ខេត្តកណ្តាល ៖ វាយកាប់គ្នារវាងបងប្អូនបង្កើតខ្លួនឯងក្នុងវង់ផឹកស៊ីបណ្តាលឱ្យស្លាប់ម្នាក់ ព្រោះតែរឿងមិនព្រមចាក់បទចម្រៀង ព្រាប សុវត្ថិ ។ ហេតុការណ៍នេះកើតឡើងកាលពីវេលាម៉ោង០៧ និង៣៧នាទីថ្ងៃទី១៦ កញ្ញា…
ខេត្តកណ្តាល ៖ វាយកាប់គ្នារវាងបងប្អូនបង្កើតខ្លួនឯងក្នុងវង់ផឹកស៊ីបណ្តាលឱ្យស្លាប់ម្នាក់ ព្រោះតែរឿងមិនព្រមចាក់បទចម្រៀង ព្រាប សុវត្ថិ ។ ហេតុការណ៍នេះកើតឡើងកាលពីវេលាម៉ោង០៧ និង៣៧នាទីថ្ងៃទី១៦ កញ្ញា ឆ្នាំ២០២៥ ស្ថិតនៅចំណុចភូមិព្រែកក្របៅទី២ សង្កាត់ព្រែកអំពិល ក្រុងអរិយក្សត្រ ខេត្តកណ្តាល ។
ជនរងគ្រោះដែលស្លាប់ឈ្មោះ ថាន់ សុខឃា ភេទប្រុស អាយុ៤៤ឆ្នាំ (ត្រូវជាប្អូនបង្កើតរបស់ជនសង្ស័យ) មានទីលំនៅ ភូមិព្រែកក្របៅទី២ សង្កាត់ព្រែកអំពិល ក្រុងអរិយក្សត្រ ខេត្តកណ្តាល ។ ចំណែកជនសង្ស័យមាន០២នាក់ ១-ឈ្មោះ ថាន់ ថា ភេទប្រុស អាយុ៣៩ឆ្នាំ មានទីលំនៅភូមិព្រែកក្របៅទី១ សង្កាត់ព្រែកអំពិល ក្រុងអរិយក្សត្រ ខេត្តកណ្តាល និងឈ្មោះថាន់ សុខឃឿន ភេទប្រុស អាយុ៤៦ឆ្នាំ ទីលំនៅបច្ចុប្បន្នភូមិព្រែកក្របៅទី២ សង្កាត់ព្រែកអំពិល ក្រុងអរិយក្សត្រ ខេត្តកណ្តាល (ត្រូវជាប្អូនបង្កើតរបស់សពជនរងគ្រោះ) ។
បើតាមការបញ្ជាក់ពីសមត្ថកិច្ចបានបង្ហើបឱ្យដឹងថា កាលពីវេលាម៉ោង៤ និង៣០នាទីរសៀលថ្ងៃទី១៦ ខែកញ្ញា ឆ្នាំ២០២៥ ជនសង្ស័យឈ្មោះ ថាន់ ថា បានទៅលេងផ្ទះ បងបង្កើតឈ្មោះថាន់ សុខខន ស្ថិតនៅភូមិព្រែកក្របៅទី២ សង្កាត់ព្រែកអំពិល ក្រុងអរិយក្សត្រ ពេលទៅដល់ក៏បានជួប និងបងប្អូនបង្កើតឈ្មោះ ថាន់ ឃីម ភេទប្រុស, ឈ្មោះថាន់ សុខឃា និងជនសង្ស័យឈ្មោះថាន់ សុឃឿន កំពុងអង្គុយលេងក្រោមផ្ទះ ទើបជនសង្ស័យឈ្មោះ ថាន់ ថា បានបបួលគ្នាផឹកស្រាថ្នាំផឹកជុំគ្នាជាមួយបងប្អូន ។
លុះផឹកអស់ស្រាថ្នាំចំនួន០៣លីត្រ ពួកគេក៏បានស្រវឹង បន្ទាប់មក ជនរងគ្រោះថាន់ សុខឃា ក៏បានយកទូរស័ព្ទភ្ជាប់ប្ល៊ូធូសជាមួយកូនធុងបាស់ចាក់បទចម្រៀងស្តាប់ ដោយបើកសំលេងឮៗ ជនសង្ស័យឈ្មោះ ថាន់ សុខឃឿន បានប្រាប់អោយជនរងគ្រោះឈ្មោះថាន់ សុខឃា ឱ្យចាក់តិចៗ និងចាក់បទព្រាបសុវត្ថិខ្លះទៅ ព្រោះឈ្មោះ ថាន់ ថា ចូលចិត្តស្តាប់ តែជនរងគ្រោះឈ្មោះ ថាន់ សុខឃា មិនស្តាប់កាន់តែបើកសំឡេងឮៗថែមទៀត ក៏បានធ្វើឱ្យជនសង្ស័យឈ្មោះ ថាន់ សុខឃឿន ខឹងក៏ដាល់ជនរងគ្រោះមួយដៃចំមុខធ្លាក់ពីលើគ្រែ ហើយយកជើងធាក់មុខថែមទៀត ។
ភ្លាមនោះ ជនរងគ្រោះឈ្មោះ ថាន់ សុខឃា ខឹងបានទាញកាំបិតផ្គាក់ចេញពីផ្ទះ ទៅសំដៅកាប់ចំស្មាខាងស្តាំជនសង្ស័យឈ្មោះ ថាន់ សុខឃឿន ត្រូវចំស្មាខាងស្តាំមុតជ្រៅចេញឈាម ដួលលើគ្រែ និងបានស្រែកឈ្មោះ ថាន់ ថា អោយជួយ ។ ខណៈនោះ ឈ្មោះ ថាន់ ថា ស្រែកទៅជនរងគ្រោះថា ម៉េចបានវ៉ៃបងអញចឹង រួចក៏ស្ទុះទៅទាត់ និងទាញកៅអីជ័រវាយសំដៅចំផ្នែកមុខ និងចំទ្រូង ជនរងគ្រោះឈ្មោះ ថាន់ សុខឃា រហូតសន្លប់បាត់ស្មារតីទើបឈប់វាយ ឃើញដូច្នោះជនសង្ស័ឈ្មោះ ថាន់ សុខឃឿន ទៅវាយឈ្មោះ ថាន់ សុខឃា ថែមទៀត បន្ទាប់មកទើបឈ្មោះ ពេញ ហុច ហៅស្រីនាង ( ត្រូវជាប្អូនថ្លៃ ) ក៏បានទូរស័ព្ទទៅប្តឹងសមត្ថកិច្ច ចុះអន្តរាគមន៍ដល់កន្លែងកើតហេតុ ឃាត់ខ្លួនជនសង្ស័យឈ្មោះ ថាន់ ថា មកសាកសួរនៅប៉ុស្តិ៍ ចំណែកជនសង្ស័យឈ្មោះ ថាន់ សុខឃឿន បញ្ជូនទៅសង្គ្រោះបន្ទាន់ ។
សមត្ថកិច្ចបានបញ្ជាក់ថា ក្នុងនោះ ដកហូតវត្ថុតាង កាបិតផ្គាក់ផ្លែដែក ដងឬស្សីចំនួន០១ដើម។ (ជារបស់ជនរងគ្រោះថាន់ សុខឃា ចាប់យកពីកន្លែងកើតហេតុ) និងបំណែកកៅអីជ័រ ពណ៌ក្រហមមួយចំនួន ( ចាប់យកពីជនសង្ស័យឈ្មោះ ថាន់ ថា ) ។ រីឯជនរងគ្រោះឈ្មោះ ថាន់ សុខឃា ត្រូវបានដាច់ខ្យល់ស្លាប់តាមផ្លូវ មុនពេលដឹកដល់មណ្ឌលសុខភាពព្រែកអំពិល ។
បច្ចុប្បន្ន ជនសង្ស័យ រួមទាំងវត្ថុតាងបាននាំមកកាន់អធិការដ្ឋាននគរបាលក្រុងអរិយក្សត្រ ដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ