ក្រោយផ្ទុះការគាំទ្រខ្លាំង Thiago ប្ដូរផ្ដាច់បង្ហាញ«គុនខ្មែរ»ទៅកាន់ពិភពលោក
- ភ្នំពេញ
រាជធានីភ្នំពេញ ៖ ក្រោយផ្ទុះការគាំទ្រខ្លាំងពីសំណាក់ប្រជាជនកម្ពុជា និងការមិនផ្ដល់
រាជធានីភ្នំពេញ ៖ ក្រោយផ្ទុះការគាំទ្រខ្លាំងពីសំណាក់ប្រជាជនកម្ពុជា និងការមិនផ្ដល់តម្លៃពីសំណាក់ស្ថាប័នប្រដាល់ថៃ WMO-World MuayThai Organization អ្នកប្រដាល់ជើងខ្លាំងសញ្ជាតិប្រេស៊ីល Thiago Teixeira ប្តេជ្ញាថា នឹងប្រឹងប្រែងជួយផ្សព្វផ្សាយគុនខ្មែរទៅកាន់ពិភពលោកតាមដែលអាចធ្វើទៅបាន។
នេះបើតាមការបញ្ជាក់របស់កីឡាកររូបនេះក្នុងសន្និសីទសារព័ត៌មានជុំវិញ រឿងរ៉ាវស្ថាប័ន
ប្រដាល់ WMO ដកហូតខ្សែក្រវាត់ដែលឈ្នះនៅប្រទេសអាល្លឺម៉ង់ កាលពីពេលថ្មីៗនេះ ។
ក្នុងសន្និសីទសារព័ត៌មានកាលពីថ្ងៃទី៨ខែមេសា ឆ្នាំ២០២៣ នៅសណ្ឋាគារសុខាភ្នំពេញ Thiago Teixeira បានប្រកាសគោលជំហរជាក់លាក់ថា ខ្លួនស្រឡាញ់ប្រទេសកម្ពុជា ស្រឡាញ់អ្នកគាំទ្រនៅកម្ពុជា ។ លោកថា ការប្រកួតនៅម៉ាឡេស៊ី នាខែឧសភា ខាងមុខនេះ គឺវាយតំណាង«គុនខ្មែរ»។ លោកនិយាយថា៖«កម្ពុជា ជាផ្ទះរបស់ខ្ញុំ ។ ខ្ញុំប្តេជ្ញាបង្ហាញគុនខ្មែរទៅកាន់ពិភពលោក និងសន្យាថា នឹងប្រឹងប្រែងនាំគុនខ្មែរទៅកាន់ប្រទេសកំណើតរបស់ខ្លួនផងដែរ»។
គួរបញ្ជាក់ថា សន្និសីទសារព័ត៌មានទាក់ទងនឹងស្ថាប័នប្រដាល់ WMO ដកហូតខ្សែក្រវាត់ និងហាមប្រាមកីឡាករ Thiago មិនឱ្យប្រកួតនៅក្នុងព្រឹត្តិការណ៍WMO នេះធ្វើឡើង ក្រោយសម្តេចតេជោនាយករដ្ឋមន្ត្រី ហ៊ុន សែន ផ្តល់ប្រាក់ឧបត្ថម្ភចំនួន២ម៉ឺនដុល្លារអាមេរិក និងគ្រោងស្នើព្រះមហាក្សត្រ ប្រទានសញ្ជាតិខ្មែរដល់អ្នកប្រដាល់Thiagoផងដែរ។
តាមតេឡេក្រាមកាលពីថ្ងៃទី៨ មេសា សម្តេចតេជោ ហ៊ុន សែន បានមានប្រសាសន៍ថា
«ដើម្បីជាការលើកទឹកចិត្ត ខ្ញុំសូមចូលរួមជួយឧបត្ថម្ភដល់កីឡាករប្រដាល់ Thiago Teixeira
សញ្ជាតិប្រេស៊ីល នូវថវិកាចំនួន២០,០០០ដុល្លារ ។ មួយវិញទៀត ប្រសិនបើមិនខុសទាស់ផ្នែកផ្លូវច្បាប់ណាមួយរបស់ប្រេស៊ីល ខ្ញុំនឹងស្នើទៅព្រះមហាក្សត្រ ដើម្បីផ្តល់សញ្ជាតិខ្មែរជូនកីឡាករ Thiago» ។
ក្រៅពីទទួលការគាំទ្រពីសម្តេចតេជោ កីឡាករប្រេស៊ីលរូបនេះក៏មានការគាំទ្រខ្លាំងពីប្រជាជនកម្ពុជាផងដែរ ដោយសារតែគាត់បង្ហាញបេះដូងស្រឡាញ់គុនខ្មែរ និងឡើងប្រកួតក្នុងនាមគុនខ្មែរ ជាហេតុធ្វើឱ្យអ្នកឈ្នានីសគុនខ្មែរអន់ចិត្តយ៉ាងខ្លាំងរហូតដកហូតខ្សែក្រវាត់ត្រឡប់ទៅវិញ ៕
ចែករំលែកព័តមាននេះ