អ្នកជំនាញពីស្ថាប័នរដ្ឋាភិបាល បានអះអាងថា កំណើនសេដ្ឋកិច្ចរបស់ប្រទេសហាក់ចាប់ហ្វ្រាំងបន្តិច ប៉ុន្តែទោះជាយ៉ាងណាស្ថានភាពសេដ្ឋកិច្ចជារួម និងស្ថានភាពវិនិយោគនៅក្នុងប្រទេសនៅតែបន្តវិជ្ជមាន ។ នៅក្នុងវេទិកាវិនិយោគកម្ពុជា ឆ្នាំ២០២៦ ដែលរៀបចំនៅថ្ងៃទី៧ ខែឧសភា…
អ្នកជំនាញពីស្ថាប័នរដ្ឋាភិបាល បានអះអាងថា កំណើនសេដ្ឋកិច្ចរបស់ប្រទេសហាក់ចាប់ហ្វ្រាំងបន្តិច ប៉ុន្តែទោះជាយ៉ាងណាស្ថានភាពសេដ្ឋកិច្ចជារួម និងស្ថានភាពវិនិយោគនៅក្នុងប្រទេសនៅតែបន្តវិជ្ជមាន ។
នៅក្នុងវេទិកាវិនិយោគកម្ពុជា ឆ្នាំ២០២៦ ដែលរៀបចំនៅថ្ងៃទី៧ ខែឧសភា ឆ្នាំ២០២៦ លោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានអះអាងថា កម្ពុជាក៏ដូចជា ប្រទេសនានាបានប្រឈមមុខនឹងបញ្ហាជាច្រើន រួមទាំងបញ្ហាពន្ធបដិការ សង្គ្រាមនៅអ៊ុយក្រែន ជម្លោះព្រំដែន និងបញ្ហាវិបត្តិថាមពល ដែលកើតពីសង្គ្រាមនៅមជ្ឈឹមបូព៌ាជាដើម ប៉ុន្តែទោះជាយ៉ាងណាកម្ពុជា នៅតែបន្តរក្សាស្ថានភាពមួយដ៏វិជ្ជមាន ។
លោកបានអះអាងថា នៅក្នុងរយៈពេល៤ខែ នៃឆ្នាំ២០២៦នេះ ក្រុមប្រឹក្សាអភិវឌ្ឈន៍កម្ពុជាអាច អនុម័តគម្រោងវិនិយោគចំនួន១៨៤គម្រោង ដែលមានតម្លៃ ២,៦ ពាន់លានដុល្លារ ។
ឯកឧត្តម ស៊ុន ចាន់ថុល បានបញ្ជាក់ជាថ្មីនូវការប្តេជ្ញាចិត្តរបស់រដ្ឋាភិបាល ក្នុងការរក្សាសន្ទុះនេះ ដោយបន្តលើកកម្ពស់បរិយាកាសដែលអំណោយផលដល់ការច្នៃប្រឌិត និងភាពជាដៃគូយុទ្ធសាស្ត្ររយៈពេលវែង ។
កាលពីឆ្នាំ២០២៥ កម្ពុជាបានអនុម័តគម្រោងវិនិយោគចំនួន៦៣០គម្រោង ដែលមានតម្លៃសរុបជាង ១០ពាន់លានដុល្លារ។
កម្ពុជាបានកែសម្រួលការព្យាករណ៍កំណើនសេដ្ឋកិច្ចរបស់ខ្លួនពី៥ភាគរយ មកត្រឹម៤,២ ភាគរយនៅឆ្នាំ២០២៦ ដោយសារតែផលប៉ះពាល់នៃការកើនឡើងនៃតម្លៃប្រេងឥន្ធនៈដែលបណ្តាលមកពីជម្លោះនៅមជ្ឈិមបូព៌ា និងជម្លោះព្រំដែនជាមួយប្រទេសថៃ ។
យោងតាមអ្វីដែលលើកឡើងនៅក្នុងរបាយការណ៍ស្តីអំពីក្របខ័ណ្ឌហិរញ្ញវត្ថុសាធារណៈរយៈពេលមធ្យម ឆ្នាំ២០២៧ ដល់ឆ្នាំ២០២៩ ដែលបានចេញនៅចុងខែមេសា ឆ្នាំ២០២៦ បានបង្ហាញថា ការកើនឡើងយ៉ាងខ្លាំងនូវតម្លៃប្រេង និងឧស្ម័ន បានជំរុញសម្ពាធអតិផរណា និងប៉ះពាល់ដល់គន្លងកំណើនសេដ្ឋកិច្ចរបស់កម្ពុជា ។
ប្រភពដដែលបានបន្តថា នៅក្នុងបរិបទថ្មីនេះទស្សនវិស័យកំណើនសេដ្ឋកិច្ចរបស់កម្ពុជា ត្រូវបានកែសម្រួលចុះមកត្រឹម៤,២ ភាគរយសម្រាប់ឆ្នាំ២០២៦ និង ៥ ភាគរយសម្រាប់ឆ្នាំ ២០២៧ ក៏ដូចជាមធ្យមភាគ ៥,៥ ភាគរយសម្រាប់រយៈពេលមធ្យមនៅឆ្នាំ២០២៨ និង២០២៩ ៕
ចែករំលែកព័តមាននេះ