ការលក់កូនជ្រូក នាពេលបច្ចុប្បន្ន ហាក់កាន់តែសម្បូរឡើង មិនថា នៅរាជធានីភ្នំពេញ ឬនៅតាមបណ្តាខេត្តនោះទេ ពោលគឺរបរមួយនេះដូចជាមានការពេញនិយម ព្រោះកូនជ្រូកសម្រាប់ដាក់សន្សំលុយនាពេលបច្ចុប្បន្ន គេតែងតែរិះរកអ្វីដែលថ្មី ដូចជាគេអាចធ្វើអោយចេញជារូបរាងផ្សេងៗ ដូចជា
រាជធានីភ្នំពេញ ៖ ការលក់កូនជ្រូក នាពេលបច្ចុប្បន្ន ហាក់កាន់តែសម្បូរឡើង មិនថា នៅរាជធានីភ្នំពេញ ឬនៅតាមបណ្តាខេត្តនោះទេ ពោលគឺរបរមួយនេះដូចជាមានការពេញនិយម ព្រោះកូនជ្រូកសម្រាប់ដាក់សន្សំលុយនាពេលបច្ចុប្បន្ន គេតែងតែរិះរកអ្វីដែលថ្មី ដូចជាគេអាចធ្វើអោយចេញជារូបរាងផ្សេងៗ ដូចជា បន្លែ ផ្លែឈើ រូបតុក្កតា រូបសត្វ ឬអ្វីៗផ្សេងៗជាច្រើនទៀត។ ពោលគឺទៅតាមភាពច្នៃប្រឌិតរបស់ជាង ក្នុងការផលិតចេញមកថា តើរូបភាពបែបណា ទើបអាចទាក់ទាញមនុស្សបាន?។
ប្រាកដណាស់ បងប្អូនប្រិយមិត្តធ្លាប់តែទិញកូនជ្រូកសម្រាប់សន្សំលុយ តែមិនដែលដឹងអំពីការធ្វើនោះទេ ហើយក៏មានបងប្អូនជាច្រើនដែលតែងតែបារម្ភផងដែរ ទាក់ទងនឹងកូនជ្រូកដុះផ្សិត និងបញ្ហាផ្សេងៗដែលប៉ះពាល់ដល់លុយ ដោយនេះអាចថា ជាចំណុចសំខាន់មួយសំខាន់ដែលបងប្អូនប្រិយគួរដឹង និងដើម្បីច្រៀសវាងបញ្ហាផ្សេងៗដែលនាំអោយខាតបង់។
តាមរយៈបទសម្ភាសន៍ជាមួយសារព័ត៌មានកោះសន្តិភាព ដោយថ្ងៃនេះ លោក អាន សុខអ៊ាង នឹងធ្វើការចែករំលែកពីបទពិសោធន៍របស់លោកអោយបងប្អូនមហាជនបានដឹង ជាពិសេសគឺបញ្ហាកូនជ្រូកដុះផ្សិតតែម្តង ព្រោះបញ្ហាមួយនេះ កើតមានឡើងជាញឹកញាប់ ចំពោះបងប្អូនយើង។ ដូច្នេះ ប្រសិនបើលោកអ្នកបានមើលវីដេអូមួយនេះ ប្រាកដជាអាចចៀសវាងពីបញ្ហាខាងលើជាក់ជាពុំខាន។
លោក អាន សុខអ៊ាង ដែលជាអ្នកធ្វើកូនជ្រូកសម្រាប់ដាក់លុយ បានជម្រាបជូនថា កូនជ្រូកដែលមានបញ្ហា គឺបណ្តាលមកពីការលាយទឹក និងម្សៅម្នាងសិលាមិនបានត្រឹមត្រូវ ដោយម្សៅលាយចាក់ក្នុងពុម្ពនោះអាចខូច ឬងា.ប់ ដោយខ្វះបច្ចេកទេស ចំណេះជំនាញ ជាពិសេសអ្នកដែលមិនបានឆ្លងកាត់របរនេះ និងគ្មានបទពិសោធន៍គ្រប់គ្រាន់ក្នុងការធ្វើវា ដូច្នេះទើបបានជាខាងក្នុងសើម ហើយនៅពេលដាក់លុយទៅ អាចធ្វើអោយលុយដុះផ្សិត និងបញ្ហាផ្សេងៗ។
លោក អាន សុខអ៊ាង ដែលជាក្មេងកំព្រាឪពុកតាំងពីក្មេង បានបន្តថា លោកចាប់អាជីពមួយនេះ ប្រមាណជា៩ឆ្នាំហើយចាប់តាំងពីឆ្នាំ២០១៤មក ដោយលោកចេះរបរមួយនេះ តាមរយៈអ៊ុំរបស់លោក។ ដើមដំបូងឡើយ លោករស់នៅជាមួយអ៊ុំរបស់លោក ដែលជាអ្នកលក់ក្អមធ្វើពីដីឥដ្ឋ ហើយលោកក៏រៀនចេះពីអ៊ុំ រួចបែកគំនិតសាកល្បងធ្វើកូនជ្រូកពីម្សៅម្នាងសិលា ដោយលោកគិតថា វាថ្មីហើយប្លែក និងមានភាពងាយស្រួលក្នុងការរកវត្ថុធាតុដើម ដោយមិនបាច់រកមកពីខាងក្រៅ។ លោកបន្ថែមថា ការធ្វើឡើងពីម្សៅម្នាងសិលានេះ យើងអាចលាបពណ៌ និងបាញ់ពណ៌ផ្សេងៗបាន ដោយលៃលោកយ៉ាងណា ធ្វើទៅអោយសម និងស្រស់ស្អាត ជាពិសេសគឺគុណភាពតែម្តង។
បើក្រឡេកមកមើលពីរបៀបធ្វើវិញ លោកបរៀបរាប់ថា មុនដំបូងឡើយ យើងត្រូវលាយទឹក និងម្សៅម្នាងសិលា ដោយត្រូវយកចិត្តទុកដាក់ជាទីបំផុត ជាពិសេសការលាយ និងការចាក់ពុម្ពត្រូវប្រុងប្រយ័ត្នជាទីបំផុត ព្រោះម្សៅវាអាចងា.ប់ ឬខូច ដោយយើងត្រូវពឹងផ្អែកលើបច្ចេកទេសជាចម្បង។ បន្ទាប់ពីការចាក់ពុម្ពរួច ប្រមាណជា៥នាទី យើងអាចចាក់ចេញពីពុម្ពបាននៅពេលវាស្ងួត ដូច្នេះពេលវាស្ងួតល្អហើយ យើងអាចយកហាលថ្ងៃ បន្តទៀតយើងយកវាមកខាត់ រួចបាញ់ពណ៌ជាការស្រេច ដោយធ្វើយ៉ាងណាអោយវាស្ងួតល្អ ទើបពុំមានបញ្ហាដុះផ្សិត។
លោកបន្តទៀតថា លើសពីនេះ ប្រសិនបើជ្រូករបស់លោកខូច ឬមានបញ្ហានៅខាងក្នុង លោកគឺមិនលក់អោយអតិថិជនរបស់លោកឡើយ ព្រោះអាចថា វាមានបញ្ហាខាងក្នុងអាចមានសភាពសើម និងបង្កជាបញ្ហាផ្សិតជាដើម ដូច្នេះលោកគិតពីគុណភាពជាចម្បង ជាជាងការលក់តម្លៃធូរថ្លៃ តែគុណភាពមិនល្អ។
លោក អាន សុខអ៊ាង មានវ័យ២៦ឆ្នាំរូបនេះ ពោលបន្តថា លោកមានលក់កូនជ្រូកជាច្រើនប្រភេទ ដូចជាកូនជ្រូកធ្វើរូបរាងជា ទន្សាយ គោ សេះ ល្ពៅ ឃ្លោក ត្រប់ ជ្រូក និងរូបរាងផ្សេងៗជាច្រើនទៀត។ លោក អាន សុខអ៊ាង ដែលជាអ្នកធ្វើបានបន្តថា ជាទូទៅលោកបែងចែកកូនជ្រូកជា៣ប្រភេទ ដោយទំហំតូច កណ្តាល និងធំ។ ហើយកូនជ្រូកតូចៗ មានតម្លៃត្រឹមតែ ៣០០០រៀលតែប៉ុណ្ណោះ រីឯទំហំកណ្តាល ១៥០០០រៀល និងខ្នាតធំមានតម្លៃចាប់ពី ៥០០០០រៀល រហូតដល់ ៧០០០០រៀល។
លោកបន្តថា កូនជ្រូករបស់លោកមានលក្ខណៈពិសេសត្រង់ថា ដាក់លុយខ្មែរក៏បាន លុយដុល្លារក៏បាន ដោយបងប្អូនមិនបាច់ព្រួយបារម្ភថា មានបញ្ហាដុះផ្សិត ឬសើមនោះឡើយ។ ជាចុងក្រោយ លោកពិតជាអគុណខ្លាំងណាស់ សម្រាប់ការគាំទ្រកូនជ្រូករបស់លោក ដោយលោកសូមអោយបងប្អូនខ្មែរជួយគាំទ្រផលិតផលក្នុងស្រុក ដូចជាគាំទ្រស្នាដៃកូនខ្មែរ ដើម្បីកាត់បន្ថយការនាំចូល ដើម្បីអោយបងប្អូនដែលជាអ្នកធ្វើកូនជ្រូក មានទឹកចិត្តបន្តក្នុងការធ្វើវាបន្តទៅទៀត៕ ដោយ ៖ លីហួ គីមឆាយ
ចែករំលែកព័តមាននេះ