រាជធានីភ្នំពេញ ៖ ប្រជាប្រិយភាពលុយរៀលដែលជារូបិយវត្ថុជាតិកម្ពុជានៅក្នុងប្រទេសដុល្លារនីយកម្មកំពុងតែមានប្រជាប្រិយភាព ប៉ុន្តែទោះបីជាយ៉ាងណាក៏ដោយមកដល់ពេលនេះពលរដ្ឋកម្ពុជាដែលជាម្ចាស់លុយរៀល នៅតែត្រូវកាន់ដុល្លារទៅចាយនៅស្រុកគេ សូម្បីតែនៅក្នុងអាស៊ានក៏ដោយ ។ មកដល់ពេលនេះ ពលរដ្ឋប្រជាជាតិអាស៊ាននានាលើកតែកម្ពុជា ឡាវ…
រាជធានីភ្នំពេញ ៖ ប្រជាប្រិយភាពលុយរៀលដែលជារូបិយវត្ថុជាតិកម្ពុជានៅក្នុងប្រទេសដុល្លារនីយកម្មកំពុងតែមានប្រជាប្រិយភាព ប៉ុន្តែទោះបីជាយ៉ាងណាក៏ដោយមកដល់ពេលនេះពលរដ្ឋកម្ពុជាដែលជាម្ចាស់លុយរៀល នៅតែត្រូវកាន់ដុល្លារទៅចាយនៅស្រុកគេ សូម្បីតែនៅក្នុងអាស៊ានក៏ដោយ ។
មកដល់ពេលនេះ ពលរដ្ឋប្រជាជាតិអាស៊ាននានាលើកតែកម្ពុជា ឡាវ និងមីយ៉ាន់ម៉ា គេអាចកាន់រូបិយវត្ថុជាតិរបស់គេទៅប្រទេសណានៅក្នុងតំបន់ក៏បាន ដោយនៅទីនោះគេអាចកាន់ទៅប្តូរនៅតាមបញ្ជរដូរលុយនៅតាមព្រលានយន្តហោះ ឬហាងទំនើបនានានៅក្នុងតំបន់លើកលែងតែបីប្រជាជាតិនេះ ។ ដូច្នេះយើងសង្ឃឹមថា ធនាគារជាតិនៃកម្ពុជាដែលជាអាណាព្យាបាលនៃលុយរៀលរបស់ជាតិនឹងអាចជំរុញដំណើរការនេះឲ្យទៅមុខ ដើម្បីលើកកម្ពស់កិត្យានុភាពជាតិ ។
យើងដឹងថា ធនាគារជាតិនៃកម្ពុជាបានខិតខំច្រើននៅក្នុងការពង្រឹងលុយរៀល តាមរយៈការធ្វើយុទ្ធនាការផ្សេងៗ ដោយរួមទាំងសកម្មភាពនៃការសម្រេចចិត្តចេញគោលការណ៍នៅក្នុងការប្រមូលលុយដុល្លារសន្លឹកតូចៗ ចាប់ពី១ដុល្លារ ដល់១០ដុល្លារពីទីផ្សារនានា ហើយព្យាយាម និងលើកទឹកចិត្តបញ្ចេញលុយរៀលដែលមានតម្លៃប្រហាក់ប្រហែលជំនួស ។
យុទ្ធនាការដាក់ចេញឲ្យធនាគារនានាបញ្ឈប់ការដកប្រាក់ជាដុល្លារសន្លឹកក្រោម១០០ដុល្លារតាមអេធីអឹមជាដើម ។ ក្រៅពីនោះក៏បានខិតខំធ្វើកម្មវិធីលើកកម្ពស់លុយរៀលជាច្រើនទៀត ហើយឆ្លងតាមការខិតខំនេះមួយរយៈពេលកន្លងមកឃើញថា ពលរដ្ឋទូទៅចាប់ផ្តើមប្រើប្រាស់លុយរៀលកាន់តែច្រើនហើយទំនុកចិត្តនៅលើលុយរៀលក៏កាន់តែកើនឡើង ។ ប៉ុន្តែទោះបីជាយ៉ាងណា ពេលចេញក្រៅប្រទេសពលរដ្ឋនៅតែត្រូវទៅប្តូរជាប្រាក់ដុល្លារដដែល ដោយសារតែប្រទេសនានាមិនទទួលស្គាល់លុយរៀលយើងនៅឡើយ ។
ការទទួលស្គាល់ និងដំណើរការទូទាត់ជាលុយរៀលនៅក្រៅប្រទេស គឺអាចមានខ្លះ ប៉ុន្តែគឺបានតែនៅតាមតំបន់ព្រំដែននៃប្រទេសជិតខាងប៉ុណ្ណោះ ប៉ុន្តែសកម្មភាព គឺមិនសូវច្រើននោះទេ ។ ពលរដ្ឋអាចចាយវា.យនៅត្រឹមកម្រិតយោគយល់មនោសញ្ចេតនា និងបណ្តាញទូទាត់ដែលស្គាល់គ្នាប៉ុណ្ណោះ ។
ពាក់ព័ន្ធនឹងបញ្ហាទូទាត់ឆ្លងព្រំដែននេះ ដើម្បីជំរុញការតភ្ជាប់ការទូទាត់ក្នុងតំបន់ដោយប្រើប្រាស់ឱកាសថ្មីៗ ដែលនាំមកដោយការច្នៃប្រឌិត និងដើម្បីជួយសម្រួលដល់ការទូទាត់ឆ្លងកាត់ព្រំដែនប្រកបដោយភាពរលូន និងសុវត្ថិភាពថ្មីៗនេះមេដឹកនាំអាស៊ានបានលើកទឹកចិត្តដល់ការប្រើប្រាស់រូបិយប័ណ្ណក្នុងស្រុករបស់ប្រទេសនីមួយៗសម្រាប់ប្រតិបត្តិការឆ្លងដែនក្នុងតំបន់ និងគាំទ្រដល់ការបង្កើតក្រុមការងារ ដើម្បីស្វែងយល់ពីការអភិវឌ្ឍក្របខ័ណ្ឌប្រតិបត្តិការរូបិយប័ណ្ណក្នុងស្រុករបស់អាស៊ាន ។
នៅក្នុងកិច្ចប្រជុំកំពូលនៅឥណ្ឌូនេស៊ី កាលពីអំឡុងថ្ងៃ១០ និង១១ ខែឧសភា កន្លងទៅនេះមេដឹកនាំអាស៊ានបានគាំទ្រកិច្ចសហប្រតិបត្តិការបន្ថែមទៀតលើការជំរុញការតភ្ជាប់ការទូទាត់ក្នុងតំបន់ និងការសម្របសម្រួលអន្តរប្រតិបត្តិការនៃប្រព័ន្ធទូទាត់ឆ្លងប្រទេសការកែលម្អហេដ្ឋារចនាសម្ព័ន្ធ ការពន្លឿនការអនុម័តការទូទាត់តាមប្រព័ន្ធឌីជីថល ការធ្វើឱ្យស៊ីជម្រៅនូវការដាក់បញ្ចូលហិរញ្ញវត្ថុ ការអភិវឌ្ឍធនធានមនុស្ស ការពង្រឹងសន្តិសុខ តាមអ៊ីនធឺណិត និងផ្សេងៗទៀត ។
ក្រៅពីនោះ មេដឹកនាំអាស៊ានក៏បានគាំទ្រកិច្ចសហប្រតិបត្តិការបន្ថែមទៀតលើការលើកកម្ពស់ប្រតិបត្តិការរូបិយប័ណ្ណក្នុងស្រុក និងតួនាទីរបស់អាជ្ញាធរផ្នែកហិរញ្ញវត្ថុ ដើម្បីកាត់បន្ថយភាពងាយរងគ្រោះក្នុងតំបន់ចំពោះការប្រែប្រួលខាងក្រៅ ។ លើកកម្ពស់ការបង្កើតការរកឃើញតម្លៃប្រកបដោយប្រសិទ្ធភាព ពិចារណាលើការផ្តល់ភាពបត់បែននៃការគ្រប់គ្រងការប្តូរប្រាក់បរទេសធ្វើអោយប្រសើរឡើងនូវហេដ្ឋារចនាសម្ព័ន្ធទីផ្សារហិរញ្ញវត្ថុ និងកាត់បន្ថយថ្លៃដើមប្រតិបត្តិការឆ្លងដែន ។
មេដឹកនាំអាស៊ានក៏បានស្វាគមន៍ចំពោះគំនិតផ្តួចផ្តើមក្នុងការស្វែងរកការភ្ជាប់គំនិតផ្តួចផ្តើមក្របខ័ណ្ឌប្រតិបត្តិការរូបិយប័ណ្ណក្នុងស្រុករបស់អាស៊ាន ជាមួយនឹងគំនិតផ្តួចផ្តើមការទូទាត់ឆ្លងព្រំដែន រួមទាំងការតភ្ជាប់ការទូទាត់ក្នុងតំបន់ ។ ហើយក៏លើកទឹកចិត្តឲ្យមានការចូលរួម និងសហការជាមួយដៃគូខាងក្រៅរបស់អាស៊ានអង្គការអន្តរជាតិ និងវិស័យឯកជន ដើម្បីបង្កើតកិច្ចសហប្រតិបត្តិការ និងភាពជាដៃគូក្នុងការជំរុញការតភ្ជាប់ការទូទាត់ក្នុងតំបន់ និងការលើកកម្ពស់ប្រតិបត្តិការរូបិយប័ណ្ណក្នុងស្រុក ។
ពាក់ព័ន្ធនឹងបញ្ហានេះ មេដឹកនាំអាស៊ានបានប្រគល់ភារកិច្ចឱ្យរដ្ឋមន្ត្រីហិរញ្ញវត្ថុអាស៊ាន និងអភិបាលធនាគារកណ្តាលរបស់តំបន់ ដើម្បីត្រួតពិនិត្យការអនុវត្ត និងវឌ្ឍនភាពនៃការតភ្ជាប់ការទូទាត់ក្នុងតំបន់ និងស្វែងយល់ពីការអភិវឌ្ឍ ក្របខ័ណ្ឌ ប្រតិបត្តិការរូបិយប័ណ្ណ ក្នុងតំបន់អាស៊ាន ដោយមានជំនួយ និងការសម្របសម្រួលយ៉ាងជិតស្និទ្ធក្នុងចំណោមស្ថាប័នពាក់ព័ន្ធនានា ។
ផ្អែកតាមអ្វីដែលមេដឹកនាំអាស៊ានបានអនុម័តនេះយើងគិតថា ស្ថាប័នជំនាញជាពិសេស គឺក្រសួងសេដ្ឋកិច្ច និងហិរញ្ញវត្ថុ ហើយធនាគារជាតិនៃកម្ពុជានឹងយកចិត្តទុកដាក់ ដើម្បីធ្វើយ៉ាងណាយកលុយរៀលយើងចូលទៅក្នុងប្រព័ន្ធទូទាត់នៅក្នុងប្លុកនេះឲ្យបានឆាប់ៗពីព្រោះនៅពេលនេះកម្ពុជាសឹងតែស្មើមុខស្មើមាត់គ្រប់វិស័យហើយទាំងនយោបាយ ការទូតកីឡា ប៉ុន្តែសេដ្ឋកិច្ចយើងនៅខ្សោយជាងគេបន្តិច ៕ ដោយៈ ហេង ចេស្តារ
ចែករំលែកព័តមាននេះ