តែមានកូនប្រុសម្នាក់ធ្វើការនៅភ្នំពេញជួយចិញ្ចឹម ។ លោកយាយទាំងពីរនាក់រស់នៅជាមួយគ្នាមើលថែគ្នាទៅវិញទៅមកបាន២ឆ្នាំ ស្រាប់តែកូនប្រុសលោកយាយសុខ សាប់ ឈប់ធ្វើការនៅភ្នំពេញហើយត្រឡប់មកនៅជាមួយម្តាយវិញ ធ្វើឱ្យលោកយាយត្រូវរកកន្លែងថ្មីទៀតដើម្បីរស់នៅ ។ ប៉ុន្តែដោយគ្មានប្រាក់នៅក្នុងខ្លួន រីឯវ័យក៏ជរាណាស់ទៅហើយ លោកយាយមិនអាចរកទីជម្រកបានដោយខ្លួនឯងទេ ទើបលោកមេភូមិធ្វើការប្រកាសតាមមីក្រូអំពាវនាវឱ្យអ្នកស្រុកជួយឧបត្ថម្ភបន្តិចម្នាក់ៗបានប្រាក់មកទិញស្លឹកត្នោត និងឫស្សីសង់បានកូនខ្ទមមួយលើដីសហគមន៍ដែលជាដីសម្រាប់ឱ្យជនក្រីក្រគ្មានដីសង់ផ្ទះស្នាក់នៅជាបណ្តោះអាសន្ន ។
លោកចាន់ សារ៉ាន់ មេភូមិថ្នា បាននិយាយថា ក្រោយពីរស់នៅក្នុងខ្ទមថ្មីនេះបានរយៈពេល២ខែ លោកយាយក៏ធ្លាក់ខ្លួនឈឺហើមដៃនិងទ្រូងប៉ុនកូនបាល់ធ្វើឱ្យលោកយាយនិយាយមិនកើតដើរមិនរួចកំរើកមិនបាន គឺបានត្រឹមតែដេកបង្ហូរទឹកភ្នែកស្រណោះខ្លួនឯងនៅលើកន្ទេល ប៉ុណ្ណោះ។ ដោយឃើញបែបនេះ រូបលោកក៏ដាក់មីក្រូប្រកាសសាជាថ្មីទៀតរៃអង្គាសពីប្រជាពលរដ្ឋក្នុងភូមិម្នាក់បន្តិចៗទៅតាមលទ្ធភាពយកមកសង្គ្រោះលោកយាយដែលមានជំងឺ ។ លោកមេភូមិបានបញ្ជាក់ថា ប្រជាពលរដ្ឋក្នុងភូមិថ្នា ភាគច្រើនជាអ្នកក្រីក្រ ប៉ុន្តែចិត្តមិនក្រទេ គឺចេះជួយគ្នាណាស់ គ្រាន់តែសំឡេងមីក្រូប្រកាសឡើងប្រមាណជាកន្លះម៉ោងប៉ុណ្ណោះប្រជាពលរដ្ឋក៏មកដល់ពេញទាំងក្នុងនិងក្រៅផ្ទះជុំវិញខ្ទមលោកយាយ ខ្លះឱ្យអង្ករ ខ្លះឱ្យទឹកត្រី អំបិល និងខ្លះឱ្យប្រាក់ទៅតាមលទ្ធភាពរបស់ខ្លួន ហើយគ្រូខ្មែរបុរាណក៏ត្រូវបានអញ្ជើញមកមើលជំងឺភ្លាមដែរ។
លោកមុំ សាត អនុប្រធានភូមិថ្នា បានឱ្យដឹងថា ចាប់តាំងពីថ្ងៃដំបូងដែលលោកយាយតូច សុន ឈឺមក រូបគាត់និងចៅបានមកចងមុងដេកយាមនៅខាងមុខខ្ទមលោកយាយជារៀងរាល់យប់ ព្រោះខ្លាចលោកយាយមិនស្រួលខ្លួនឬធ្វើទុក្ខពេលយប់ ហើយព្រឹកឡើងមុនទៅផ្ទះវិញរូបគាត់តែងតែរែកទឹកពីផ្ទះអ្នកស្រុក២-៣អម្រែកទុកឱ្យជារៀងរាល់ព្រឹក ។ រីឯអ្នកស្រុកដទៃទៀតក៏បានមកអើតមើលនិងយកអាហារមកឱ្យ បន្តបន្ទាប់គ្នា ហាក់ដូចជាវេនអ្នកណាមកមុនជួយងូតទឹកឱ្យអ្នកណាមកក្រោយជួយបញ្ចុកអាហារ និងនិយាយលួងលោមឱ្យកម្លាំងចិត្ត ដែលសកម្មភាពទាំងនេះអ្នកភូមិបានបន្តធ្វើរហូតជិត១ខែទាល់តែលោកយាយអាចដើរងូតទឹក និងហូបអាហារបានដោយខ្លួនឯង ។ក្រោយពីលោកយាយបានធូរស្រាលពីជំងឺបន្តិច ប្រជាពលរដ្ឋទាំងនោះក៏មិនសូវបានទៅអើតមើលលោកយាយញឹកញាប់ទៀតដែរ ឯចំណីអាហារក៏មិនសូវមានហូបគ្រប់គ្រាន់ ជួនបានឆ្អែតជួនក៏មិនឆ្អែត ហើយរូបភាពបែបនេះបានបន្តរហូតមកដល់សព្វថ្ងៃនេះ គឺរយៈពេល៣ឆ្នាំមកហើយ ។ ចំណែកជំងឺលោកយាយក៏នៅបន្តធ្វើទុក្ខរុកកួនរាងកាយលោកយាយ៣ឆ្នាំហើយដែរ ដោយម្តងចុកពោះ ម្តងហើមក្រលៀន ម្តងចុកទ្រូង ម្តងឈឺសន្លាក់ដៃជើង ប៉ុន្តែលោកយាយមិនដែលធ្លាប់ទៅពេទ្យឱ្យគ្រូពេទ្យពិនិត្យព្យាបាលម្តងណាទេ ៣ឆ្នាំមកនេះ ព្រោះគ្មានប្រាក់បានត្រឹមតែដេកចាំតាមយថាកម្មថ្ងៃណាគឺថ្ងៃនោះទៅ ។
លោកមេភូមិក៏ដូចជាអនុប្រធានភូមិ និងប្រជាពលរដ្ឋក្នុងភូមិថ្នា ឃុំគោកព្រីងទាំងអស់សូមអំពាវនាវដល់សប្បុរសជនទាំងអស់មេត្តាជួយសង្គ្រោះជីវិតលោកយាយទុរគតម្នាក់នេះផង ព្រោះពេលនេះលោកយាយកំពុងត្រូវការថ្នាំសង្កូវ និងការព្យាបាលដ៏ត្រឹមត្រូវពីគ្រូពេទ្យ ជាពិសេសគឺអាហារបរិភោគតែលោកយាយគ្មានលទ្ធភាពអាចរកបានទេ ៕
ចែករំលែកព័តមាននេះ