រាជធានីភ្នំពេញ ៖ ទោះបីជាកម្ពុជាបានជ្រុះធ្លាក់ពីលំដាប់កំពូលតារាងមេដាយនៃព្រឹត្តិការណ៍ស៊ីហ្គេមនៅពាក់កណ្តាលទីក៏ពិតមែន ប៉ុន្តែអត្តពលិកកម្ពុជាក៏បានចូលរួមបំបែកកំណត់ត្រាមិនដែលមានសម្រាប់កម្ពុជា ដោយបញ្ចប់នៅត្រឹមលំដាប់ទី៤ ជាមួយនឹងមេដាយសរុបប្រមាណជាជាង២៦០ មេដាយ ។ មកដល់ត្រឹមម៉ោង ៥៖២០…
រាជធានីភ្នំពេញ ៖ ទោះបីជាកម្ពុជាបានជ្រុះធ្លាក់ពីលំដាប់កំពូលតារាងមេដាយនៃព្រឹត្តិការណ៍ស៊ីហ្គេមនៅពាក់កណ្តាលទីក៏ពិតមែន ប៉ុន្តែអត្តពលិកកម្ពុជាក៏បានចូលរួមបំបែកកំណត់ត្រាមិនដែលមានសម្រាប់កម្ពុជា ដោយបញ្ចប់នៅត្រឹមលំដាប់ទី៤ ជាមួយនឹងមេដាយសរុបប្រមាណជាជាង២៦០ មេដាយ ។
មកដល់ត្រឹមម៉ោង ៥៖២០ នាទីរសៀល ថ្ងៃទី១៦ ខែឧសភា ឆ្នាំ២០២៣ ដែលជាថ្ងៃប្រកួតចុងក្រោយនៃព្រឹត្តិការណ៍ស៊ីហ្គេម កម្ពុជាមានមេដាយសរុប២៦២ នៅក្នុងដៃ ដោយនៅក្នុងនោះមានមេដាយមាស៧៣ ប្រាក់៦៩ និងសំរឹទ្ធ១២០មេដាយ នៅពីក្រោយឥណ្ឌូនេស៊ី ដែលមានមេដាយសរុបត្រឹមតែ ២៥៦ មេដាយ ក្នុងនោះដណ្តើមមេដាយមាសច្រើនជាងកម្ពុជា គឺ៨០ មេដាយ ប្រាក់៧៦ និងសំរិទ្ធ ១០០ ដូច្នេះហើយទើបឥណ្ឌូនេស៊ីត្រូវបានចាត់ថ្នាក់ថាលំដាប់ទី៣ ។ ថៃនៅលំដាប់ទី២ ដែលមានមេដាយសរុប២៨៤ មេដាយ ដោយមាសមាន១០២ មេដាយ ប្រាក់៨២ មេដាយ និងសំរិទ្ធ១០០ មេដាយ ហើយវៀតណាមនៅលំដាប់លេខ១ ជាមួយនឹងមេដាយសរុបដល់ទៅ៣៤២ មេដាយ គឺមេដាយមាស មាន១៣១ មេដាយ ប្រាក់១០៣ និង សំរិទ្ធ១០៨ មេដាយ ។
ដោយសារនៅក្នុងឆ្នាំនេះ អត្តពលិកកម្ពុជានៅលើវិញ្ញាសាហែលទឹក និងអត្តពលកម្មក៏ដូចជា បាល់បោះ គ្រីឃីត វាយសី ជាដើម ដែលកន្លងមកអត្តពលិកមិនដែលបានមេដាយសោះនោះ គឺយើងសុទ្ធតែអាចដណ្តើមមេដាយមាសបាន ប៉ុន្តែសម្រាប់កីឡាប៉េតង់ ដែលជាប្រភេទកីឡា ដែលយើងសង្ឃឹមថនឹងអាចដណ្តើមមេដាយមាសបានច្រើននោះបែរជានៅក្នុងពេលយើងធ្វើជាម្ចាស់ផ្ទះ គឺយើងធ្វើមិនបានល្អ ឡើយ ជាហេតុនាំឲ្យយើងបាត់ឱកាសនាំមុខឥណ្ឌូនេស៊ី និង ថៃ ប៉ុន្តែទោះបីជាយ៉ាងណាក៏ដោយក៏កំណត់ត្រាដែលអត្តពលិកកម្ពុជាធ្វើបានកន្លងមក គឺជាកំណត់ត្រាមេដាយថ្មីរបស់កម្ពុជា ។
សម្តេចតេជោ ហ៊ុន សែន នាយករដ្ឋមន្ត្រីកម្ពុជា កាលពីថ្ងៃទី១៥ ខែ ឧសភា ឆ្នាំ២០២៣ ថ្មីៗនេះបានមានប្រសាសន៍សំដែងការកោតសរសើរចំពោះវីរភាពរបស់អត្តពលិកកម្ពុជា ហើយបានប្រកាសថា អត្តពលិកកម្ពុជាបានបំបែកកំណត់ត្រានៃមេដាយមិនដែលមានពីមុន ។
សម្តេចតេជោ ហ៊ុន សែន បានមានប្រសាសន៍ថា នៅរាល់ព្រឹត្តិការណ៍ស៊ីហ្គេមកន្លងមក កម្ពុជា គឺតែងតែនៅបាតតារាងមេដាយ ពោល គឺលើតែប្រុយណេមួយទេ ហើយធ្វើបានល្អបំផុតនៅលំដាប់ទី៨ ប៉ុន្តែនៅឆ្នាំនេះ នៅពេលដែលព្រឹត្តិការណ៍ស៊ីហ្គេមនឹងបញ្ចប់ឆាប់ៗកម្ពុជាអាច ឈរនៅក្នុងទីតាំងត្រឹមលេខ៤ នៅក្នុងតារាងមេដាយ ។នាឱកាសនោះ សម្តេចក៏បានថ្លែងបន្តថា ព្រឹត្តិការណ៍ស៊ីហ្គេមនៅពេលនេះត្រូវបានផ្សព្វផ្សាយ ដោយសឹងតែគ្រប់ប្រព័ន្ធផ្សព្វផ្សាយពិភពលោកសំខាន់ៗ ដោយរួមទាំង CNN ផងដែរ ។
លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិក កម្ពុជាព្រមទាំងជាអនុប្រធានអចិន្ត្រៃយ៍គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ និងអាស៊ានប៉ារ៉ាហ្គេមលើកទី១២ បានវា.យតម្លៃខ្ពស់ចំពោះការខិតខំប្រឹងប្រែងរបស់អ្នកសារព័ត៌មាន នៅក្នុងព្រឹត្តិការណ៍ស៊ីហ្គេមឆ្នាំ២០២៣ ដែល កម្ពុជាកំពុងធ្វើជាម្ចាស់ផ្ទះ ។
លោក ថោង ខុន បានថ្លែងអំណរគុណចំពោះរាល់អ្នកសារព័ត៌មានទាំងអស់ ដែលគេដឹងថា មានចំនួន២.០៩៥នាក់ ក្នុងនោះអ្នកសារព័ត៌មានជាតិចំនួន១.១៨៨នាក់ និងអ្នកសារព័ត៌មានបរទេសចំនួន ៩០៧នាក់ ដែលបានមកធ្វើការឃោសនាអំពីស៊ីហ្គេមនៅកម្ពុជា ។ លោកបានអះអាងថា អ្វីៗទាំងអស់ដែលបានឮពីកម្ពុជានៅពេលនេះ មិនអាចកាត់ផ្ដាច់ចេញពីការខិតខំការធ្វើការឃោសនា ការយកព័ត៌មានរបស់អ្នកសារព័ត៌មាន និងអ្នកផ្សព្សផ្សាយបានទេ ។
ភាពជោគជ័យដែលកម្ពុជានឹងប្រកាសនៅថ្ងៃបិទ គឺជាសារបញ្ជាក់ប្រាប់ពិភពលោកថា កម្ពុជា គឺជាគោលដៅដែលមានសន្តិភាពពិតប្រាកដ ហើយក៏មានសមត្ថភាពនឹងធនធានដែលអាចរៀបចំព្រឹត្តិការណ៍ធំៗបានគ្រប់កម្មវិធីមិនថា កិច្ចប្រជុំកំពូលអាស៊ាន កិច្ចប្រជុំកំពូលអាស៊ី-អឺរ៉ុប និងព្រឹត្តិការណ៍កីឡានៅសព្វថ្ងៃនេះឡើយ ។
នៅរសៀលថ្ងៃទី១៧ ខែឧសភា ឆ្នាំ២០២៣ ខាងមុខព្រឹត្តិការណ៍២ឆ្នាំកើតមានម្តងនេះនឹងត្រូវបិទ ហើយផ្ទេរទៅឲ្យថៃធ្វើជាម្ចាស់ផ្ទះជំនួស ប៉ុន្តែមិនមែនមានន័យថា កម្ពុជាលែងដៃពីស៊ីហ្គេមនេះរហូតដល់២០ ឆ្នាំទៀតនោះទេ ដូច្នេះយើងខ្ញុំសង្ឃឹមថា អត្តពលិក និងអ្នកដែលពាក់ព័ន្ធទាំងអស់នឹងបន្តគាំទ្រវិស័យកីឡាបន្តទៀត ។
ទោះបីជាកម្ពុជាលែងជាម្ចាស់ផ្ទះ ប៉ុន្តែកម្ពុជានៅតែជាផ្នែកមួយនៃព្រឹត្តិការណ៍នេះហើយរំពឹងថា អត្តពលិកយើងនឹងបន្តរឹងមាំ ហើយអាច ធ្វើបានដូចនៅក្នុងឆ្នាំនេះ ៕ ដោយៈ ហេង ចេស្តារ និងសារ៉ាន់
ចែករំលែកព័តមាននេះ