បុរសម្នាក់តែងតែដើរអុកឡុកវា.យបំផ្លិចបំផ្លាញទ្រព្យសម្បត្តិរបស់ប្រជាពលរដ្ឋនៅក្នុងភូមិជាញឹកញាប់ ហើយក៏ត្រូវកម្លាំងសមត្ថកិច្ចនគរបាលប៉ុស្តិ៍គគីរធំ សហការជាមួយប្រជាការពារភូមិ ធ្វើការឃាត់ខ្លួនភ្លាមៗតាមពាក្យបណ្តឹងរបស់ជនរងគ្រោះតែម្តង
ខេត្តកណ្តាល ៖ បុរសម្នាក់តែងតែដើរអុកឡុកវា.យបំផ្លិចបំផ្លាញទ្រព្យសម្បត្តិរបស់ប្រជាពលរដ្ឋនៅក្នុងភូមិជាញឹកញាប់ ហើយក៏ត្រូវកម្លាំងសមត្ថកិច្ចនគរបាលប៉ុស្តិ៍គគីរធំ សហការជាមួយប្រជាការពារភូមិ ធ្វើការឃាត់ខ្លួនភ្លាមៗតាមពាក្យបណ្តឹងរបស់ជនរងគ្រោះតែម្តង ហេតុការណ៍នេះកើតឡើងស្ថិតនៅក្នុងភូមិកោះតេជោ ឃុំគគីរធំ ស្រុកកៀនស្វាយ ខេត្តកណ្តាល។
បើតាមសម្តីជនរងគ្រោះឈ្មោះ អៀង ចាន់សុខ ភេទប្រុស អាយុ៤២ឆ្នាំ មានប្រពន្ធឈ្មោះ អ៊ិន ស្រីសុជាត្តា អាយុ៤៥ឆ្នាំ មានទីលំនៅភូមិ-ឃុំខាងលើ បានរៀបរាប់ប្រាប់ឱ្យដឹងថា នៅវេលាម៉ោង៩និង៣០នាទីយប់ ថ្ងៃទី៤ ខែឧសភា ឆ្នាំ២០២៣ មានជនសង្ស័យម្នាក់ឈ្មោះ សេង រ៉ុកខ្ចា ហៅអាមុំ ភេទប្រុស អាយុ៣២ឆ្នាំ មានទីលំនៅភូមិ-ឃុំជាមួយគ្នា ដែលជាមនុស្សញៀ.នថ្នាំ និងស្រវឹងស្រា បានធ្វើសកម្មភាពយកដុំឥដ្ឋគប់ដំបូលផ្ទះ ហើយស្រែកគំរា.មជនរងគ្រោះឈ្មោះ អ៊ិន ស្រីសុជាត្តា ថា «ហែងចេញមក កុំសម្ងំ ប្រយ័ត្នអាញ់ទម្លុះផ្ទះចូល»។
ជនរងគ្រោះបន្តថា ពេលនោះ ស្ត្រីរងគ្រោះមានការភ័យខ្លាច ក៏ស្ទុះរត់ទៅដាស់កូនដែលកំពុងដេកលង់លក់ក្នុងដំណេក ហើយរត់ចូលបន្ទប់ទឹក ដោយមិនហ៊ានតបតនោះទេ។ លុះមួយសន្ទុះក្រោយក៏លឺសំឡេងសំរឹបជើង ជនរងគ្រោះក៏អើតមើលទៅលើ ស្រាប់តែឃើញជនសង្ស័យនៅលើដំបូលផ្ទះកំពុងតែវះដែកស័ង្កសីដំបូលផ្ទះតែម្តង។ ដោយឃើញដូច្នេះ ជនរងគ្រោះក៏បាននាំកូនចៅដើរលបៗទៅខាងមុខផ្ទះ រួចទូរស័ព្ទទៅប្រាប់ប្តីដែលកំពុងធ្វើការនៅភ្នំពេញ តែតេមិនចូលនោះទេ បន្ទាប់មកជនរងគ្រោះក៏តេទៅប្តឹងសមត្ថកិច្ចនគរបាលប៉ុស្តិ៍រដ្ឋបាលគគីរធំតែម្តង។
ជនរងគ្រោះបន្តទៀតថា ពេលលឺជនរងគ្រោះតេប្តឹងសមត្ថកិច្ច ជនសង្ស័យក៏ចុះពីដំបូលផ្ទះរបស់ជនរងគ្រោះវិញ លុះពេលកម្លាំងសមត្ថកិច្ចចុះទៅដល់ ជនសង្ស័យក៏រត់គេចខ្លួនបាត់តែម្តង។
ក្រោយពេលកើតហេតុ កម្លាំងសមត្ថកិច្ចសហការជាមួយកម្លាំងប្រជាការពារ តាមស្វែងរកចាប់ខ្លួនជនសង្ស័យគ្រប់ច្រកល្ហក់។ នៅពេលដែលសមត្ថកិច្ចកំពុងតែតាមស្វែងរកចាប់ខ្លួន បែរជាជនសង្ស័យឆ្លៀតឱកាសបកមកអុកឡុក គប់វាយបំផ្លិចបំផ្លាញផ្ទះរបស់ជនរងគ្រោះម្តងទៀត ដោយគាស់ទ្វារ និងវា.យកម្ទេចបង្អួចផ្ទះតែម្តង។ ពេលនោះ ស្ត្រីរងគ្រោះមានការភ័យខ្លាចក៏នាំកូនរត់ចេញតាមទ្វារមុខទៅសុំផ្ទះអ្នកជិតខាងដេក។ តែជនសង្ស័យនៅតែបន្តការអុកឡុកវា.យបំផ្លិចបំផ្លាញទ្រព្យសម្បត្តិរបស់ជនរងគ្រោះរហូតដល់ភ្លឺ បណ្តាលរងការខូចខាតដំបូលផ្ទះអស់ទាំងស្រុង, ទ្វារ១, បង្អួច២, ពាងទឹក៤ និងជញ្ជាំងផ្ទះប្រេះខូចខាតគ្រប់កន្លែង។ លុះព្រឹកឡើងវេលាម៉ោងប្រហែល៨ ថ្ងៃទី៥ ខែឧសភា ឆ្នាំ២០២៣ ទើបកម្លាំងសមត្ថកិច្ចប៉ុស្តិ៍និងប្រជាការពារចុះទៅព័ទ្ធចាប់ជនសង្ស័យបាន រួចយកមកសួរនាំ និងដកហូតបានវត្ថុតាងមួយចំនួន។
គួរបញ្ជាក់ផងដែរថា ជនសង្ស័យជាមនុស្សញៀ.នថ្នាំ ហើយតែងតែអុកឡុកវា.យបំផ្លិចបំផ្លាញទ្រព្យសម្បត្តិផ្ទះជនរងគ្រោះ និងផ្ទះប្រជាពលរដ្ឋក្នុងភូមិជាញឹកញាប់។ ហើយសម្រាប់គ្រួសារជនរងគ្រោះនេះ គឺជាលើកទី៨មកហើយ និងមានទាំងកិច្ចសន្យាជាមួយសមត្ថកិច្ចទៀតផង តែជននេះនៅតែមិនរាងចាលដដែល។ ហើយពេលសមត្ថកិច្ចចាប់បានជននេះ ធ្វើអោយប្រជាពលរដ្ឋក្នុងមូលដ្ឋានសម្តែងការសប្បាយចិត្តជាខ្លាំង និងសូមសំណូមពរអោយតុលាការខេត្តកណ្តាល មេត្តាជួយផ្តន្ទារទោសជនសង្ស័យរូបនេះអោយសមទៅតាមទោសទណ្ឌដែលខ្លួនគេបានប្រព្រឹត្តិផង។
រហូតដល់រសៀលថ្ងៃទី៥ ខែឧសភា ឆ្នាំ២០២៣ សមត្ថកិច្ចនគរបាលប៉ុស្តិ៍គគីរធំ ក៏បានកសាងសំណុំរឿងបញ្ជូនជនសង្ស័យរូបនេះ រួមជាមួយនឹងវត្ថុតាង បញ្ជូនទៅកាន់អធិការដ្ឋាននគរបាលស្រុកកៀនស្វាយ ដើម្បីចាត់ការបន្តតាមនីតិវិធីច្បាប់៕
ចែករំលែកព័តមាននេះ