សហរដ្ឋអាមេរិក-ចិន ៖ ផ្ទុះភាពតានតឺងខាងពាណិជ្ជកម្មជាថ្មី រវាងសហរដ្ឋអាមេរិក និងចិនទាក់ទិននឹងប្រេងអ៉ីរ៉ង់។ ក្រុងប៉េកាំងបានឆ្លៀតឱកាសសង្ក្រាមនៅមជ្ឈឹមបូព៌ាយកធ្វើជាអាវុធប្រឆាំងបណ្ដាទណ្ឌកម្មសេដ្ឋកិច្ចអាមេរិក ដែលអាចនាំឲ្យប៉ះពាល់ដល់ពាណិជ្ជកម្មពិភពលោក។ ចិនបានប្រើប្រាស់ជាលើកដំបូង កាលពីថ្ងៃទី២ ឧសភា…
សហរដ្ឋអាមេរិក-ចិន ៖ ផ្ទុះភាពតានតឺងខាងពាណិជ្ជកម្មជាថ្មី រវាងសហរដ្ឋអាមេរិក និងចិនទាក់ទិននឹងប្រេងអ៉ីរ៉ង់។ ក្រុងប៉េកាំងបានឆ្លៀតឱកាសសង្ក្រាមនៅមជ្ឈឹមបូព៌ាយកធ្វើជាអាវុធប្រឆាំងបណ្ដាទណ្ឌកម្មសេដ្ឋកិច្ចអាមេរិក ដែលអាចនាំឲ្យប៉ះពាល់ដល់ពាណិជ្ជកម្មពិភពលោក។
ចិនបានប្រើប្រាស់ជាលើកដំបូង កាលពីថ្ងៃទី២ ឧសភា ច្បាប់មួយ ដែលតម្រូវឲ្យបណ្ដាសហគ្រាសចិនធ្វើមិនដឹងមិនឮដល់បណ្ដាទណ្ឌកម្មអាមេរិកប្រឆាំងពួកគេ។ ដោយអនុវត្តច្បាប់អនុម័តកាលពីឆ្នាំ២០២១ មានឈ្មោះថា ច្បាប់ទម្លុះទណ្ឌកម្មខាងក្រៅដែនដីចិន រោងចក្រចម្រាញ់ប្រេងកាតចិន៥ បានទទួលបទបញ្ជាឲ្យធ្វើខ្លួនដូចជាពួកគេមិនស្ថិតក្នុងបញ្ជីខ្មៅអាមេរិក ។
ចាប់តាំងពី១ឆ្នាំមកហើយក្រុងវ៉ាស៊ីនតោនបានសម្រេចបង្កើនការគាបសង្កត់ លើការនាំចូលប្រេងរបស់ចិនពីអ៉ីរ៉ង់។ កាលពីខែមីនាឆ្នាំ២០២៥ អាមេរិកបានដាក់ទណ្ឌកម្មរួចហើយលើរោងចក្រចម្រាញ់ប្រេងកាតចិនចំនួន៤ ដោយចោទប្រកាន់ថានាំចូលប្រេងឆៅអ៉ីរ៉ង់ ។ រដ្ឋការលោកត្រាំទើបបន្ថែមកាលពីថ្ងៃទី២៨មេសា រោងចក្រចម្រាញ់ប្រេងកាតចិនHENGLI PETROCHEMICAL ទៅក្នុងបញ្ជីនោះ។ ក្រសួងរតនាគារអាមេរិកចោទប្រកាន់រោងចក្រចម្រាញ់ប្រេងកាតទាំងនោះថា ជួយផ្គត់ផ្គង់ខាងហិរញ្ញវត្ថុ ដល់ភេរវកម្ម និងកម្មវិធីនុយក្លេអ៊ែរអ៉ីរ៉ង់ដោយទិញប្រេងយ៉ាងច្រើនពីអ៉ីរ៉ង់។
លើកនេះ ចិនតបតវិញប្រើច្បាប់ទម្លុះការរាំងខ្ទប់ដោយតម្រូវឲ្យបណ្ដាភាគីដែលទាក់ទិនដូចជាបណ្ដាធនាគារ ក្រុមហ៊ុនផ្គត់ផ្គង់ ក្រុមហ៊ុនធានារ៉ាប់រងឬអតីថិជន ឲ្យបន្តរកស៊ីជាមួយបណ្ដាក្រុមហ៊ុនចិនដែលរងទណ្ឌកម្មអាមេរិក ។ ចិនយល់ឃើញថា ពេលវេលាមកដល់ហើយ ដើម្បីចេញដំណើរឲ្យបានលឿនក៏ព្រោះតែចិនយល់ឃើញថា មិនអាចបណ្ដោយឲ្យគេដាក់ទណ្ឌកម្មលើក្រុមហ៊ុនចម្រាញ់ប្រេងកាត HENGLI PETROCHEMICALទៀតឡើយ។
ក្រុមហ៊ុននោះ ជាក្រុមហ៊ុនមេដែលមានសាខារោងចក្រចម្រាញ់ប្រេងការឯករាជ្យធុនតូច ប្រមាណជា១០០ឯណោះ ។ ដោយមិនបិទផ្ទុយទៅវិញ ចិនសម្រេចឲ្យក្រុមហ៊ុនចម្រាញ់ប្រេងកាតតូចៗទាំងនោះមិនត្រឹមចម្រាញ់ប្រេងទេ តែអាចនាំចូលប្រេងដោយខ្លួនឯងទៀតផង។ ក្រុមហ៊ុនទាំងនេះក្លាយជាឧបករណ៍ចម្បងមួយដើរទិញប្រេងពីគ្រប់កន្លែងរសើបដូចជាវេណេស៊ុយអេឡានិងអ៉ីរ៉ង់ជាដើម នាំឲ្យអាមេរិកមានការខឹងសម្បាយ៉ាងខ្លាង ៕
ចែករំលែកព័តមាននេះ