រាជធានីភ្នំពេញ៖ ថ្មីៗនេះក្រសួងសាធារណការ និងដឹកជញ្ជួនបានបង្ហាញនូវសកម្មភាពរបស់មន្ត្រីជំនាញបន្តគូសគំនូសចែកទ្រូងផ្លូវ អ៊ុតគំនូសសញ្ញាចរាចរណ៍ លុបសំបុកមាន់ និងស្តាប្រព័ន្ធលូ នៅតាមកំណាត់ផ្លូវជាតិ ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋ និងផ្តល់ភាពងាយស្រួលក្នុងការដឹកជញ្ជូនទំនិញឆ្លងកាត់។
អ្វីដែលគួរកត់សម្គាល់នោះ គឺថា ក្រសួងសាធារណការ និងដឹកជញ្ជួនបានលើកឡើងថា នៅពេលដែលមានផ្លូវល្អស្អាតហើយនោះ សុំសំណូមពរដល់បងប្អូនប្រជាពលរដ្ឋ «កុំបំពានយកដីចំណីផ្លូវមកធ្វើអាជីកម្មដើម្បីប្រយោជន៍ផ្ទាល់ខ្លួន»។
បើនិយាយរឿងការយកដងផ្លូវ និងចិញ្ចើមផ្លូវធ្វើការលក់ដូរចល័ត អចល័ត និងសម្រាប់ប្រើជាចំណតឡានឱ្យភ្ញៀវចូលហាង ឬអាជីវកម្មផ្សេងៗគឺ សឹងតែក្លាយជាជំងឺមហារីកទៅហើយ។ ជាក់ស្តែងនៅតាមដងផ្លូវមួយចំនួនធំនៅរាជធានីភ្នំពេញ និងនៅតាមទីប្រជុំជននៃបណ្តាខេត្ត ឃើញមានបងប្អូនប្រជាពលរដ្ឋខ្លះ បាននិងកំពុងរំលោ.ភយកចំណីផ្លូវធ្វើការលក់ដូរ មិនថាជា លក្ខណៈដូរតាមរទេះ ឬ រឺម៉ក់ចល័ត ឬការតាំងលក់ដូរផ្សេងលើចិញ្ចឹមផ្លូវ ខណៈមានអាជីវកម្មខ្លះក៏បានយកដីចំណីផ្លូវធ្វើជាចំណតសម្រាប់អាហារដ្ឋាន ឬអាជីវកម្មរបស់ខ្លួន ។ ដូច្នេះហើយ សម្រាប់អ្នកថ្មើរជើង គឺពិតជាពិបាកណាស់ ក្នុងការរកកន្លែងមានសុវត្ថិភាពសម្រាប់ការធ្វើដំណើរថ្មើរជើង។
រឿងរំដោះចិញ្ចើមផ្លូវ ត្រូវបានគេមើលឃើញថា សមត្ថកិច្ចបានធ្វើជាបន្តបន្ទាប់ តែបានត្រឹម «វែកចក» ព្រោះមិនបានប៉ុន្មានថ្ងៃផង កន្លែងដដែលនោះនឹងមានការលក់ដូរលើចិញ្ចើមផ្លូវវិញជាដដែល។ តួយ៉ាងនៅមុខមន្ទីរពេទ្យរុស្ស៊ី តាមបណ្តោយផ្លូវវេងស្រេង ពិសេសម្តុំស្តុបលូប្រាំ និងតាមដងផ្លូវផ្សេងៗទៀត គឺសឹងតែគ្មានចិញ្ចើមផ្លូវនៅទំនេរសម្រាប់អ្នកថ្មើរជើងនោះទេ ។ ការពិតទៅ បើស្រុះដៃគ្នាចូលរួមលុបបំបាត់ការរំលោ.ភយក «ដីចំណីផ្លូវមកធ្វើអាជីកម្មដើម្បីប្រយោជន៍ផ្ទាល់ខ្លួន» គឺអាចធ្វើបាន បើសិនជាបងប្អូនយើងម្នាក់ៗកាត់បន្ថយភាពអាត្មានិយមតែបន្តិច និងគិតគូររៀបចំចំណតសម្រាប់រថយន្ត និងម៉ូតូតាមទីអាជីវកម្មរៀងៗខ្លួនបានត្រឹមត្រូវនោះ។
យ៉ាងណាមិញ ក្រសួងសាធារណការនិងដឹកជញ្ជួន កាលពីថ្ងៃទី១៧ ខែមេសាម្សិលមិញនេះ បានបង្ហោះសារ និងរូបភាពលើផេករបស់ខ្លួន ដោយបញ្ជាក់ថា គិតចាប់ពីថ្ងៃទី ៦-១៦ ខែមេសា ឆ្នាំ២០២៣ ក្រុមការងារបច្ចេកទេស នៃមន្ទីរសាធារណការ និងដឹកជញ្ជូននៅរាជធានី-ខេត្តចំនួន ៨ ដូចជា ខេត្តកែប បាត់ដំបង កំពង់ចាម ព្រះវិហារ បន្ទាយមានជ័យ រតនគិរី ត្បូងឃ្មុំ និងរាជធានីភ្នំពេញ បានខិតខំប្រឹងប្រែងយកចិត្តទុកដាក់យ៉ាងសកម្ម ដោយបានចុះគូសគំនូសចែកទ្រូងផ្លូវ អ៊ុតគំនូសសញ្ញាចរាចរណ៍ លាបថ្នាំបង្គោលគីឡូម៉ែត្រ ប៉ះចិញ្ចើមផ្លូវ លុបសំបុកមាន់ និងធ្វើប្រព័ន្ធលូ លើកំណាត់ផ្លូវជាតិមួយចំនួនរួមមាន៖ ផ្លូវលេខ៣៣A លេខ៥ លេខ៥៧B លេខ៥៧B២ លេខ៧ លេខ៧០ លេខ៧១ លេខ៥ លេខ៦ លេខ៥៦D លេខ៧៦ លេខ៧៨ លេខ៧៨-៥ លេខ៨ លេខ៧២ ដោយបានបន្តការជួសជុលថែទាំ ដើម្បីជួយសម្រួលដល់ការធ្វើដំណើររបស់បងប្អូនប្រជាពលរដ្ឋ ផ្តល់ភាពងាយស្រួលក្នុងការដឹកជញ្ជូនទំនិញឆ្លងកាត់ និងចំណេញពេលវេលា។
«ទន្ទឹមនឹងផ្លូវថ្នល់ស្អាតល្អ សូមបងប្អូនប្រជាពលរដ្ឋ កុំបំពានយកដីចំណីផ្លូវមកធ្វើអាជីកម្មដើម្បីប្រយោជន៍ផ្ទាល់ខ្លួន ជៀសវាងការចាក់ដីខ្ពស់ជាងផ្លូវ និងកុំដឹកទំនិញលើសទម្ងន់ ដើម្បីរក្សាផ្លូវថ្នល់ឱ្យមានភាពល្អប្រសើរ និងអាចប្រើប្រាស់បានយូរអង្វែង»។ នេះជាការស្នើសុំក្រសួងជំនាញ។
បន្ថែមពីលើនេះ ក្រសួងបានអំពាវនាវផងដែរថា ប្រសិនបើមានបញ្ហាផ្លូវថ្នល់ខូចខាតក្លាយជាជង្ហុកសំបុកមាន់ សូមបងប្អូនប្រជាពលរដ្ឋទាញយកកម្មវិធីថែទាំផ្លូវ (Road Care) និងរាយការណ៍មកក្រសួងដើម្បីអាចចាត់ក្រុមការងារចុះជួសជុល ថែទាំបានទាន់ពេលវេលា៕
ចែករំលែកព័តមាននេះ