- ភ្នំពេញ
រាជធានីភ្នំពេញ ៖ លោក ហ៊ុន ម៉ាណែត កូនប្រុសច្បងរបស់សម្តេចតេជោ ហ៊ុន សែន ដែលទើបត្រូវបានដំឡើងឋានន្តរស័ក្តិជានាយឧត្តមសេនីយ៍ផ្កាយមាស៤ កាលពីពេលថ្មីៗនៅពេលនេះ…
រាជធានីភ្នំពេញ ៖ លោក ហ៊ុន ម៉ាណែត កូនប្រុសច្បងរបស់សម្តេចតេជោ ហ៊ុន សែន ដែលទើបត្រូវបានដំឡើងឋានន្តរស័ក្តិជានាយឧត្តមសេនីយ៍ផ្កាយមាស៤ កាលពីពេលថ្មីៗនៅពេលនេះ…
រាជធានីភ្នំពេញ ៖ លោក ហ៊ុន ម៉ាណែត កូនប្រុសច្បងរបស់សម្តេចតេជោ ហ៊ុន សែន ដែលទើបត្រូវបានដំឡើងឋានន្តរស័ក្តិជានាយឧត្តមសេនីយ៍ផ្កាយមាស៤ កាលពីពេលថ្មីៗនៅពេលនេះ សម្តេច ហ៊ុន សែន ក្នុងនាមជាប្រធានគណបក្សប្រជាជនកម្ពុជាបានចេញលិខិតចាត់តាំងលោក ហ៊ុន ម៉ាណែត ធ្វើជាបេក្ខជនលំដាប់លេខរៀងទី១ ក្នុងចំណោមបេក្ខជនឈរឈ្មោះបោះឆ្នោតជ្រើសតាំងតំណាងរាស្ត្រ នីតិកាលទី៧ មណ្ឌលរាជធានីភ្នំពេញរបស់គណបក្សប្រជាជនកម្ពុជា ដែលមានចំនួនពេញសិទ្ធិសរុប១២រូប ។
ជាមួយគ្នានោះ កាលពីថ្ងៃទី៣០ មីនា ឆ្នាំ២០២៣ សម្តេច ហ៊ុន សែន ប្រធានគណបក្សប្រជាជនកម្ពុជា ក៏បានចេញលិខិតសម្រេចសម្រួលភារកិច្ចលោក ហ៊ុន ម៉ាណែត ពីអនុប្រធានក្រុមការងារគណបក្សចុះមូលដ្ឋាន ខេត្តកំពង់ចាម និងពីអនុប្រធានក្រុមការងារគណបក្សចុះមូលដ្ឋានខេត្តត្បូងឃ្មុំ មកជាអនុប្រធានក្រុមការងារគណបក្សប្រជាជនកម្ពុជា ចុះមូលដ្ឋានរាជធានីភ្នំពេញ។
លោក ហ៊ុន ម៉ាណែត កូនប្រុសច្បងរបស់លោក ហ៊ុន សែន ត្រូវបានតែងតាំងរួចមកហើយជាអនាគតបេក្ខជននាយករដ្ឋមន្ត្រីរបស់គណបក្សប្រជាជនកម្ពុជា ដែលជាអ្នកបន្តវេនពីសម្តេច ហ៊ុន សែន ជាឪពុក។
ការចាត់ចែងដាក់លោក ហ៊ុន ម៉ាណែត ជាបេក្ខជនអ្នកតំណាងរាស្ត្រ នាពេលនេះត្រូវបានអ្នកតាមដានសង្គមនយោបាយកម្ពុជា មើលឃើញថា គឺជាការបោះមួយជំហានទៀត ដើម្បីជ្រើសតាំងលោក ហ៊ុន ម៉ាណែត ឡើងកាន់តំណែងជានាយករដ្ឋមន្ត្រី ជំនួសសម្តេច ហ៊ុន សែន ព្រោះច្បាប់ និងរដ្ឋធម្មនុញ្ញរបស់ប្រទេសកម្ពុជាបានកំណត់ថា នាយករដ្ឋមន្ត្រីត្រូវបានជ្រើសចេញពីអ្នកតំណាងរាស្ត្រជាប់ឆ្នោតក្នុងគណបក្ស ដែលមានសំឡេងភាគច្រើនក្នុងរដ្ឋសភា។
ប៉ុន្តែនៅពេលលោក ហ៊ុន ម៉ាណែត ត្រូវឈរឈ្មោះជាបេក្ខជនតំណាងរាស្ត្រ នៅក្នុងការបោះឆ្នោតជាតិ នាថ្ងៃទី២៣ ខែកក្កដា ឆ្នាំ២០២៣នេះ តាមច្បាប់លោក ហ៊ុន ម៉ាណែត ត្រូវលាលែងតំណែងពីជួរកងទ័ព ដូចអ្វីដែលក្រុមមេទ័ពៗបានធ្វើនៅក្នុងការបោះឆ្នោត កាលពីឆ្នាំ២០១៨កន្លងមក ។ លោកនាយឧត្តមសេនីយ៍ ហ៊ុន ម៉ាណែត បច្ចុប្បន្ន គឺជាអគ្គមេ បញ្ជាការរងកងយោធពលខេមភូមិន្ទ និងជាមេបញ្ជាការកងទ័ពជើងគោកដែលសព្វថ្ងៃលោក ហ៊ុន ម៉ាណែត បានគ្រប់គ្រងលើកងទ័ព តាមកងពលនានានៅទូទាំងប្រទេស។
យ៉ាងណាក៏ដោយ ក្រៅពីការសម្រេចចាត់តាំងលោក ហ៊ុន ម៉ាណែត ជាបេក្ខជនតំណាងរាស្ត្រនៅលំដាប់លេខរៀងទី១ ប្រចាំមណ្ឌលរាជធានីភ្នំពេញ គឺកាលពីថ្ងៃទី៣០ ខែមីនា ឆ្នាំ២០២៣ សម្តេច ហ៊ុន សែន ដែលជាប្រធានគណបក្សប្រជាជនកម្ពុជា ក៏បានចេញលិខិតសម្រេច ចាត់ តាំងបេក្ខជនឈរឈ្មោះតំណាងរាស្ត្រ ទាំងពេញសិទ្ធិ និងទាំងបេក្ខជនបម្រុង របស់គណបក្សប្រជាជនកម្ពុជា ប្រចាំមណ្ឌលបោះឆ្នោត នៅតាមបណ្តាខេត្តរាជធានី នៅទូទាំងប្រទេសរួចរាល់ហើយ។ ក្នុងនោះសម្តេចហ៊ុនសែនផ្ទាល់បានឈរឈ្មោះជាបេក្ខជនតំណាងរាស្ត្រលំដាប់លេខរៀងទី១ នៅមណ្ឌលបោះឆ្នោតខេត្តកណ្តាល ដែលសម្តេចបានឈរឈ្មោះច្រើនអាណត្តិមកហើយ ។
គេរំពឹងថា សម្តេច ហ៊ុន សែន នឹងផ្ទេរអំណាចជានាយករដ្ឋមន្ត្រីទៅកូន ឆាប់ៗនេះ ។ ពោល គឺលោក ហ៊ុន ម៉ាណែត នឹងឡើងធ្វើជានាយករដ្ឋមន្ត្រីបន្តវេននៅក្រោយការបោះឆ្នោតជាតិ នាខែកក្កដា ឆ្នាំ២០២៣ ឬក៏យ៉ាងយូរនៅពាក់កណ្តាលអាណត្តិនៃរដ្ឋសភាដែលកើតចេញពីការបោះឆ្នោតនាខែកក្កដា ឆ្នាំ២០២៣នេះ តាមរយៈការសម្រេចរបស់សម្តេច ហ៊ុន សែន ប្រកាសលាលែងតំណែងពីនាយករដ្ឋមន្ត្រីព្រោះថា កាលពីពេលថ្មីៗនេះរាជរដ្ឋាភិបាលបានកែច្បាប់រដ្ឋធម្មនុញ្ញរួចអស់ហើយ ដើម្បីបើកផ្លូវឱ្យមានការជ្រើសតាំងនាយករដ្ឋមន្ត្រី និងគណៈរដ្ឋមន្ត្រីថ្មីដែលដឹកនាំដោយលោក ហ៊ុន ម៉ាណែត ជាក្រុមយុវជនឈាមថ្មីរបស់គណបក្សប្រជាជនកម្ពុជាឡើងកាន់តំណែងបន្ត ។
រីឯគណបក្សប្រឆាំង ដែលជាគូប្រជែងនយោបាយវិញ និងជាអ្នកនយោបាយប្រឆាំងជំនាន់សម្តេច ហ៊ុន សែន ដូចជា លោកសមរង្ស៊ី និងលោក កឹមសុខា ជាដើម គឺមិនអាចចូលរួមប្រកួតប្រជែងការបោះឆ្នោតនៅកម្ពុជាបាននោះទេ ពិសេសនៅក្នុងការបោះឆ្នោតជាតិនាខែកក្កដា ឆ្នាំ២០២៣ និងបន្តទៅអាណត្តិក្រោយៗទៀត។
ដូច្នេះអ្នកតាមដានសង្គមនយោបាយកម្ពុជា មើលឃើញថា ការប្រជែងអំណាចណាមួយជាមួយលោក ហ៊ុន ម៉ាណែត កូនប្រុសច្បងរបស់លោក ហ៊ុន សែន និយាយដោយឡែក និងនិយាយជារួមជាមួយគណបក្សប្រជាជនកម្ពុជាពីសំណាក់បក្សប្រឆាំងហាក់ដូចជា មិនមានប្រសិទ្ធភាពឡើយ។
ដូច្នេះតាមការសង្កេតមើលទៅរហូតមកទល់ពេលនេះដំណើរផ្លូវរបស់លោកហ៊ុន ម៉ាណែត ដើម្បីក្លាយជានាយករដ្ឋមន្ត្រីបន្តវេនបានកាន់តែមានភាពច្បាស់លាស់ទៅៗហើយ ។ នៅពេលលោក ហ៊ុន ម៉ាណែតក្លាយជានាយករដ្ឋមន្ត្រីនោះ គណរដ្ឋមន្ត្រីក៏ត្រូវគេដឹងថានឹងសម្បូរដោយមនុស្សជំនាន់ថ្មី។ ដូច្នេះវាជាកត្តាដ៏ចាំបាច់ដែលថា មនុស្សជំនាន់ ថ្មីនឹងសាមគ្គីភាពគ្នាយ៉ាងរឹងមាំដូចជំនាន់សម្តេចតេជោ ដើម្បីកម្ពុជាមួយដែលមានស្ថិរភាពនយោបាយ សន្តិភាព និងភាពរុងរឿងតទៅមុខទៀត៕
ចែករំលែកព័តមាននេះ