ខេត្តកណ្តាល ៖ បន្ទាប់ពីមានអ្នកសារព័ត៌មានបានចេញផ្សាយពាក់ព័ន្ធករណីគ្រឿងចក្រឈូសឆាយដីព្រៃលិចទឹក ជម្រកត្រីពងកូននៅចំណុចស្លាបចង្វា ស្ថិតក្នុងភូមិគគីរធំ២ និងភូមិពោធិ៍មៀវ ឃុំគគីរធំ ស្រុកកៀនស្វាយ ខេត្តកណ្តាល កាលពីពេលកន្លងទៅថ្មីៗនេះ…
ខេត្តកណ្តាល ៖ បន្ទាប់ពីមានអ្នកសារព័ត៌មានបានចេញផ្សាយពាក់ព័ន្ធករណីគ្រឿងចក្រឈូសឆាយដីព្រៃលិចទឹក ជម្រកត្រីពងកូននៅចំណុចស្លាបចង្វា ស្ថិតក្នុងភូមិគគីរធំ២ និងភូមិពោធិ៍មៀវ ឃុំគគីរធំ ស្រុកកៀនស្វាយ ខេត្តកណ្តាល កាលពីពេលកន្លងទៅថ្មីៗនេះ នៅព្រឹកថ្ងៃទី១១ ខែឧសភា ឆ្នាំ២០២៣ លោកលីវ វណ្ណថេង អភិបាលរងស្រុកកៀនស្វាយ តំណាងលោកឡូវ សុខសាន អភិបាលស្រុក បានដឹកនាំក្រុមការងាររដ្ឋបាលស្រុកចុះទៅពិនិត្យមើលទីតាំងដីស្នើសុំលើកទំនប់ និងជីកស្រះចិញ្ចឹមត្រីរបស់លោកជំទាវ ឡោក ខេង ស្ថិតនៅក្នុងឃុំគគីរធំ ។
លោក លីវ វណ្ណថេង អភិបាលរងស្រុកបានលើកឡើងថា ដីនេះគឺជាដីអាស្រ័យផលរបស់បងប្អូនប្រជាពលរដ្ឋដែលពួកគាត់បានលក់ទៅឱ្យលោកជំទាវ ឡោក ខេង តាំងពីឆ្នាំ២០០៧មកម្ល៉េះ ។ មិនពាក់ព័ន្ធ ឬប៉ះពាល់លើដីអាងស្តុបទឹកជម្រកត្រីពងកូននោះឡើយ ។ ហើយមានការចុះហត្ថលេខាដឹងឮ និងទទួលស្គាល់ពីលោកអភិបាលស្រុកជាបន្តបន្ទាប់ តាំងពីជំនាន់លោកអភិបាលស្រុក កុល សំអុល ធ្វើជាអភិបាលស្រុក រហូតមកដល់បច្ចុប្បន្ន គឺមានការផ្លាស់ប្តូរ អភិបាលស្រុកកៀនស្វាយ ៣ទៅ៤នាក់មកហើយ ។
លោក លីវ វណ្ណថេង បានឱ្យដឹងបន្តទៀតថា យោងតាមឯកសារដីនេះ មិនមានទំនាស់ត្រួតជាន់គ្នាប្រជាពលរដ្ឋប្តឹងជំទាស់នោះទេ ពោលគឺលោកជំទាវ ឡោក ខេង បានទិញស្របច្បាប់ពីបងប្អូនប្រជាពលរដ្ឋដែលធ្វើស្រូវសរុបទំហំផ្ទៃដីជាង៤០០ហិកតា ។ ប៉ុន្តែក្រោយពីទិញរួច ដោយសារលោកជំទាវជាអ្នកតំណាងរាស្ត្រមណ្ឌលភ្នំពេញ ជាប់រវល់ការងារសង្គមច្រើន លោកជំទាវ ឡោក ខេង ក៏បានលក់ដីនេះទៅអោយគេបន្តអស់ប្រហែលជាង៣០០ហិកតា នៅសល់ជាង១០០ហិកតា ដែលមានទំនប់ក្រវ៉ាត់ស្រាប់ និងមាន ស.ជ.ណ ផងនោះ ទើបលោកជំទាវស្នើសុំទៅអាជ្ញាធរខេត្ត និងមន្ត្រីជំនាញចុះមកវាស់វែង ដើម្បីស្នើសុំលើកទំនប់ និងជីកស្រះចិញ្ចឹមត្រី គោលបំណងធានានិរន្តរភាពលើកស្ទួយតម្រូវការក្នុងស្រុកកាត់បន្ថយការនាំចូល ។
ទោះយ៉ាងណា លោកអភិបាលរងស្រុកបញ្ជាក់បន្ថែមថា តាមការពិនិត្យជាក់ស្តែងដីនេះ មិនមានពាក់ព័ន្ធក្នុងដីអាងស្តុបទឹកនិងមិនឃើញមានប្រជាជនប្តឹងជំទាស់ដូចការផ្សព្វផ្សាយរបស់សាព័ត៌មាននោះទេ ។
ព័ត៌មានបន្ថែមនឹងមានផ្សាយជូនបន្ត ។
ចែករំលែកព័តមាននេះ