រាជធានីភ្នំពេញ៖ អ្នកសារព័ត៌មានបរទេសជាច្រើននាក់ បានតាមផ្តិតយករូបភាពរបស់កីឡាការិនីកម្ពុជា បូសំណាង ក្នុងពេលរត់ចម្ងាយ ៥គីឡូម៉ែត្រ ក្រោមដំណក់ទឹកភ្លៀង កំពុងមានខ្យល់ខ្លាំង។ ហើយការតាមផ្តិតយករូបភាព និងវីដេអូនេះ…
រាជធានីភ្នំពេញ៖ អ្នកសារព័ត៌មានបរទេសជាច្រើននាក់ បានតាមផ្តិតយករូបភាពរបស់កីឡាការិនីកម្ពុជា បូសំណាង ក្នុងពេលរត់ចម្ងាយ ៥គីឡូម៉ែត្រ ក្រោមដំណក់ទឹកភ្លៀង កំពុងមានខ្យល់ខ្លាំង។ ហើយការតាមផ្តិតយករូបភាព និងវីដេអូនេះ មិនមែនដោយសារនាងទទួលបានជោគជ័យនោះទេ ដោយសារតែការតស៊ូរបស់នាងមិនបោះបង់ការប្រកួត រត់រហូតដល់គោលដៅ ទោះបីជានាងមកដល់ទី ក្រោយគេបង្អស់ក្តី ។
អ្នកថតរូបជនជាតិថៃមួយរូប បានបង្ហោះរូបភាពប៉ុន្មានសន្លឹកអមដោយសារ កាលពីថ្ងៃទី០៨ ខែឧសភា ឆ្នាំ២០២៣ថា ៖«នេះជាលើកទីមួយហើយ ដែលកីឡាការិនីកម្ពុជា បង្ហាញឲ្យគាត់យល់ពីអត្ថន័យ នៃកីឡា គឺជាការតស៊ូ ដើម្បីសម្រេចគោលបំណង ទោះឧបសគ្គ ឬលទ្ធផលយ៉ាងណាក៏ដោយ ក៏មិនបោះបង់» ។
ដោយឡែក សារព័ត៌មានវៀតណាម និងកាសែតថៃ បានផ្តិតយកសកម្មភាពភាពទាំងអស់នេះ និងសរសេរពីភាពតស៊ូ របស់កីឡាការិនីកម្ពុជា បូសំណាង រត់រហូតដល់គោលដៅ ទោះចាញ់ក៏ដោយ ក៏នាងមិនបោះបង់ ឫបញ្ឈប់កណ្តាលទីឡើយ។
ថ្វីបើ បូ សំណាង មិនបានមេដាយមាស ប៉ុន្តែទទួលបានមេដាយ(បេះដូង)ពីការគាំទ្រយ៉ាងខ្លាំងពីសំណាក់ប្រជាពលរដ្ឋខ្មែរទាំងក្នុងនិងក្រៅប្រទេស សូម្បីប្រទេសជិតខាង ក៏ត្រូវបានប្អូនស្រី សំណាង ប្រមូលបេះដូងបានអស់ហើយ ពិតរំភើបចិត្តខ្លាំងណាស់។ ស្របពេលសារគាំទ្របង្ហោះព្រោងព្រាតពេញបណ្តាញទំនាក់ទំនងសង្គមហ្វេសប៊ុក ចាប់តាំងពីយប់រហូតដល់ព្រឹកថ្ងៃទី៩ ខែឧសភា ឆ្នាំ២០២៣ ដែលមនុស្សភាគច្រើនបានកោតសរសើរ និងផ្តល់កម្លាំងចិត្តដល់នាង ។
សូមបញ្ជាក់ថា ប្រភេទកីឡាអត្តពលកម្ម នៃព្រឹត្តិការណ៍កីឡាអាស៊ីអាគ្នេយ៍ លើកទី៣២ ឆ្នាំ២០២៣ ក៏បានបើកការប្រកួតជាផ្លូវការ នៅពហុកីឡដ្ឋានជាតិមរតកតេជោ នាព្រឹកថ្ងៃទី០៨ ខែឧសភា ។ កីឡាការិនីវៀតណាម Nguyễn Thị Oanh មេដាយមាស រត់ចម្ងាយ ៥,០០០ម៉ែត្រ ដោយប្រើថិរវេលា១៧:០០.៣៣០ ។ ចំណែកប្អូនស្រីសំណាងប្រើថិរវេលា ២២:៥៤.២២០ ទោះជាដឹងថាមិនឈ្នះគេ តែប្អូនស្រីប្រឹងរហូតរត់មកដល់ទី ក្រោយគេ លើកទង់ជាតិកម្ពុជា ទាំងទឹកភ្នែក ពេលមេឃ កំពុងភ្លៀងខ្យល់ខ្លាំង ៕
រូបភាពរបស់ : MAIN STAND
ចែករំលែកព័តមាននេះ