ប្រុសស្រីចំនួន៨នាក់ត្រូវសមត្ថកិច្ចជំនាញ នៃមន្ទីរប្រឆាំងបទល្មើសគ្រឿងញៀ.ន ឃាត់ខ្លួនបញ្ជូនទៅកាន់សាលាដំបូងរាជធានីភ្នំពេញ ពាក់ព័ន្ធករណីលួច
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ប្រុសស្រីចំនួន៨នាក់ត្រូវសមត្ថកិច្ចជំនាញ នៃមន្ទីរប្រឆាំងបទល្មើសគ្រឿងញៀ.ន ឃាត់ខ្លួនបញ្ជូនទៅកាន់សាលាដំបូងរាជធានីភ្នំពេញ ពាក់ព័ន្ធករណីលួចកែច្នៃផលិតគ្រឿងញៀ.នដោយខុសច្បាប់ ដែលប្រព្រឹត្តនៅរាជធានីភ្នំពេញ។
សេចក្តីរាយការណ៍បន្តថា ជនសង្ស័យទាំង៨នាក់នោះ រួមមាន ៖ ១- ឈ្មោះ សុខ ផារ៉ា ហៅញ៉ាញ់ ភេទប្រុស អាយុ៤៨ឆ្នាំ, ២- ឈ្មោះ សែម វាសនា ហៅក្តាំង ភេទប្រុស អាយុ៣០ឆ្នាំ, ៣- ឈ្មោះ ផុន វង្សសុភាបណ្ឌិត ហៅសី ភេទប្រុស អាយុ៣៤ឆ្នាំ, ៤- ឈ្មោះ ប៉ុល វាសនា ភេទស្រី អាយុ៣៤ឆ្នាំ, ៥- ឈ្មោះ អ៊ុន សាមិត្ត ភេទប្រុស អាយុ២៤ឆ្នាំ, ៦- ឈ្មោះ សុង រតន ហៅខ្លា ភេទប្រុស អាយុ៣៧ឆ្នាំ, ៧- ឈ្មោះ ឡុង ប៊ុន ហៅ LENG BINH ភេទប្រុស អាយុ២៦ឆ្នាំ និង៨- ឈ្មោះ ធី ចាន់ភិរម្យ ភេទប្រុស អាយុ៣៤ឆ្នាំ។
ការបង្ក្រាបករណីខាងលើនេះ ដោយអនុវត្តតាមបញ្ជាឯកឧត្តម នាយឧត្ដមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងឯកឧត្តម នាយឧត្ដមសេនីយ៍ ម៉ក់ ជីតូ អគ្គស្នងការរងទទួលផែនប្រឆាំងបទល្មើសគ្រឿងញៀ.ន ក្រោមការបញ្ជាដឹកនាំផ្ទាល់របស់ ឯកឧត្តម ឧត្ដមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀ.ន ក្រោមការសម្របសម្រួលពីលោក អ៊ុ សុភ្តិ ព្រះរាជអាជ្ញារង នៃអយ្យការអមសសាលាដំបូងរាជធានីភ្នំពេញ កាលពីវេលាម៉ោង២រសៀលថ្ងៃទី១ ខែមេសា ឆ្នាំ២០២៣ កម្លាំងជំនាញការិយាល័យ ប្រឆាំងការសម្អាតប្រាក់ «ក៥» និងការិយាល័យប្រឆាំងការប្រើប្រាស់គ្រឿងញៀ.នដោយខុសច្បាប់ «ក៤» ដឹកនាំដោយលោកឧត្តមសេនីយ៍ទោ សាន សុទ្ធី នាយករងមន្ទីរ លោកឧត្តមសេនីយ៍ត្រី ស៊ុ ណារ៉ាក់ នាយករងមន្ទីរ លោកវរសេនីយ៍ឯក ឈូក គា នាយករងមន្ទីរ ចុះសហការជាមួយកម្លាំងនៃស្នងការដ្ឋាននគរបាលរាជធានីភ្នំពេញ ធ្វើការបង្ក្រាបករណីជួញដូរ កែច្នៃ និងផលិតគ្រឿងញៀ.នមួយករណី នៅចំណុចបណ្តោផ្លូវ៦០ម៉ែត្រ មុខផ្សារទំនើបអ៊ីអនម៉ល៣ ស្ថិតក្នុងភូមិព្រែកតាឡុង៣ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
ជាលទ្ធផលសមត្ថកិច្ចឃាត់ខ្លួនជនសង្ស័យប្រុសស្រីចំនួន៨នាក់ និងចាប់យកវត្ថុតាងសារធាតុគ្រឿងញៀ.នប្រភេទ កេតាមីន (Ketamine) ទម្ងន់ ២០៧៦ក្រាម (ស្មើនឹង២គីឡូ ៧៦ក្រាម), សារធាតុមិនច្បាស់ ទម្ងន់ ១០៦៨៨,៣៤ក្រាម (ស្មើនឹង១០គីឡូ ៦៨៨,៣៤ក្រាម), ឧបករណ៍កែច្នៃគ្រឿងញៀ.នមួយចំនួនធំ និងអាវុ.ធខ្លី១ដើមផងដែរ។
ក្រោយឃាត់ខ្លួនជនសង្ស័យ រួមនឹងវត្ថុតាង សមត្ថកិច្ចបានកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធីនៃច្បាប់៕
ចែករំលែកព័តមាននេះ