ហ៊ានមែន! ទម្លុះទម្លាយទ្វារកញ្ចក់បន្ទប់រោងចក្រ រួចគាស់ទូដែកយកអស់រាប់ម៉ឺនដុល្លារ
- តាកែវ
មានជនសង្ស័យមួយក្រុមមានគ្នាចំនួន៤នាក់បានពាក់ម៉ាស់ និងពាក់ស្រោមដៃ ចូលទៅគាស់ទម្លុះទម្លាយទ្វារកញ្ចក់បន្ទប់ទី៣ ផ្នែកគណនេយ្យ
មានជនសង្ស័យមួយក្រុមមានគ្នាចំនួន៤នាក់បានពាក់ម៉ាស់ និងពាក់ស្រោមដៃ ចូលទៅគាស់ទម្លុះទម្លាយទ្វារកញ្ចក់បន្ទប់ទី៣ ផ្នែកគណនេយ្យ
ខេត្តតាកែវ ៖ បើតាមសេចក្តីរាយការណ៍បានឱ្យដឹងថា មានជនសង្ស័យមួយក្រុមមានគ្នាចំនួន៤នាក់បានពាក់ម៉ាស់ និងពាក់ស្រោមដៃ ចូលទៅគាស់ទម្លុះទម្លាយទ្វារកញ្ចក់បន្ទប់ទី៣ ផ្នែកគណនេយ្យ បន្ទាប់មកក្រុមចោរនោះក៏បន្តចូលទៅក្នុងបន្ទប់ រួចធ្វើសកម្មភាពគាស់ទូដែកចំនួន៥ទៀត យកលុយអស់រាប់ម៉ឺនដុល្លារ បង្កឱ្យមានការភ្ញាក់ផ្អើលកាលពីវេលាម៉ោង២និង៥០នាទីរំលងអធ្រាត្រ កាលពីនៅថ្ងៃទី១៦ ខែឧសភា ឆ្នាំ២០២៣ នៅចំណុច រោងចក្រ «ប្រាយផាសស៊ីងឯក» ហៅរោងចក្រលាយបូរ ស្ថិតក្នុងភូមិធ្នង់រលើង ឃុំលាយបូរ។
បើតាមលោកវរសេនីយ៍ឯក ឌិក ធីយ៉ា អធិការនគរបាលស្រុកត្រាំកក់ បានប្រាប់ឱ្យដឹងថា ពិតជាមានករណីលួចគាស់ទម្លុះទម្លាយគាស់ទូដែកក្នុងរោងចក្រ «ប្រាយផាកស៊ីងឯក» ហៅរោងចក្រលាយបូរ កាលពីនៅថ្ងៃទី១៦ ខែឧសភា ឆ្នាំ២០២៣ វេលាម៉ោង២និង៥០នាទីរំលងអធ្រាត្រចំណុចក្នុងបន្ទប់លេខ៣ ផ្នែកគណនេយ្យរោងចក្រ «ប្រាយផាសស៊ីងឯក» ស្ថិតក្នុងភូមិធ្នង់រលើង ឃុំលាយបូរ ពិតមែន។
លោកអធិការនគរបាលស្រុកត្រាំកក់ បានបន្តថា ករណីលួចគាស់ទម្លុះទម្លាយទូដែកខាងលើនេះ បង្កឡើងដោយជនសង្ស័យមិនស្គាល់អត្តសញ្ញាណមួយក្រុម ដែលមានគ្នាចំនួន៤នាក់ពាក់ម៉ាស់ និងពាក់ស្រោមដៃ ធ្វើសកម្មភាពចូលគាស់ទ្វារកញ្ចក់បន្ទប់ទី៣ ផ្នែកគណនេយ្យរោងចក្រ «ប្រាយផាសស៊ីងឯក» ឬហៅថា រោងចក្រលាយបូរ។ បន្ទាប់មកក្រុមចោរទាំងនោះ ក៏បន្តចូលទៅក្នុងបន្ទប់ ហើយធ្វើសកម្មភាពគាស់ទូដែកចំនួន៥ទៀត (ក្នុងនោះទូធំចំនួន៤ និងទូតូច១)។
លោកអធិការនគរបាលស្រុក បន្តទៀតថា ចំពោះទ្រព្យសម្បត្តិដែលត្រូវក្រុមចោរយកបាននោះ រួមមាន ៖ ប្រាក់ដុល្លារចំនួន៣៥,៣១០ដុល្លារ, ប្រាក់រៀលចំនួន៤៨លាន៦៩ម៉ឺនរៀល និងគាស់កម្ទេចទូដែកខូចខាតស្ទើរទាំងស្រុងអស់ចំនួន៥ទូតែម្តង។ ហើយនៅពេលធ្វើសកម្មភាពរួច ក្រុមជនសង្ស័យទាំងនោះក៏បាននាំគ្នារត់គេចខ្លួនបាត់ស្រមោល។
ក្រោយពីទទួលបានព័ត៌មាន និងពាក្យបណ្ដឹងរបស់ឈ្មោះ វ៉ាត ពុទ្ធថា ភេទប្រុស អាយុ៤២ឆ្នាំ រស់នៅភូមិធ្នង់រលើង ឃុំលាយបូរ ស្រុកត្រាំកក់ ដែលជាតំណាងឲ្យម្ចាស់រោងចក្រភ្លាម សមត្ថកិច្ចក៏បានចុះទៅដល់កន្លែងកើតហេតុ ធ្វើការស្រាវជ្រាវ និងស៊ើបអង្កេតជាបន្តបន្ទាប់។ ជាលទ្ធផលនៃការស្រាវជ្រាវស៊ើបអង្កេត និងមានបទបញ្ជាពីលោកឧត្តមសេនីយ៍ទោ ស្នងការ ព្រមទាំងដឹកនាំសម្របសម្រួលដោយលោកព្រះរាជអាជ្ញា នៅថ្ងៃទី១៦ ខែឧសភា ឆ្នាំ២០២៣ វេលាម៉ោង១៦ល្ងាច សមត្ថកិច្ចក៏ឃាត់ខ្លួនជនសង្ស័យម្នាក់មានឈ្មោះ ដុំ ប្រុស ភេទប្រុស អាយុ២៤ឆ្នាំ រស់នៅភូមិដកវ៉ាន ឃុំឧត្តមសុរិយា ស្រុកត្រាំកក់ ខេត្តតាកែវ មុខរបរជាសន្តិសុខរោងចក្រ។
លោកឧត្តមសេនីយ៍ ហ៊ឹន សុខេន ស្នងការរងទទួលផែនយុត្តិធម៌ នៃស្នងការដ្ឋាននគរបាលខេត្ត បានឱ្យដឹងនៅថ្ងៃទី១៩ ខែឧសភា ឆ្នាំ២០២៣នេះថា នៅយប់ថ្ងៃកើតហេតុនោះ ជនសង្ស័យយាមនៅខាងក្រោយ ហើយរោងចក្រកំណត់ឱ្យសន្តិសុខដែលយាមនោះមកស្កេនមេដៃ១ម៉ោងម្តង។ ប៉ុន្តែដល់ម៉ោង៤ ជនសង្ស័យត្រូវឡើងមកស្កេកមេដៃម្តងទៀត តែមិនឃើញជនសង្ស័យមកនោះទេ លុះពេលអោយមនុស្សមកមើល ក៏មិនឃើញជនសង្ស័យនៅកន្លែងទៀត អញ្ចឹងហើយទើបសមត្ថកិច្ច ក៏ដូចជាលោកព្រះរាជអាជ្ញាអមសាលាដំបូងខេត្ត ដាក់ការសង្ស័យទៅលើជនសង្ស័យ បើទោះបីជាជនសង្ស័យមិនព្រមសារភាពក៏ដោយ។
ហើយនៅថ្ងៃទី១៩ ខែឧសភា ឆ្នាំ២០២៣នេះ កម្លាំងជំនាញការិយាល័យព្រហ្មទណ្ឌកំរិតស្រាល ក៏បានកសាងសំណុំរឿនបញ្ជូនជនសង្ស័យខាងលើនេះ ទៅកាន់សាលាដំបូងហើយដែរ ចំណែកជនសង្ស័យ៣នាក់ទៀត ដែលកំពុងរត់គេចខ្លួននោះ កម្លាំងជំនាញនឹងបន្តតាមស្រាវជ្រាវ ហើយចាប់ខ្លួនអោយទាល់តែបាន។
ចែករំលែកព័តមាននេះ