ADផ្ទាំងផ្សព្វផ្សាយពាណិជ្ជកម្ម

Picture

ថៃ ៖ លទ្ធផល​បោះ​ឆ្នោត​ថៃ​បង្ហាញ​គណបក្ស​ថ្មី​មួយ គឺ​គណបក្ស Move Forward បាន​ទទួល​ការ​គាំទ្រ​ខ្លាំង​ជាងគេ​នៅ​ក្នុង​ការ​បោះ​ឆ្នោត កាលពី​ថ្ងៃអាទិត្យ ទី​១៤ ខែឧសភា​កន្លង​មក…

ថៃ ៖ លទ្ធផល​បោះ​ឆ្នោត​ថៃ​បង្ហាញ​គណបក្ស​ថ្មី​មួយ គឺ​គណបក្ស Move Forward បាន​ទទួល​ការ​គាំទ្រ​ខ្លាំង​ជាងគេ​នៅ​ក្នុង​ការ​បោះ​ឆ្នោត កាលពី​ថ្ងៃអាទិត្យ ទី​១៤ ខែឧសភា​កន្លង​មក ។ ជ័យ​ជំនះ​នេះ​នឹង​ធ្វើ​អោយ​លោក ភី​ថា លី​ម​ចា​រើ​ន​រ៉ាត Pita Limjaroenrat អាយុ​៤២​ឆ្នាំ ដែល​ធ្លាប់​សិក្សា​នៅ​ញ៉ូ​វ​ហ្ស៊ី​លែ​ន និង​នៅ​សាកលវិទ្យាល័យ​ហា​វ៉ឺ​ដ Harvard សហរដ្ឋអាមេរិក​ទំនង​នឹង​ក្លាយជា​នាយក​រដ្ឋមន្ត្រី​នៃ​រដ្ឋាភិបាលចម្រុះ​មួយ ។

គណបក្ស Move Forward របស់​លោក​ដែល​បង្កើត​ឡើង​នៅ​ឆ្នាំ​២០២០ បាន​ដណ្តើម​អាសនៈ​ចំនួន​១៤៨ ចំណែក​គណបក្ស ភឺ​ថៃ​របស់​កូនស្រី​លោក​ថា​ក់​ស៊ី​ន​ គឺលោកស្រី ផែ​តុង​តាន ស៊ី​ណា​វា​ត្រា Paotongtarn Shinawatra បាន​ទទួល​១៣៨​អាសនៈ ។ គណបក្ស​របស់​លោកនាយក​រដ្ឋមន្ត្រី​ប្រា​យុទ្ធ​វិញ គឺ​គណបក្សThe United Thai Nation Party ទទួល​បាន​តែ​៣៦ អាសនៈ​ប៉ុណ្ណោះ ។

ជ័យ​ជះ​នៃ​ការ​បោះ​ឆ្នោត​នេះ​មាន​ន័យ​ថា លោក ភី​តា លី​ម​ចា​រើ​ន​រ៉ាត នឹង​អាច​ក្លាយជា​នាយក​រដ្ឋមន្ត្រី​នៃ​ប្រទេស​ថៃ បើសិនជា​លោក​អាច​ចរចា​ជាមួយ​គណបក្ស​ផ្សេង ដើម្បី​អោយ​បាន​សំឡេង​៣៧៦ នៅ​ក្នុង​រដ្ឋសភា​ដែល​មាន​៥០០ អាសនៈ និង​ព្រឹទ្ធសភា​ដែល​មាន​២៥០​អាសនៈ ។ សភា​ទាំង​ពីរ​នឹង​រួម​គ្នា​បោះ​ឆ្នោត​ជ្រើសរើស​នាយក​រដ្ឋមន្ត្រី បន្ទាប់​ពី​លទ្ធផល​ផ្លូវការ​នៃ​ការ​បោះ​ឆ្នោត​សភា​ជាន់​ទាប កាលពី​ថ្ងៃ​ទី​១៤ ឧសភា ត្រូវ​បាន​ប្រកាស​ជា​ផ្លូវការ ។

កូនស្រី​របស់​លោក​ថា​ក់​ស៊ី​ន បាន​ព្រលយ​ពាក្យ​ជា​ស្រេច ដើម្បី​ត្រៀម​ក្នុង​ការ​ចរចា​ជាមួយ​គណបក្ស Move Forward ។ លោកស្រី​និយាយ​ថា​«​យើង​ត្រៀម​ជា​ស្រេច ដើម្បី​ពិភាក្សា​ជាមួយ​គណបក្ស Move Forward ។ ប៉ុន្តែ​យើង​រង់ចាំ​មើល​លទ្ធផល​ផ្លូវការ ។ ខ្ញុំ​រីករាយ​ចំពោះ​ពួក​គេ ។ យើង​អាច​ធ្វើការ​ជាមួយ​គ្នា​បាន​» ។

តើ​លោក​ភី​តា​ជា​នរណា? លោក​មានកូន​ម្នាក់ ហើយ​ធ្លាប់​សិក្សា​នៅ​ញ៉ូ​វ​ហ្ស៊ី​លែ​ន និង​សាកលវិទ្យាល័យ Harvard ប្រទេស​អា​មេ​រិ​ក មុន​ពេល​លោក​ក្លាយជា​សហគ្រិន​ម្នាក់ ។ ទោះ​យ៉ាងណា​ក៏​ដោយ បន្ទាប់​ពី​ការ​ស្លា​.​ប់​របស់​ឪពុក​គាត់​នៅ​ពេល​គាត់​មាន​អាយុ​២៥ ឆ្នាំ លោក​ភី​តា បាន​ត្រឡប់​មក​ផ្ទះ​វិញ​ដើម្បី​ដំណើរការ​អាជីវកម្ម Agrifood របស់​គ្រួសារ​គាត់​ដែល​ជំពាក់​បំណុល​គេ​យ៉ាង​ខ្លាំង ។ ក្រោយមក​គាត់​បាន​ក្លាយជា​នាយក​ប្រតិបត្តិ​នៃ app ដឹក​ជញ្ជូន Grab Thailand ។

ក្នុង​ឆ្នាំ​២០១២ គាត់​បាន​រៀប​ការ​ជាមួយ​តារា​សម្តែង​ទូរទស្សន៍​ថៃ នាង ជូ​ទី​ម៉ា ធី​ប៉ា​ណាត Chutima Teepanat ហើយ​ពួក​គេ​មានកូន​ស្រី​ម្នាក់​អាយុ​ប្រាំពីរ​ឆ្នាំ ។ អាពាហ៍ពិពាហ៍​របស់​គាត់​បាន​បែកបាក់​នៅ​ឆ្នាំ​២០១៩ ។ កូនស្រី​របស់​គាត់​បាន​បង្ហាញ​ភាព​លេចធ្លោ​នៅ​ក្នុង​យុទ្ធនាការ​ជាមួយនឹង​ឪពុក ។ លោក​នាំ​នាង​ឡើង​លើ​ឆាក បន្ទាប់​ពី​ការ​ថ្លែង​សុន្ទរកថា ជា​ច្រើន​ដែល​ធ្វើ​អោយ​មហាជន​រីករាយ ។ តាម​អន​ឡាញ​គាត់​បាន​ប្រើប្រាស់​គណនី​សាធារណៈ «​ផ្ទាល់ខ្លួន​» ដែល​មាន​អ្នកគាំទ្រ​ជិត​មួយ​លាន​នាក់ ដើម្បី​ចែករំលែក​រូបភាព​របស់​គាត់ និង​កូនស្រី​របស់​គាត់​ពាក់​អាវយឺត​ដែល​ត្រូវ​គ្នា និង​ញ៉ាំ​កា​រ៉េ​ម​ជាមួយ​គ្នា ។ ប៉ុន្តែ​ទោះបីជា​ទទួល​បាន​ជោគជ័យ​នៅ​ក្នុង​ការ​បោះ​ឆ្នោត​ក៏​គ្មាន​សញ្ញា​ណាមួយ​បង្ហាញ​ថា​ផ្លូវ​របស់​គាត់​ទៅ​កាន់​តំណែង​នាយក​រដ្ឋមន្ត្រី​នឹង​ត្រង់​ហើយ​ងាយស្រួល​នោះ​ទេ ។

ឥឡូវនេះ គាត់​ត្រូវ​តែ​បង្កើត​សម្ព័ន្ធភាព​ជាមួយ​គ្នា ដើម្បី​យកឈ្នះ​សមាជិក​ព្រឹទ្ធសភា​ដែល​តែងតាំង​ដោយ​រដ្ឋាភិបាល​របស់​លោក​ប្រា​យុ​ទ្ឍ ។ លោក​ត្រូវការ​សំឡេង​ឆ្នោត​ពី​សភា​ជាន់​ទាប និង​សភា​ជាន់ខ្ពស់ ឬ​ព្រឹទ្ធសភា​ចំនួន​យ៉ាងតិច​៣៧៦ ដើម្បី​អាច​ក្លាយជា​នាយក​រដ្ឋមន្ត្រី​និង​បង្កើត​រដ្ឋាភិបាលចម្រុះ​មួយ ។ សូ​ម្បី​គណបក្ស​របស់​លោក និង​គណបក្ស​ភឺ​ថៃ​របស់​កូនស្រី​លោក​ថា​ក់​ស៊ី​ន​រួបរួម​គ្នា​ក៏​មិន​អាច​ទទួល​បាន​សំឡេង​៣៧៦ ជា​ចំនួន​ច្រើន​ជាង​ពាក់កណ្តាល​ពី​ការ​បោះ​ឆ្នោត​រួម​គ្នា​នៅ​ក្នុង​សភា​ដែល​មាន​អាសនៈ​សរុប​៥០០ និង ព្រឹទ្ធសភា​ដែល​មាន​អាសនៈ​សរុប​២៥០ ដែល​តែងតាំង​ដោយ​រដ្ឋាភិបាលយោធា​របស់​លោក​ប្រា​យុទ្ធ ។

ទោះបីជា​លោក​ទំនង​បំផុត​នឹង​ក្លាយជា​នាយក​រដ្ឋមន្ត្រី​នៃ​ប្រទេស​ថៃ វា​នៅ​មិន​ទាន់​ប្រាកដប្រជា​នៅឡើយ ។ លោក​ត្រូវ​ធ្វើការ​បន្ថែម​ទៀត ដើម្បី​ចរចា​គណបក្ស​ផ្សេង​ៗ ដើម្បី​បាន​សំឡេង​៣៧៦ បង្កើត​រដ្ឋាភិបាល​មួយ ៕

អត្ថបទសរសេរ ដោយ

កែសម្រួលដោយ