រាជធានីភ្នំពេញ ៖ ក្រសួងមហាផ្ទៃ នៃព្រះរាជាណាចក្រកម្ពុជា ក្រសួងសន្តិសុ ខសាធារណៈ នៃសាធារណរដ្ឋប្រជាធិបតេយ្យប្រជាមានិតឡាវ និងក្រសួងនគរបាល នៃសាធារណរដ្ឋសង្គមនិយមវៀតណាម បានបង្ហាញ នូវក្តីបារម្ភរួមចំពោះការបន្តវិវត្តយ៉ាងស្មុគស្មាញ នូវបទល្មើសគ្រឿងញៀនខុសច្បាប់ អំពើជួញដូរ មនុស្ស និងបទល្មើសឆបោកតាមប្រព័ន្ធបច្ចេកវិទ្យា ។
យោងតាមសេចក្តីប្រកាសព័ត៌មាន ស្តីពីលទ្ធផល នៃកិច្ចប្រជុំថ្នាក់រដ្ឋមន្ត្រីលើកទី២ រវាងក្រសួងមហាផ្ទៃ នៃព្រះរាជាណាចក្រកម្ពុជា ក្រសួងសន្តិសុខសាធារណៈ នៃសាធារណរដ្ឋប្រជាធិបតេយ្យប្រជាមានិតឡាវ និងក្រសួងនគរបាល នៃសាធារណរដ្ឋសង្គមនិយមវៀតណាម បានលើកឡើងថា បន្ទាប់ពីទទួលបានគោលការណ៍អនុញ្ញាតដ៏ខ្ពង់ខ្ពស់របស់រាជរដ្ឋាភិបាលកម្ពុជា ក្រសួងមហាផ្ទៃ បានរៀបចំធ្វើជាម្ចាស់ ផ្ទះកិច្ចប្រជុំថ្នាក់រដ្ឋមន្ត្រី លើកទី២ ដោយមានការអញ្ជើញចូលរួមពី ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានកិច្ចប្រជុំ ឯកឧត្តម ឧត្តមសេនីយ៍ឯក វ៉ាន់ថង កងម៉ានី រដ្ឋមន្ត្រីក្រសួងសន្តិសុខសាធារណៈ នៃសាធារណរដ្ឋប្រជាធិបតេយ្យប្រជាមានិតឡាវ និងឯកឧត្តម ឧត្តមសេនីយ៍ ឯក លឿង តាមក្វាង សមាជិកការិយាល័យនយោបាយ និងជារដ្ឋមន្ត្រីក្រសួងនគរបាល នៃសាធារណរដ្ឋសង្គមនិយមវៀតណាម ដែលបានប្រព្រឹត្តទៅនាថ្ងៃទី៣០ ខែមិថុនា ឆ្នាំ២០២៦ នៅទីស្តីការក្រសួងមហាផ្ទៃ ។
ឯកឧត្តម អភិសន្តិបណ្ឌិត ស សុខា បានចាត់ទុកវត្តមានដ៏ឧត្តុង្គឧត្តមរបស់ ឯកឧត្តម រដ្ឋមន្ត្រី ទាំងពីរ ព្រមទាំងគណៈប្រតិភូជាន់ខ្ពស់ ក្នុងឱកាសនៃការចូលរួមកិច្ចប្រជុំនេះ គឺស្តែងឱ្យឃើញនូវការយកចិត្ត ទុកដាក់ខ្ពស់ចំពោះទំនាក់ទំនង និងកិច្ចសហប្រតិបត្តិការរវាងក្រសួងទាំងបី ដែលត្រូវបានបន្តពូនជ្រំ អស់រយៈពេលជាច្រើនទសវត្សរ៍ ហើយក៏ជាកម្លាំងជំរុញទឹកចិត្តយ៉ាងខ្លាំងក្លា ក្នុងការបន្តរក្សានូវប្រពៃណី នៃទំនាក់ទំនងដ៏ល្អ និងជិតស្និទ្ធរវាងភាគីទាំងបី ក្នុងបុព្វហេតុរួម នៃសុខសន្តិភាព ស្ថិរភាព និងការអភិវឌ្ឍ សម្រាប់សង្គម ជាតិ និងប្រជាជននៃប្រទេសទាំងបី កម្ពុជា-ឡាវ-វៀតណាម ។
ឯកឧត្តមអភិសន្តិបណ្ឌិត ស សុខា, ឯកឧត្តម ឧត្តមសេនីយ៍ឯក វ៉ាន់ថង កងម៉ានី និង ឯកឧត្តម ឧត្តមសេនីយ៍ឯក លឿង តាមក្វាង បានសម្តែងការអបអរសាទរ និងគាំទ្រយ៉ាងពេញទំហឹង និងវាយតម្លៃខ្ពស់ ចំពោះលទ្ធផលនៃជំនួបកំពូលរវាងប្រមុខគណបក្សដឹកនាំរដ្ឋាភិបាល និងជំនួបជាបន្តបន្ទាប់រវាងប្រមុខ រដ្ឋាភិបាលនៃប្រទេសទាំងបី ក្នុងឆ្នាំ២០២៥ និង២០២៦ ដែលបានឯក ភាពពង្រឹងពង្រីកនូវចំណងមិត្តភាព និងកិច្ចសហប្រតិបត្តិការគ្រប់ជ្រុងជ្រោយ ឈរលើស្មារតីភាពជាអ្នកជិតខាងល្អ សាមគ្គីភាព និងការ យោគយល់គ្នា ដើម្បីផលប្រយោជន៍ទៅវិញទៅមកសម្រាប់ជាតិ និងប្រជាជននៃប្រទេសទាំងបី ។
ពាក់ព័ន្ធនឹងសភាពការណ៍សកលលោក និងតំបន់ ឯកឧត្តមអភិសន្តិបណ្ឌិត ស សុខា, ឯកឧត្តម ឧត្តមសេនីយ៍ឯក វ៉ាន់ថង កងម៉ានី និង ឧត្តមសេនីយ៍ឯក ឯកឧត្តម លឿង តាមក្វាង បានធ្វើការចែករំលែក ទស្សនៈលើទិដ្ឋភាពរួម ដែលជះឥទ្ធិពលមកលើស្ថានភាពទូទៅក្នុងប្រទេសទាំងបី កម្ពុជា-ឡាវ-វៀតណាម ទាំងលើទិដ្ឋភាពសេដ្ឋកិច្ច នយោបាយ និងសន្តិសុខ ជាពិសេសបញ្ហាសង្គ្រាមរវាងរុស្ស៊ី-អ៊ុយក្រែន និង ស្ថានភាពនៅមជ្ឈិមបូព៌ាដែលបង្កផលប៉ះពាល់ធ្ងន់ធ្ងរដល់សន្តិសុខ អតិផរណា និងកំណើនសេដ្ឋកិច្ច សកល ។
ក្នុងក្របខណ្ឌការងារសន្តិសុខទូទៅផ្ទៃក្នុងប្រទេស រដ្ឋមន្ត្រីទាំងបី ក៏បានធ្វើការកត់សម្គាល់ និង បង្ហាញនូវក្តីបារម្ភរួមចំពោះការបន្តវិវត្តយ៉ាងស្មុគស្មាញនូវបទល្មើសគ្រឿងញៀនខុសច្បាប់ អំពើជួញដូរ មនុស្ស និងបទល្មើសឆបោកតាមប្រព័ន្ធបច្ចេកវិទ្យា ហើយដែលរដ្ឋាភិបាលនៃប្រទេសទាំងបីបាន និង កំពុងបង្កើនកិច្ចសហការក្នុងការបង្ការ ទប់ស្កាត់ និងបង្ក្រាប ។
ផ្សារភ្ជាប់ជាមួយបទល្មើសចម្បងៗដែលបាន កត់សម្គាល់នេះ និងក្នុងស្មារតីផ្លាស់ប្តូរព័ត៌មាន និងចែករំលែកបទពិសោធន៍ទៅវិញទៅមក តំណាង ក្រសួងទាំងបីក៏បានធ្វើបទអន្ត រាគមន៍លើប្រធានបទសំខាន់ៗចំនួន ៣ រួមមាន ស្ថានភាពនៃអំពើ ជួញដូរមនុស្សឆ្លងដែន, ការបង្ការ និងទប់ស្កាត់គ្រឿងញៀនខុសច្បាប់ និងកិច្ចសហការប្រយុទ្ធប្រឆាំង បទល្មើសឆបោកតាមប្រព័ន្ធបច្ចេកវិទ្យា ។
ជាមួយគ្នានេះ ទោះបីស្ថិតក្នុងសភាព ការណ៍ប្រឈមផ្នែកសន្តិសុខបែបនេះក្តី ភាគីទាំងបីក៏បាន សម្តែងការកោតសរ សើរ និងវាយតម្លៃខ្ពស់ចំពោះសមិទ្ធផលនៃកិច្ចសហប្រតិបត្តិការរវាងក្រសួងទាំងបី ក្នុងឆ្នាំកន្លងមក ក្នុងបេសកកម្មស្នូលនៃការថែរក្សាសន្តិសុខ សណ្តាប់ធ្នាប់ និងសុវត្ថិភាពសង្គម បម្រើដល់ ឧត្តមប្រយោជន៍រួមទៅវិញទៅមកនៃសុខសន្តិភាព ស្ថិរភាពជាតិ ការអភិវឌ្ឍ និងភាពសុខដុមរមនា សម្រាប់សង្គមជាតិ និងប្រជាជននៃប្រទេសទាំងបី កម្ពុជា-ឡាវ-វៀតណាម ។
ក្នុងឱកាសនៃកិច្ចប្រជុំនេះ ដើម្បីជំរុញអនុវត្តស្មារតីនៃកិច្ចប្រជុំថ្នាក់រដ្ឋមន្ត្រី លើកទី២ ឱ្យកាន់តែ សកម្ម និងខ្លាំងក្លាថែមទៀត អង្គប្រជុំបានអនុម័តសេចក្តីប្រកាសរួម ដែលគូសបញ្ជាក់អំពីការប្តេជ្ញាចិត្ត ទៅលើកិច្ចការសំខាន់ៗមួយចំនួន រួមមាន៖
១- ការពង្រឹងទំនុកចិត្តនយោបាយ និងការគោរពអធិបតេយ្យគ្នាទៅវិញទៅមក ដើម្បីថែរក្សា សន្តិភាពប្រទេសទាំងបី និងស្ថិរភាពតំបន់ ព្រមទាំងសណ្តាប់ធ្នាប់ក្នុងតំបន់ផ្អែកលើច្បាប់ អធិបតេយ្យ ឯករាជ្យ បូរណភាពទឹកដី និងដោះស្រាយវិវាទដោយសន្តិវិធី ។
២- ការលើកកម្ពស់កិច្ចសហប្រតិបត្តិការសន្តិសុខ និងការឆ្លើយតបចំពោះការគំរាមកំហែងនានា ដោយសហការគ្នាទប់ស្កាត់ឧក្រិដ្ឋកម្មឆ្លងដែនគ្រប់ទម្រង់ ជាអាទិ៍ អំពើភេរវកម្ម អំពើជួញដូរ មនុស្ស គ្រឿងញៀនខុសច្បាប់ អាវុធខុសច្បាប់ បទល្មើសឆបោកតាមប្រព័ន្ធបច្ចេកវិទ្យា ព័ត៌មានក្លែងក្លាយ អន្តោប្រវេសន៍ខុសច្បាប់ និងបញ្ហាប្រឈមមិនប្រពៃណីផ្សេងៗ ដូចជា ជំងឺរាតត្បាត និងគ្រោះធម្មជាតិជាដើម ព្រមទាំងសហការផ្លាស់ប្តូរព័ត៌មានដើម្បីបង្ការ ទប់ស្កាត់ សកម្មភាពបំផ្លិចបំផ្លាញសន្តិសុខ ប្រឆាំងបដិវត្តពណ៌ និងការបំបែកបំបាក់សាមគ្គីភាពរវាង ប្រទេសទាំងបី ។
៣- ការលើកកម្ពស់កិច្ចសហប្រតិបត្តិការ និងការអភិវឌ្ឍតាមព្រំដែន ដោយសហការរក្សាព្រំដែន សន្តិភាព សំដៅអភិវឌ្ឍសហគមន៍ និងលើកកម្ពស់ទំនាក់ទំនងរវាងប្រជាជន និងប្រជាជន នៅតាមខេត្តជាប់ព្រំដែន ស្របតាមច្បាប់ជាតិ ព្រមទាំងពង្រឹងយន្តការទំនាក់ទំនងគាំទ្រដល់ ការកសាងសមត្ថភាព និងការសម្របសម្រួលដល់មន្ត្រីជួរមុខនៅតាមព្រំដែនឱ្យបំពេញភារកិច្ច ប្រកបដោយប្រសិទ្ធភាព ។
៤- ការពង្រឹងមិត្តភាព និងផ្លាស់ប្តូរបទពិសោធ ដោយធ្វើការផ្លាស់ប្តូរទស្សនកិច្ច និងការហ្វឹកហាត់ បច្ចេកទេស ដើម្បីពង្រឹងសមត្ថភាព និងលើកកម្ពស់សាមគ្គីភាព តាមរយៈការរៀបចំកម្មវិធី វប្បធម៌ កីឡា ការបណ្តុះបណ្តាល និងការសិក្សាស្រាវជ្រាវ ជាពិសេសក្នុងចំណោមយុវជន និងមន្ត្រីអនុវត្តច្បាប់បន្តវេន ។
តាមការគ្រោងទុក កិច្ចប្រជុំថ្នាក់រដ្ឋមន្ត្រី លើកទី៣ នឹងត្រូវប្រារព្ធធ្វើនៅសាធារណរដ្ឋប្រជាធិបតេយ្យ ប្រជាមានិតឡាវ ដែលក្រសួងសន្តិសុខសាធារណៈឡាវនឹងធ្វើជាម្ចាស់ផ្ទះ និងជាប្រធាននៃកិច្ចប្រជុំ ៕
ចែករំលែកព័តមាននេះ