រាជធានីភ្នំពេញ​៖ តំណាងអយ្យការអមសាលាដំបូងរាជធានីភ្នំពេ​ញ នៅថ្ងៃទី២ ខែមេសា ឆ្នាំ២០២៣ បានបើកការស៊ើបសួរលើជនសង្ស័យ ២​នាក់ម្នាក់ ជាជនជាតិឡវ និងម្នាក់ ជាជនជាតិ​វៀតណាម ពាក់ព័ន្ធករណី​ជួញដូរដោយខុសច្បាប់នូវសាធាតុញៀន ប្រមាណជាង ៤០ គីឡូក្រាម​។

ករណីខាងលើនេះ ដោយអនុវត្ត​តាមបញ្ជា​លោក​នាយឧត្ដមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និងលោក​នាយឧត្ដមសេនីយ៍ ម៉ក់ ជីតូ អគ្គស្នងការរង ទទួលផែន​ប្រឆាំងបទល្មើសគ្រឿងញៀន ក្រោមការបញ្ជាដឹកនាំផ្ទាល់របស់លោក​ឧត្ដមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន កាលពីថ្ងៃទី៣១ ខែមីនា ឆ្នាំ២០២៣ វេលាម៉ោង ៦ និង ៣០នាទី កម្លាំងជំនាញមន្ទីរប្រឆាំងបទល្មើសគ្រឿងញៀន (ក៤) ដឹកនាំដោយ លោកវរសេនីយ៍ទោ ប៉ែន ណុល នាយរងការិយាល័យ សហការជាមួយកម្លាំងជំនាញ នៃស្នងការដ្ឋាន​នគរបាល រាជធានីភ្នំពេញ ក្រោមការសម្របសម្រួលពី​លោក វង្ស សាវ៉ាត ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានដំណើរការស្រាវជ្រាវ បង្ក្រាប​ករណីជួញដូរគ្រឿងញៀន នៅចំណុចចំណតរថយន្ត ផ្សារទំនើប អ៊ីអនមល.៣ ស្ថិតនៅភូមិ​ព្រែកតាឡុង៣ សង្កាត់ចាក់អង្រែក្រោម ខណ្ឌមាន​ជ័យ រាជធានីភ្នំពេញ​។ ជាលទ្ធផល កម្លាំង​ជំនាញ បាន​ឃាត់ខ្លួនជនសង្ស័យចំនួន ០២នាក់ ម្នាក់ឈ្មោះ ប៉ាវ វាំង ភេទប្រុស អាយុ ៣៣ ឆ្នាំ ជនជាតិឡាវ និងម្នាក់ឈ្មោះ សុខ តាំង ភេទប្រុស អាយុ ៣៣ឆ្នាំ ជនជាតិខ្មែរ (វៀតណាម)។

ចាប់យកវត្ថុតាង រួមមាន​៖ សារធាតុញៀនប្រភេទមេតំហ្វេតាមីន(ICE) ទម្ងន់ ៤០ គីឡូ ៥៣០.៤០ ក្រាម និង​រថយន្ត ១គ្រឿងពណ៌ស ម៉ាក High Lander។

ក្រោយឃាត់ខ្លួន សមត្ថកិច្ចបានកសាងសំណុំរឿង ជនសង្ស័យ និងវត្ថុតាង បញ្ជូនទៅសាលាដំបូង​រាជធានីភំ្នពេញ ចាត់ការតាមនីតិវិធី៕ ឃឹម ប៊ុនណាក់