ក្រុងប៉ោយប៉ែត ៖ ពលករចំណាកស្រុកជាង១០នាក់ ក្រោយពីត្រូវប៉ូលិសក្រុងប៉ោយប៉ែត ឃាត់សួរនាំនៅព្រឹកថ្ងៃទី២៩ មេសា ដើម្បីទប់ស្កាត់មិនឱ្យឆ្លងដែនទៅទឹកដីសៀមដោយខុសច្បាប់ ស្រាប់តែរកឃើញថា ពួកគេមានប័ណ្ណឆ្លងដែនក្លែងបន្លំឯកសារទាំងឈ្មោះនិងអាសយដ្ឋានមួយចំនួនធំទៅវិញ
ក្រុងប៉ោយប៉ែត ៖ ពលករចំណាកស្រុកជាង១០នាក់ ក្រោយពីត្រូវប៉ូលិសក្រុងប៉ោយប៉ែត ឃាត់សួរនាំនៅព្រឹកថ្ងៃទី២៩ មេសា ដើម្បីទប់ស្កាត់មិនឱ្យឆ្លងដែនទៅទឹកដីសៀមដោយខុសច្បាប់ ស្រាប់តែរកឃើញថា ពួកគេមានប័ណ្ណឆ្លងដែនក្លែងបន្លំឯកសារទាំងឈ្មោះនិងអាសយដ្ឋានមួយចំនួនធំទៅវិញ ។
ពលករទាំងអស់ខាងលើ ៨នាក់មានប័ណ្ណឆ្លងដែន (Border Pass) ក្លែងបន្លំ និង៥នាក់ជាពលករឆ្លងដែនតាមច្រករបៀង ហើយទាំងអ្នកមានប័ណ្ណឆ្លងដែនក្លែងបន្លំ ទាំងអ្នកមិនមានប័ណ្ណឆ្លងដែន គឺសុទ្ធតែអះអាងថា ពួកគេចង់ទៅរកការងារធ្វើនៅលើទឹកដីសៀមដូចគ្នា ។ ពលករ៨នាក់ ដែលមានប័ណ្ណឆ្លងដែនក្លែងបន្លំបានប្រាប់សមត្ថកិច្ចថា ការធ្វើប័ណ្ណនោះ គឺអស់ថវិកាក្នុងម្នាក់៨០០បាត លុយសៀម ដោយធ្វើនៅប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត ។
បើតាមការឱ្យដឹងពីឈ្មោះនិត និន ភេទប្រុស អាយុ២៦ឆ្នាំ មកពីស្រុកត្រាំកក់ ខេត្តតាកែវ បានប្រាប់ថា ការចូលធ្វើប័ណ្ណឆ្លងដែនខ្លួនគ្មានអត្តសញ្ញាណប័ណ្ណទេ ប៉ុន្តែត្រូវគេតម្រូវឱ្យដាក់លុយ៨០០បាត ទើបអាចធ្វើប័ណ្ណនោះបាន ។ ចំណែកឯស្ត្រី៣នាក់ទៀត ១-ឈ្មោះយ៉ាត ចាន់ណា អាយុ៣០ឆ្នាំ ២-ឈ្មោះណៃ សុខឿន អាយុ៤២ឆ្នាំ និង៣-ឈ្មោះឈឿន ស៊ាវនី អាយុ១៧ឆ្នាំ មកពីភូមិចំការចេក ឃុំរហាត់ទឹក ស្រុកមង្គលបុរី ខេត្តបន្ទាយមានជ័យ បានអះអាងថា ពួកខ្លួនធ្វើប័ណ្ណឆ្លងដែនក្នុងម្នាក់ៗអស់៨០០បាត។ មុនពេលធ្វើប័ណ្ណឆ្លងដែននេះពួកខ្លួនត្រូវគេហៅទៅសួរនាំពីឈ្មោះ និងអត្តសញ្ញាណផ្សេងៗដូចពលករដទៃទៀតដែរ លុះពេលបានប័ណ្ណឆ្លងដែនហើយបែរជាខុសទាំងឈ្មោះ ខុសទាំងអាសយដ្ឋានទៅវិញ។ ហើយមិនទាន់ទាំងបានឆ្លងដែនទៅស្រុកសៀមផង ក៏ត្រូវប៉ូលិសហៅសួរនាំ ទើបដឹងថា ប័ណ្ណឆ្លងដែនរបស់ពួកខ្លួនជាប័ណ្ណក្លែងបន្លំឯកសារទាំងស្រុង ពីព្រោះមានតែរូបថតនិងមេដៃរបស់ពួកខ្លួន ឯឈ្មោះ និងអាសយដ្ឋានខុសទាំងអស់ ។
ចំណែកពលករដែលអត់មានប័ណ្ណឆ្លងដែនចំនួន៥នាក់ ក្នុងនោះមានកុមារ២នាក់ ក្រោយការសួរនាំសមត្ថកិច្ចក៏បានឃាត់ខ្លួនម្នាក់ដែលពាក់ព័ន្ធផងដែរ ។ ពលករទាំងអស់ខាងលើ ក្រោយការសួរនាំរកឃើញអ្នកពាក់ព័ន្ធក៏ត្រូវបានអនុញ្ញាតឱ្យត្រឡប់ទៅស្រុកកំណើតវិញ ក្រោយពីការអប់រំរួច ។ ចំពោះស្ត្រីចំណាស់ពាក់ព័ន្ធ និងពលករ៨នាក់ដែលមានប័ណ្ណឆ្លងដែនសុទ្ធ តែក្លែងបន្លំឯកសារ ត្រូវបានលោកអ៊ុំ សុផល អធិការនគរបាលក្រុងប្រាប់ថា ក្រោយការសួរនាំនិងធ្វើកំណត់ហេតុរួចនឹងបញ្ជូនពួកគេទៅស្នងការដ្ឋាននគរបាលខេត្ត តាមគោលការណ៍របស់លោកឡុង ជាប ព្រះរាជអាជ្ញារងអមសាលាដំបូងខេត្ត ដើម្បីសាកសួរបន្តជុំវិញរឿងរ៉ាវខាងលើ ។
ចំណែករឿងធ្វើប័ណ្ណឆ្លងដែនក្លែងបន្លំយកតម្លៃរហូតដល់ទៅ៨០០បាត លុយសៀមនោះ ត្រូវបានលោកលាក់ រម្មនា ប្រធានសេនាធិការប៉ូលិសអន្តោប្រវេសន៍បានបដិសេធតាមទូរស័ព្ទថា ជារឿងមិនពិតទៅវិញ ។ លោកអធិការបញ្ជាក់ថា ជនដែលត្រូវបញ្ជូនទៅកាន់ស្នងការដ្ឋានខេត្ត មានចំនួន១១នាក់ ប្រុស៦នាក់ ស្ត្រី៥នាក់ ក្នុងនោះមានអ្នកពាក់ព័ន្ធ២នាក់ ម្នាក់ជាមេខ្យល់ នាំពលករទៅធ្វើការនៅស្រុកសៀម ដោយខុសច្បាប់ និងម្នាក់ទៀតជាអ្នករត់ការធ្វើប័ណ្ណឆ្លងដែនក្លែងបន្លំ៕
ចែករំលែកព័តមាននេះ