ខេត្តមណ្ឌលគិរី ៖ សត្វស្វាស្រូវព្រៃ៩ក្បាល ត្រូវបានសមត្ថកិច្ចដកហូតពីព្រានព្រៃម្នាក់ ក្រោយធ្វើសកម្មភាពដឹកជញ្ជូនដោយខុសច្បាប់ដែលប្រតិបត្តិការនេះ ធ្វើឡើងកាលពីល្ងាចថ្ងៃទី២៥ មេសា ២០២៣ ។
ប្រភពបានឲ្យដឹងថា ខណៈដែលជនសង្ស័យធ្វើសកម្មភាពដឹកសត្វព្រៃខុសច្បាប់ កម្លាំងអាវុធហត្ថខេត្តមណ្ឌលគិរី សហការជាមួយយោធាវរសេនាតូចអន្តរាគមន៍លេខ០១ បានពួនស្ទាក់ចាប់បង្ក្រាបបាននៅចំណុចចម្ការស្វាយចន្ទីរបស់ប្រជាពលរដ្ឋ ក្នុងភូមិពូចា ឃុំស្រែព្រះ ស្រុកកែវសីមា ខេត្តមណ្ឌលគិរី ។
ប្រភពបន្តថា ករណីខាងលើ សមត្ថកិច្ចបានឃាត់ខ្លួនជនសង្ស័យម្នាក់ឈ្មោះ សន កូប ភេទប្រុស អាយុ៤៦ឆ្មាំ ទីលំនៅភូមិព្រែកក្ដី ឃុំស្នួល ស្រុកស្នួល ខេត្តក្រចេះ និងសត្វស្វាស្រូវចំនួន០៩ក្បាលម៉ូតូមួយគ្រឿង ម៉ាកហុងដា ពណ៌ខៀវលាយទឹកប្រាក់ ។
បច្ចុប្បន្ន ជនសង្ស័យត្រូវសមត្ថកិច្ចបញ្ជូនខ្លួនបញ្ជូនទៅទីបញ្ជាការកងរាជអាវុធហត្ថខេត្តមណ្ឌលគិរី ដើម្បីចាត់ការតាមនិតិវិធីច្បាប់ ៕
ចែករំលែកព័តមាននេះ