ខេត្តតាកែវ ៖ បន្ទាប់ពីមានបងប្អូនប្រជាពលរដ្ឋរស់នៅក្នុងខេត្តតាកែវជាង៤០០នាក់ បានដាក់ពាក្យបណ្ដឹងសុំអន្តរាគមន៍ពីអាជ្ញាធខេត្តតាកែវឱ្យជួយពួកគាត់ដែលចាញ់បោកក្រុមហ៊ុន ជា សារ៉ន នៅខេត្តកំពត ពាក់ព័ន្ធទៅនឹងទិញដីធ្លី និងវិនិយោគជាមួយឧកញ៉ា ជា…
ខេត្តតាកែវ ៖ បន្ទាប់ពីមានបងប្អូនប្រជាពលរដ្ឋរស់នៅក្នុងខេត្តតាកែវជាង៤០០នាក់ បានដាក់ពាក្យបណ្ដឹងសុំអន្តរាគមន៍ពីអាជ្ញាធខេត្តតាកែវឱ្យជួយពួកគាត់ដែលចាញ់បោកក្រុមហ៊ុន ជា សារ៉ន នៅខេត្តកំពត ពាក់ព័ន្ធទៅនឹងទិញដីធ្លី និងវិនិយោគជាមួយឧកញ៉ា ជា សារ៉ន នៅព្រឹកថ្ងៃសុក្រ ទី៥ ខែឧសភា ឆ្នាំ២០២៣ នេះ អាជ្ញាធខេត្តតាកែវ បានបើកកិច្ចប្រជុំដោះស្រាយជូនបងប្អូនប្រជាពលរដ្ឋដែលពាក់ព័ន្ធ ដើម្បីស្វែងរកដំណោះស្រាយជូនពួកគាត់។
ក្រោយពីស្ដាប់ការលើកឡើង និងសំណូមពររបស់បងប្អូនប្រជាពលរដ្ឋដែលចូលរួមប្រមាណជាង៥០០នាក់ ដោយស្នើសុំអោយអាជ្ញាធខេត្តតាកែវជួយអន្តរាគមន៍ លោក អ៊ូច ភា អភិបាលខេត្តតាកែវបានដោះស្រាយបញ្ហាចំនួន៣ចំណុចជូនបងប្អូនប្រជាពលរដ្ឋ ។
ទី១-អោយប្រជាពលរដ្ឋដាក់ពាក្យបណ្ដឹងនៅខេត្តកំពត ឬដាក់ពាក្យបណ្ដឹងនៅសាលាខេត្តតាកែវ ហើយអាជ្ញាធខេត្តតាកែវនឹងជួយអន្តរាគមន៍ទៅខេត្តកំពតអោយជួយដោះស្រាយជូនបងប្អូនប្រជាពលរដ្ឋ ។ ទី២-ករណីបងប្អូនប្រជាពលរដ្ឋខ្ចីលុយធនាគារ គឺអោយក្រុមហ៊ុន ជា សារ៉ន ជាអ្នកទទួលខុសត្រូវក្នុងការបង់ការប្រាក់ជំនួសប្រជាពលរដ្ឋ និងទី៣-ពាក់ព័ន្ធនិងប្លង់ដីរបស់ប្រជាពលរដ្ឋដែលដាក់បញ្ចាំនៅធនាគារ គឺអោយក្រុមហ៊ុន ជា សារ៉ន យកអចលនទ្រព្យរបស់ខ្លួនដាក់បញ្ចាំនៅធនាគារយកប្រាក់មកលោះប្លង់ជូនបងប្អូនប្រជាពលរដ្ឋវិញ ។
លោកអភិបាលខេត្តតាកែវ ក៏បានសំណូមពរដល់បុគ្គលិកធនាគារ និងបុគ្គលិកមីក្រូហិរញ្ញវត្ថុទាំងអស់ សូមកុំមានការគំរាមកំហែងប្ដឹងប្តល់ ឬរឹងអួសផ្ទះសម្បែងបងប្អូនប្រជាពលរដ្ឋដែលខ្ចីលុយពាក់ព័ន្ធទៅ និងក្រុមហ៊ុន ជា សារ៉ន ហើយ ក្នុងនោះ អាជ្ញាធមូលដ្ឋានត្រូវតាមដាន និងអន្តរាគមន៍អោយបានទាន់ពេលវេលាក្នុងការជួយបងប្អូនប្រជាពលរដ្ឋ បើមានការគំរាមកំហែងណាមួយ ។
គួររំលឹកថា នៅក្នុងកិច្ចប្រជុំនោះ បងប្អូនប្រជាពលរដ្ឋបានទទួលយកចំពោះដំណោះស្រាយរបស់អភិបាលខេត្តតាកែវជូនបងប្អូនប្រជាពលរដ្ឋដែលចាញ់បោកក្រុមហ៊ុន ជា សារ៉ន ។
ព័ត៌មានបន្ថែមនឹងមានផ្សាយជូនលើកាសែតកោះសន្តិភាព ។
ចែករំលែកព័តមាននេះ