- ភ្នំពេញ
រាជធានីភ្នំពេញ ៖ អាហារមានជាតិពុល ត្រី សាច់ បន្លែ ខូចគុណភាព ជាផ្នែកសំខាន់មួយដែលកំពុងបំផ្លាញសុខភាពពលរដ្ឋ ។ ត្បិតអីនៅលើទីផ្សារអាចមានលក់របស់ក្លែងក្លាយ…
រាជធានីភ្នំពេញ ៖ អាហារមានជាតិពុល ត្រី សាច់ បន្លែ ខូចគុណភាព ជាផ្នែកសំខាន់មួយដែលកំពុងបំផ្លាញសុខភាពពលរដ្ឋ ។ ត្បិតអីនៅលើទីផ្សារអាចមានលក់របស់ក្លែងក្លាយ ខូចគុណភាព និងផ្ទុកសារធាតុគីមី ដែលបាន និងកំពុងបង្កផលប៉ះពាល់ដល់សុខភាពពលរដ្ឋ និងធ្វើអោយប៉ះពាល់ដល់ជីវិតរបស់ប្រជាជនសម្រាប់រយៈពេលវែង ។
បច្ចុប្បន្ននេះ ក្រៅពីបន្លែសាច់ជ្រូក និងសាច់មាន់ដែលពលរដ្ឋខ្មែរនិយមទទួលទានត្រូវបានសមត្ថកិច្ចជំនាញចាប់រឹបអូសយកទៅដុតបំផ្លាញចោលជាញឹកញាប់ ។ ការបង្ក្រាបបានចំណីក្លែងក្លាយនេះ ជាសញ្ញាមួយបង្ហាញថា ប្រភេទទំនិញទាំងអស់នោះអាចមានលក់នៅលើទីផ្សារច្រើន ។
កាលពីពាក់កណ្តាលខែកុម្ភៈកន្លងមកនេះ មន្ត្រីជំនាញរបស់អគ្គនាយកដ្ឋានការពារ អ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» និងមន្ត្រីជំនាញរបស់អគ្គនាយកដ្ឋានសុខភាពសត្វ និងផលិតកម្មសត្វ ក្រសួងកសិកម្ម បានដុតបំផ្លាញចោលសាច់ជ្រូក និងសរីរាង្គជ្រូកបង្កកសរុប១៧៦០គីឡូក្រាម នៅទីលានចាក់សំរាម រាជធានីភ្នំពេញ ។
អារហារខូចគុណភាពទាំងនេះ ត្រូវបានសមត្ថកិច្ចប្រមូលមកពីទីផ្សារក្នុងរាជធានីភ្នំពេញនៅពេលចុះប្រតិបត្តិការ ត្រួតពិនិត្យទីតាំងស្តុកទុក ចែកចាយផលិតផល សាច់សត្វស្រស់ បង្កកជាច្រើនកន្លែងក្នុងភូមិ ។ មន្ត្រីឱ្យដឹងថា សាច់ជ្រូក និងសរីរាង្គជ្រូកមានផ្ទុកជំងឺប៉េស្ត្រអាហ្រិក ខូចគុណភាព គ្មានសុវត្ថិភាព សម្រាប់អ្នកប្រើប្រាស់ ។
សាច់ជ្រូក និងមាន់ជាអាហារពេញនិយមរបស់ពលរដ្ឋខ្មែរ ។ នៅភ្នំពេញសាច់ជ្រូកខ្វៃ សាច់ជ្រូកបំពង សាច់យកទៅធ្វើម្ហូបផ្សេងៗ មានអាំង ចៀន ស្ងោរ ខ ។ ចំណែកសាច់មាន់ ក៏ដូចគ្នា ពលរដ្ឋយកទៅអាំង ដុត និង ធ្វើម្ហូបផ្សេងៗទៀត ។ នៅតាមទីសាធារណម្ហូបចម្អិនស្រាប់ធ្វើពីសាច់មាន់ សាច់ជ្រូកមានលក់គ្រប់កន្លែង ។ ដោយសារមានតម្រូវខ្ពស់បែបនេះហើយបានជាមានឈ្មួញខិលខូចខ្លះធ្វើអាជីវកម្មដោយ ខ្វះសីលធម៌ គ្មានការទទួលខុសត្រូវ លួចនាំរបស់ដែលគ្មានគុណភាពមកលក់ឱ្យពលរដ្ឋដោយមិនបានគិតគូរពីសុខភាពសាធារណនោះទេ ។ អ្នកលក់របស់ខូចគុណភាពទាំងនេះត្រូវតែបញ្ឈប់ជាបន្ទាន់ ។ គេត្រូវលក់ដូររបស់មានគុណភាព ហើយមិនត្រូវលក់អ្វីដែលប៉ះពាល់ដល់សុខភាព និងជីវិតរបស់យើងឡើយ ។
ទន្ទឹម និងការទទួចឱ្យអាជ្ញាធរចាត់វិធានការពារសុខមាលភាពពលរដ្ឋឱ្យមានតឹងរឹងមានប្រសិទ្ធភាព ពលរដ្ឋក៏គួរមានការប្រុងប្រយ័ត្ន នៅក្នុងការជ្រើសរើសអាហារ ត្រីសាច់ ទទួលទានដែរ ដើម្បីកុំឱ្យកើតជំងឺឆ្លង និងជំងឺមិនឆ្លងមួយចំនួនដូចជាលើសឈាម ទឹកនោមផ្អែម និងមហារីកជាដើមនោះ ៕ដោយ សារ៉ាន់
ចែករំលែកព័តមាននេះ