ខេត្តព្រះសីហនុ៖ ក្រុមយុវជន ដែលជាជើងខ្លាំងខាងជិះម៉ូតូ ឆក់ចំនួន ៥នាក់ ក្នុងចំណោម ៦នាក់ ត្រូវបានសមត្ថកិច្ចនៃអធិការដ្ឋាននគរបាលស្រុកព្រៃនប់ សហការជាមួយកម្លាំងអធិការក្រុងបូកគោ ខេត្តកំពត ឃាត់ខ្លួន យកមកកាន់អធិការនគរបាលស្រុកព្រៃនប់ បន្ទាប់ពីជនសង្ស័យទាំង ៥នាក់ និងបក្សពួកម្នាក់ទៀត បានធ្វើសកម្មភាពឆក់កាបូបពីស្ត្រីម្នាក់ កំពុងដេកអង្រឹង ក្នុងពិធីបុណ្យមួយ។ ហេតុការណ៍នេះ បានកើតមានឡើង កាលពីថ្ងៃទី០៣ ខែមេសា ឆ្នាំ២០២៣ វេលាម៉ោង ៤ទៀបភ្លឺ នៅផ្ទះបុណ្យ ស្ថិតនៅក្នុងភូមិត្រពាំងគា ឃុំជើងគោ ស្រុកព្រៃនប់ ខេត្តព្រះសីហនុ។
លោកវរសេនីយ៍ឯក អ៊ួង វុទ្ធី អធិការនគរបាលស្រុកព្រៃនប់ បានឱ្យដឹងថា ករណីឆក់នេះ កម្លាំងបានឃាត់ខ្លួនជនសង្ស័យ ០៥នាក់ ដោយម្នាក់ បានរត់គេចខ្លួន។ ជនសង្ស័យទាំង ៥នាក់នោះ រួមមាន៖ ១.ឈ្មោះ នូ លីកៀន ភេទប្រុស អាយុ ១៤ឆ្នាំ មុខរបរមិនពិតប្រាកដ មានទីលំនៅភូមិ១ សង្កាត់១ ក្រុង-ខេត្តព្រះសីហនុ(ជនដៃដល់)។ ២.ឈ្មោះ សាន សុខស៊ី ភេទប្រុស អាយុ ១៨ឆ្នាំ មុខរបរមិនពិតប្រាកដ មានទីលំនៅ ក្នុងភូមិ៣ សង្កាត់១ ក្រុង-ខេត្តព្រះសីហនុ(បក្ខពួក)។ ៣.ឈ្មោះ អេង បុត្រា ភេទប្រុស អាយុ ២០ឆ្នាំ មុខរបរមិនពិតប្រាកដ មានទីលំនៅ ក្នុងភូមិ៣ ទំនប់រលក សង្កាត់១ ក្រុង-ខេត្តព្រះសីហនុ(បក្ខពួក)។ ៤.ឈ្មោះ មឿន សូ ភេទប្រុស អាយុ ២២ឆ្នាំ មុខរបរមិនពិតប្រាកដ មានទីលំនៅភូមិ២ សង្កាត់១ ក្រុង-ខេត្តព្រះសីហនុ(បក្ខពួក)។ ៥,ឈ្មោះ ភន រតនា ភេទប្រុស អាយុ ១៨ឆ្នាំ មុខរបរមិនពិតប្រាកដ មានទីលំនៅភូមិ៣ សង្កាត់១ ក្រុង-ខេត្តព្រះសីហនុ(បក្ខពួក)។ ៦.ឈ្មោះ ឡន ឆៀកលី ភេទប្រុស អាយុ ១៧ឆ្នាំ មុខរបរមិនពិតប្រាកដ មានទីលំនៅភូមិទំនប់រលក សង្កាត់១ ក្រុង-ខេត្តព្រះសីហនុ(គេចខ្លួនបាត់)។
សមត្ថកិច្ច បានបញ្ជាក់ថា ជនសង្ស័យទាំង ៥នាក់នេះ បានធ្វើសកម្មភាព ចូលក្នុងរោងពិធីបុណ្យ ហើយឆក់យកកាបូបរបស់ជនរងគ្រោះ ឈ្មោះ មិន ឌី ភេទស្រី អាយុ ៥៣ឆ្មាំ មុខរបរមេផ្ទះ មានទីលំនៅ នៅភូមិឫទ្ធី២ ឃុំកែវផុស ស្រុកស្ទឹងហាវ ខេត្តព្រះសីហនុ ខណៈពេលជនរងគ្រោះ កំពុងដេក នៅមុខរោងបុណ្យមុខផ្ទះបងប្អូន។
លោកអធិការបានបន្តថា សម្ភារៈបាត់បង់ រួមមាន៖ កាបូបដៃពណ៌ខ្មៅ ចំនួន ០១ ក្នុងនោះ មាន៖ ប្រាក់ដុល្លារចំនួន ១៥០០ដុល្លារ (មួយពាន់ប្រាំរយដុល្លារគត់)។ ប្រាក់រៀល ចំនួន ៣៣០០០០០៛ (បីលានសាមសិបម៉ឺនរៀលគត់)។ ចិញ្ជៀនត្រា ចំនួន ០១វង់ (ទម្ងន់ ០២ជី)។ ទូរសព្ទ ម៉ាកអូប៉ូ ចំនួន ០១គ្រឿង ពណ៌ខៀវ។ បន្ទាប់ពីធ្វើសកម្មភាពរួច ជនសង្ស័យខាងលើ បាននាំគ្នាជិះម៉ូតូរត់គេចខ្លួន ទិសដៅទៅខេត្តកំពត ហើយក៏ត្រូវបានកម្លាំងនគរបាលអធិការដ្ឋានស្រុកព្រៃនប់ សហការជាមួយកម្លាំងនគរបាលអធិការក្រុងបូកគោ ឃាត់ជនសង្ស័យខាងលើ នៅចំណុចផ្លូវជាតិលេខ៣ ចន្លោះបង្គោលគីឡូម៉ែត្រលេខ១៥៥-១៥៦ ស្ថិតក្នុងភូមិរលួស សង្កាត់បឹងទូក ក្រុងបូកគោ ខេត្តកំពត។
ក្រោយពីបានសាកសួររួច ឈ្មោះ នូ លីកៀន បានសារភាពថា ខ្លួនពិតជាបានធ្វើសកម្មភាពចូលទៅក្នុងរោងបុណ្យ ហើយបានឆក់យកកាបូបរបស់ជនរងគ្រោះ ឈ្មោះ មិន ឌី ដែលកំពុងដេក ក្នុងរោងបុណ្យពិតប្រាកដមែន។
វត្ថុតាង ដែលប៉ូលិស ចាប់យក រួមមាន៖ ម៉ូតូម៉ាក ហុងដាឌ្រីម ពណ៌ខ្មៅ ស៊េរីឆ្នាំ២០២២ ផ្លាកលេខ ព្រះសីហនុ 1K-9120 ចំនួន ០១គ្រឿង។ ម៉ូតូម៉ាក ហុងដាឌ្រីម ពណ៌ក្រហម ស៊េរីឆ្នាំ២០២១ ផ្លាកលេខ ព្រះសីហនុ 1F-9472 ចំនួន ០១គ្រឿង។ ទូរស័ព្ទម៉ាកអាយហ្វូន ១១ប្រូ ពណ៌ប្រផេះ ចំនួន ០១គ្រឿង ទូរស័ព្ទម៉ាកអាយហ៊្វូនអ៊ិចភ្លើស ពណ៌ទឹកមាស ចំនួន ០១គ្រឿង។ ទូរស័ព្ទម៉ាកអាយហ៊្វូន ១១ ពណ៌ស ចំនួន ០១គ្រឿង។ ទូរស័ព្ទម៉ាកអាយហ៊្វូនអ៊ិចភ្លើស ពណ៌ខ្មៅ ចំនួន ០១គ្រឿង ទូរស័ព្ទម៉ាកអាយហ៊្វូន៧ ពណ៌ខ្មៅ ចំនួន ០១គ្រឿង។
ជនសង្ស័យទាំង ៥នាក់ រួមទាំងវត្តុតាងខាងលើ ត្រូវបានប៉ូលិស ឃាត់ខ្លួន និងដកហូត នៅអធិការដ្ឋាននគរបាលស្រុកព្រៃនប់ ដើម្បីកសាងសំណុំរឿង ចាត់ការតាមនីតិវិធី៕ ហ៊ុយ ចាន់ធួន
ចែករំលែកព័តមាននេះ