រាជធានីភ្នំពេញ៖ ក្មេងស្រី២នាក់បានប្រទះឃើញជីតារបស់ខ្លួនដែលមានជំងឺលើសឈាមច្រើនឆ្នាំមកហើយនោះ ដេកស្លាប់នៅក្នុងបន្ទប់ទឹកក្នុងផ្ទះល្វែង ក៏ស្រែកឆោឡោបង្កឲ្យមានការភ្ញាក់ផ្អើលដល់អ្នកជិតខាងនាំគ្នាទៅសែងចេញក្រៅ ។ បន្ទាប់មកបានហៅគ្រូពេទ្យនៅជិតនោះឲ្យជួយពិនត្យមើល ក្រែងមិនទាន់ស្លាប់ដើម្បីបញ្ជូនគាត់ទៅសង្គ្រោះបន្ទាន់នៅមន្ទីរពេទ្យណាមួយ ប៉ុន្តែខណៈនោះគ្រូពេទ្យបានប្រាប់ច្បាស់ៗថា បុរសនោះបានស្លាប់បាត់ទៅហើយ ។
ហេតុការណ៍នោះបានកើតឡើងបង្កឲ្យមានការភ្ញាក់ផ្អើល កាលពីវេលាម៉ោង១រសៀល ថ្ងៃទី៧ ខែឧសភា ឆ្នាំ២០២៦ នៅក្នុងផ្ទះល្វែងគ្មានលេខស្ថិតនៅតាមផ្លូវបេតុង ភូមិថ្នល់បំបែក សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
បុរសដែលស្លាប់នោះឈ្មោះពឹន ប៉ុនលាង អាយុ៦៣ឆ្នាំ ស្នាក់នៅក្នុងផ្ទះល្វែងកើតហេតុខាងលើ បើតាមក្រុមគ្រួសារគាត់ប្រាប់ថាគាត់មានជំងឺលើសឈាមប្រចាំការយូរមកហើយ ដោយឡែកការស្លាប់នេះសង្ស័យបណ្ដាលមកពីជំងឺលើសឈាមនេះឯង ។
សមត្ថកិច្ចបានប្រាប់ឲ្យដឹងថា នៅមុនពេលកើតហេតុបុរសនោះនៅផ្ទះម្នាក់ឯង ដោយប្រពន្ធគាត់ជាប់រវល់ចេញទៅក្រៅមិនបាននៅផ្ទះនោះទេ ក្រោយមកពុំដឹងថា គាត់ដួលស្លាប់តាំងពីពេលណាមកនោះទេ ។ រហូតដល់ពេលកើតហេតុ មានចៅស្រីរបស់គាត់ម្នាក់អាយុជាង១០ឆ្នាំ និងម្នាក់ទៀតអាយុប្រមាណក្រោម១០ឆ្នាំម្នាក់ បានដើរទៅមើល ស្រាប់តែឃើញគាត់ដួលដេកនៅក្នុងបន្ទប់ទឹកក្នុងផ្ទះនោះបាត់ទៅហើយ ។
សមត្ថកិច្ចបានប្រាប់ឲ្យដឹងបន្តថា ខណៈនោះចៅៗបានស្រែកបង្កឲ្យមានការភ្ញាក់ផ្អើលដល់អ្នកជិតខាងនាំគ្នាសែងគាត់ចេញមកក្រៅ រួចហៅគ្រូពេទ្យជួយពិនិត្យមើល ក្នុងបំណងនាំទៅសង្គ្រោះបន្ទាន់ ។ ប៉ុន្តែពេលនោះគ្រូពេទ្យបានប្រាប់ថា គាត់បានស្លាប់បាត់ទៅហើយ ទើបម្នាក់បានត្រឹមតែរន្ធត់នៅក្នុងចិត្តតែប៉ុណ្ណោះ ព្រោះអ្វីៗបានហួសពេលអស់ទៅហើយ ។
សមត្ថកិច្ចបានបញ្ជាក់ប្រាប់ឲ្យដឹងបន្ថែមថា ក្រោយពេលទទួលបានដំណឹងនោះហើយ នគរបាលប៉ុស្តិ៍ចោមចៅទី៣បានចុះទៅកាន់ទីតាំងកើតហេតុភ្លាមៗ ហើយក្រុមគ្រួសារសពមិនបានប្ដឹងផ្ដល់នោះឡើយ ព្រោះដឹងថាជនរងគ្រោះមានំងឺលើសឈាមយូរមកហើយ រួចក៏បានរៀបចំធ្វើបុណ្យសពតាមប្រពៃណី ៕
ចែករំលែកព័តមាននេះ