មណ្ឌលគិរី៖ ប្រជាពលរដ្ឋរស់នៅខេត្តមណ្ឌលគិរី ជាពិសេស នៅក្រុងសែនមនោរម្យ បានអបអរសាទរយ៉ាងខ្លាំង ដែលកម្ពុជាបានធ្វើជាម្ចាស់ផ្ទះការប្រកួតកីឡាប្រវត្តិសាស្ត្រស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ខណៈនៅក្រុងសែនមនោរម្យ ចំណុចរូបសំណាក់ដំរីដែក រដ្ឋបាលខេត្តក៏បានរៀបចំដាក់បញ្ចាំងតាមរយៈផ្ទាំងLEDបន្តផ្ទាល់…
មណ្ឌលគិរី៖ ប្រជាពលរដ្ឋរស់នៅខេត្តមណ្ឌលគិរី ជាពិសេស នៅក្រុងសែនមនោរម្យ បានអបអរសាទរយ៉ាងខ្លាំង ដែលកម្ពុជាបានធ្វើជាម្ចាស់ផ្ទះការប្រកួតកីឡាប្រវត្តិសាស្ត្រស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ខណៈនៅក្រុងសែនមនោរម្យ ចំណុចរូបសំណាក់ដំរីដែក រដ្ឋបាលខេត្តក៏បានរៀបចំដាក់បញ្ចាំងតាមរយៈផ្ទាំងLEDបន្តផ្ទាល់ ជុំវិញព្រឹត្តិការណ៍នៃការប្រកួតកីឡាស៊ីហ្គេមនេះផងដែរ ។
ជាក់ស្តែង នៅយប់ថ្ងៃទី០២ ឧសភា ២០២៣ ស្របពេលដែលកម្ពុជាបានប្រកួតកីឡាបាល់ទាត់បុរស ពូលAជាមួយប្រទេសហ្វីលីពីន យើងបានកត់សម្គាល់ឃើញថា ប្រជាពលរដ្ឋនៅក្រុងសែនមនោរម្យយ៉ាងច្រើនកុះករ ណែនតាន់តាប់ បានមកចូលរួមទស្សនានៃការប្រកួតនេះ ។
ក្នុងនោះដែរ មានវត្តមានឯកឧត្ដម ថង សាវុន អភិបាលខេត្តមណ្ឌលគិរី ក៏បានអញ្ជើញមកទស្សនាជាមួយប្រជាពលរដ្ឋប្រកបដោយភាពស្និទ្ធិស្នាល អបអរការប្រកួតកីឡាស៊ីហ្គេម ដែលកម្ពុជាធ្វើជាម្ចាស់ផ្ទះ បន្ទាប់ពីរងចាំរយៈពេលជាង៦០ឆ្នាំ ។
ប្រជាពលរដ្ឋខេត្តមណ្ឌលគិរីដែលបានមកទស្សនាដោយផ្ទាល់ តាមរយៈការដាក់បញ្ចាំងLEDការប្រកួតកីឡាស៊ីហ្គេម បានបង្ហាញអារម្មណ៍រំភើបឥតឧបមា ខណៈដែលកម្ពុជាមានភាពរីកចម្រើនរុងរឿង រហូតបានធ្វើជាម្ចាស់ផ្ទះនៃការប្រកួតកីឡាប្រវត្តិសាស្ត្រស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ។
ដោយពួកគាត់បានសម្ដែងអារម្មណ៍សប្បាយត្រេកអរ ថែមទាំងថ្លែងអំណរគុណចំពោះសម្ដេច
តេជោ ហ៊ុន សែន ដែលសម្ដេចបានលះបង់ខិតខំដឹកនាំប្រទេសកម្ពុជាឲ្យមានសុខសន្តិភាព រីកចម្រើនឥតឈប់ឈរ រហូតធ្វើឲ្យកម្ពុជាប្រែមុខមាត់ថ្មីលើកឆាកអន្តរជាតិ បានធ្វើជាម្ចាស់ផ្ទះស៊ី
ហ្គេម ក្រោយខកខានជាង៦០ឆ្នាំ ។
សូមបញ្ជាក់ដែរថា ជុំវិញព្រិត្តិការណ៍ស៊ីហ្គេម ដែលរដ្ឋបាលខេត្តមណ្ដលគិរីបានរៀបចំដាក់បញ្ចាំងLEDបន្តផ្ទាល់ជូនប្រជាពលរដ្ឋទស្សនា ពិតជាបានបង្កភាពសប្បាយរីករាយ ការជួបជុំបង្ហាញដោយភាពស្និទ្ធិស្នាល ហើយទន្ទឹមនោះ រដ្ឋបាលខេត្តក៏មានរៀបចំតុកៅអីជាច្រើនជូនប្រជាពលរដ្ឋអង្គុយទស្សនា ប៉ុន្តែដោយសារអ្នកមកទស្សនាច្រើនពេក លើសការរំពឹងទុក មិនមានកៅអីអង្គុយគ្រប់គ្រាន់ ប្រជាពលរដ្ឋក៏បានយកកៅអីមកពីផ្ទះរៀងៗខ្លួនអង្គុយទស្សនារួមគ្នា។
ចែករំលែកព័តមាននេះ