ខេត្តកណ្តាល ៖ ជនសង្ស័យ២នាក់ បានធើ្វសកម្មភាពលួចម៉ូតូ១គ្រឿង បានសម្រេច ត្រូវបានកម្លាំងសមត្ថកិច្ច ធើ្វការស្រាវជ្រាវតាមឃាត់ខ្លួនបានមកវិញ ម្នាក់ ចំណែកម្នាក់ទៀត រត់គេចខ្លួន…
ខេត្តកណ្តាល ៖ ជនសង្ស័យ២នាក់ បានធើ្វសកម្មភាពលួចម៉ូតូ១គ្រឿង បានសម្រេច ត្រូវបានកម្លាំងសមត្ថកិច្ច ធើ្វការស្រាវជ្រាវតាមឃាត់ខ្លួនបានមកវិញ ម្នាក់ ចំណែកម្នាក់ទៀត រត់គេចខ្លួន ។
ករណីលួចម៉ូតូខាងលើនេះ បានកើតឡើងកាលពីវេលាម៉ោង០៣ទៀបភ្លឺ ឈានចូលថ្ងៃទី២១ ខែកក្កដា ឆ្នាំ២០២៥ ស្ថិតនៅចំណុចភូមិព្រែកតាពៅ សង្កាត់ដើមមៀន ក្រុងតាខ្មៅ ខេត្តកណ្តាល ។
លោកវរសេនីយ៍ឯក យី វណ្ណដា អធិការរដ្ឋាននគរបាលក្រុងតាខ្មៅ បានអោយដឹងថា ជនសង្ស័យ០២នាក់ ៖
១-ឈ្មោះ រស់ ភក្តី ភេទប្រុស អាយុ៣៤ឆ្នាំ ជនជាតិខ្មែរ ទីលំនៅភូមិព្រែកតាពៅ សង្កាត់ដើមមៀន ក្រុងតាខ្មៅ ខេត្តកណ្តាល មុខរមិនពិតប្រាកដ(ឃាត់ខ្លួន) ។ ជាអ្នកសមគំនិតក្នុងអំពើលួចម៉ូតូ ។
២-ឈ្មោះហៅក្រៅ តឿ ភេទប្រុស អាយុ២៥ឆ្នាំ ជនជាតិខ្មែរ ទីលំនៅភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្តាល មុខរមិនពិតប្រាកដ(គេចខ្លួន) ។
បើយោងប្រភពព័ត៌មានពីជនរងគ្រោះ បានអោយដឹងថា មុនពេលកើតហេតុ ខ្លួនបានជិះម៉ូតូទៅដេកលេងនៅផ្ទះមិត្តភក្តិ ដោយបានទុកម៉ូតូនៅខាងមុខផ្ទះមិត្តភក្តិ ស្ថិតនៅភូមិព្រែកតាពៅ សង្កាត់ដើមមៀន ក្រុងតាខ្មៅ ខេត្តកណ្តាល ។
លុះក្រោយមក ក៏ស្រាប់តែមានជនសង្ស័យម្នាក់ បានធ្វើសកម្មភាពលួចម៉ូតូ រួចបានអូសចេញបាត់ទៅ។ បន្ទាប់មកជនរងគ្រោះបានមកដាក់ពាក្យបណ្តឹង នៅប៉ុស្តិ៍ដើមមៀន ដើម្បីអោយសមត្ថកិច្ចចុះស្រាវជ្រាវ ឆែកកាមេរ៉ាសុវត្ថិភាព រួចមកក៏បានឃើញជនសង្ស័យចំនួន០២នាក់ ដោយម្នាក់ឈ្មោះតឿ ភេទប្រុស អាយុ២៥ឆ្នាំ ជាអ្នកធ្វើសកម្មភាពលួចម៉ូតូអូសចេញទៅ និងម្នាក់ទៀតឈ្មោះរស់ ភក្តី ភេទប្រុស អាយុ៣៤ឆ្នាំ ជាអ្នកមើលផ្លូវ ។
ក្រោយពិនិត្យកាមេរ៉ាសុវត្ថិភាពរួចហើយ ជនរងគ្រោះក៏បានដាក់ពាក្យបណ្តឹងចោទប្រកាន់ជនសង្ស័យចំនួន២នាក់ខាងលើ ដោយចោទឈ្មោះតឿ ជាអ្នកលួច និងឈ្មោះរស់ ភក្តី ជាអ្នកសមគំនិត ហើយអោយសមត្ថកិច្ចប៉ុស្តិ៍ដើមមៀនចុះឃាត់ខ្លួនឈ្មោះរស់ ភក្តី យកមកសាកសួរនៅប៉ុស្តិ៍ដើម្បីសាកសួរចាត់ការតាមនីតិវិធីតែម្តង ។
បច្ចុប្បន្ន ជនសង្ស័យកំពុងឃាត់ខ្លួនជាបណ្តោះអាសន្ននៅអធិការដ្ឋាននគរបាលក្រុងតាខ្មៅដើម្បីចាត់ការបន្តតាមនីតិវិធី ៕
ចែករំលែកព័តមាននេះ