ចាប់ខ្លួនយុវជន២នាក់ ក្រោយធ្វើឱ្យជនរងគ្រោះភ័យស្លន់ស្លោទៅជួបគ្រោះអកុសលលើដងផ្លូវ
- សៀមរាប
សមត្ថកិច្ចនគរបាលខេត្តសៀមរាម បើកការស្រាវជ្រាវរហូតឈានដល់ការឃាត់ខ្លួនយុវជនចំនួន២នាក់ ជាប់ពាក់ព័ន្ធករណី
ខេត្តសៀមរាប ៖ សមត្ថកិច្ចនគរបាលខេត្តសៀមរាម បើកការស្រាវជ្រាវរហូតឈានដល់ការឃាត់ខ្លួនយុវជនចំនួន២នាក់ ជាប់ពាក់ព័ន្ធករណីដេញកា.ប់គ្នាទាំងកណ្តាលរាត្រី ធ្វើឲ្យភាគីម្ខាងទៀតភ័យស្លន់ស្លោ ក៏ជិះម៉ូតូទៅបុកឃឿនផ្លូវ និងជ្រុលទៅបុកបង្គោលដែក បណ្តាលឲ្យស្លា.ប់ម្នាក់ និងរបួសស្រាលម្នាក់។
ជនសង្ស័យខាងលើនេះ រួមមាន ១- ឈ្មោះ ឆាយ សាន់ទិក ភេទប្រុស អាយុ១៧ឆ្នាំ មុខរបរ មិនពិតប្រាកដ មានទីលំនៅភូមិអូរស្មាច់ ឃុំដើមជ្រៃ ស្រុកសំរោង ខេត្តឧត្តមានជ័យ ស្នាក់បន្ទប់ជួល ស្ថិតនៅភូមិដកពោធ៌ សង្កាត់ស្លក្រាម ក្រុង-ខេត្តសៀមរាប។ ២- ឈ្មោះ សៅ ស៊ីវយុន ភេទប្រុស អាយុ១៧ឆ្នាំ មុខរបរជាបុគ្គលិកភោជនីយដ្ឋាន មានទីលំនៅភូមិវាល សង្កាត់គោកចក ក្រុង-ខេត្តសៀមរាប ។
ការឃាត់ខ្លួនជនសង្ស័យទាំង២នាក់ខាងលើនេះ សមត្ថកិច្ចបានឲ្យដឹងថា កាលពីវេលាម៉ោង១និង៤០នាទីរំលងអធ្រាត្រឈានថ្ងៃទី៤ ខែមីនា ឆ្នាំ២០២៣ នៅចំណុចរវង្វង់មូលព្រះរាជដំណាក់ ស្ថិតក្នុងភូមិមណ្ឌល២ សង្កាត់ស្វាយដង្គំ ក្រុង-ខេត្តសៀមរាប មានករណីយុវជន១ក្រុមដេញគ្នាប្រដាប់ដោយដាវ កាំបិ.តផ្គាក់ និងដុំថ្ម ជិះម៉ូតូប្រដេញក្នុងគោលបំណងកា.ប់ទៅលើជនរងគ្រោះ២នាក់ទៀតដែលកំពុងជិះម៉ូតូចេញពីមុខសណ្ឋាគារអង្គរ (Grand Hotel) ។ សមត្ថកិច្ចបន្តថា ជនរងគ្រោះ២នាក់នោះ មានម្នាក់ឈ្មោះ តាន់ រាត្រី ហៅកិញ ភេទប្រុស អាយុ១៩ឆ្នាំ និងម្នាក់ទៀតឈ្មោះ សឿប សាន់ ភេទប្រុស អាយុ១៤ឆ្នាំ។
សមត្ថកិច្ចបន្តថា ខណៈពេលជនសង្ស័យជិះម៉ូតូប៉ុនប៉ងធ្វើសកម្មភាពកា.ប់ទៅលើភាគីម្ខាងទៀតនោះ ជនរងគ្រោះក៏ជិះគេចខ្លួនបត់ឡើងទៅទិសខាងត្បូងក្នុងល្បឿនលឿន លុះជិតដល់ចំណុចរង្វង់មូលព្រះរាជដំណាក់ ដោយសារជនរងគ្រោះភ័យស្លន់ស្លោពេក ក៏ជិះទៅបុកឃឿនថ្នល់ និងរេចង្កូតជ្រុលទៅបុកបង្គោលដែកនៅលើទ្រូងផ្លូវពេញទំហឹងទៀត បណ្តាលឲ្យជនរងគ្រោះឈ្មោះ តាន់ រាត្រី ហៅកិញ ជាអ្នកជិះខាងក្រោយស្លា.ប់ភ្លាមៗនៅនឹងកន្លែងកើតហេតុ ចំណែកឈ្មោះ សឿប សាន់ ជាអ្នកបើកម៉ូតូ ដែលមានពាក់មួកសុវត្ថិភាពរងរបួសស្រាល ចំណែកជនបង្កវិញក៏បានជិះម៉ូតូគេចខ្លួនបាត់ស្រមោលតែម្តងទៅ។
ក្រោយពេលកើតមានបទល្មើសដូចបានរៀបរាប់ខាងលើនេះ សមត្ថកិច្ចបើកការស៊ើបអង្កេត និងស្រាវជ្រាវក្តាប់មុខសញ្ញាយុវជនបង្ក១ក្រុមនោះ និងដោយទទួលបានដីកាសម្រេចឲ្យបើកការស៊ើបអង្កេតបឋមពីស្ថាបនអយ្យការអមសាលាដំបូងខេត្តសៀមរាប ទើបឈានទៅដល់ការឃាត់មុខសញ្ញាទាំង២នាក់នេះតែម្តង។
នៅចំពោះមុខសមត្ថកិច្ច ជនសង្ស័យសារភាពថា «ពួកគេពិតជាបានធ្វើសកម្មភាពជិះម៉ូតូដេញកា.ប់ទៅលើជនរងគ្រោះពិតប្រាកដមែន ដោយសារមូលហេតុ ខឹងជនរងគ្រោះទាំង២នាក់បើកម៉ូតូកាត់មុខ ហើយរោទិ៍សម្លេងខ្លាំងៗឌឺដងដាក់ពួកគេ ទើបពួកគេទ្រាំមិនបាន ក៏ជិះម៉ូតូដេញតាមប៉ុនប៉ងកា.ប់ តែមិនទាន់បានកា.ប់ទេ ភាគីម្ខាងនោះក៏បើកម៉ូតូទៅបុកបង្គោលភ្លើង បណ្តាលឲ្យស្លា.ប់ និងរបួសតែម្តង ហើយពួកគេក៏ជិះគេចខ្លួនតែម្តងទៅ» ។
ក្រោយពេលឃាត់ខ្លួន ជនសង្ស័យទាំង២នាក់ខាងលើ ត្រូវបានសមត្ថកិច្ចកសាងសំណុំរឿងបញ្ជូនទៅកាន់សាលាដំបូងខេត្ត ដើម្បីបន្តនីតិវិធីតាមផ្លូវច្បាប់៕
ចែករំលែកព័តមាននេះ