គន្លឹះថែសុខភាពជើងសម្រាប់អ្នកទឹកនោមផ្អែម
វិធីសាស្ត្រមួយចំនួនដែលអ្នកគួរ និងមិនគួរធ្វើដើម្បីកាត់បន្ថយហានិភ័យនៃការ
ដោយសារតែអ្នកជំងឺទឹកនោមផ្អែមភាគ ច្រើនមានជំងឺទាក់ទងនឹងសរសៃប្រសាទ វាជាការសំខាន់ណាស់ក្នុងការគ្រប់គ្រងកម្រិតជាតិស្ករក្នុងឈាមឲ្យបានត្រឹមត្រូវ ។ ម្យ៉ាងទៀត ការថយចុះលំហូរឈាមនៅតំបន់ជើង អាចបង្កើនហានិភ័យនៃការឆ្លងមេរោគ ថែមទាំងធ្វើឱ្យអ្នកមានជំងឺទឹកនោមផ្អែមប្រឈមទៅនឹងការកាត់ជើងចេញ ។
វិធីសាស្ត្រមួយចំនួនដែលអ្នកគួរ និងមិនគួរធ្វើដើម្បីកាត់បន្ថយហានិភ័យនៃការមានរបួស និងការឆ្លងមេរោគនៅជើង ៖
១-អ្នកជំងឺគួរតែត្រួតពិនិត្យមើលជើងរៀងរាល់ថ្ងៃ ។ ប្រសិនបើមិនអាចពិនិត្យជើងដោយខ្លួនឯងបានទេ សាច់ញាតិ សមាជិកគ្រួសារឬអ្នកថែទាំចាំបាច់ត្រូវជួយត្រួតពិនិត្យ ។ នេះគឺដោយសារតែអ្នកជំងឺទឹកនោមផ្អែមអាចមានរបួស ឬជាំដោយមិនដឹងខ្លួន ឬមានអារម្មណ៍រហូតទាល់តែវាមានភាពធ្ងន់ ។
២-ការឈឺចាប់តែងតែកើតឡើងជា រឿយៗចំពោះអ្នកជំងឺទឹកនោមផ្អែម ។ ទោះជាយ៉ាងណា ប្រសិនបើអ្នកឈឺប្រអប់ជើង ឬជើងទាំងមូល សូមចៀសវាងការស្អំ ។ អ្នកជំងឺទឹកនោមផ្អែមមិនគួរស្អំជើងដោយការប្រើថង់ទឹកក្តៅ ឬក្រណាត់ជ្រលក់ទឹកក្តៅទេ ។ ប្រសិនបើវាបណ្តាលឲ្យមានបញ្ហារបួសស្បែក ឬប្រសិនបើអ្នកមានការរលាកបន្តិចបន្តួច អ្នកជំងឺទឹកនោមផ្អែមដែលមានបញ្ហាសរសៃប្រសាទអាចនឹងមិនដឹងខ្លួនឡើយ ។
៣-ផ្តល់ជាតិសំណើមដល់ជើង ។ សូមលាងជើងរបស់អ្នក ជូតវាឲ្យស្ងួត បន្ទាប់មកលាបចាហួយផ្តល់សំណើមនៅលើជើងទាំង២ ។ អ្នកមិនចាំបាច់លាបនៅលើបាតជើងនោះទេ ។
៤-ក្នុងអំឡុងពេលកាត់ក្រចកសូមមានការប្រុងប្រយ័ត្ន ។ សូមកាត់ក្រចកឲ្យបានឆ្ងាយពីស្បែកដោយសារតែរបួសតែបន្តិចអាចបណ្តាលឱ្យមានបញ្ហាធំ ។ អ្នកជំងឺទឹកនោមផ្អែមមួយចំនួនមានក្រចករឹង ក្នុងករណីបែបនេះវាជាការល្អក្នុងការទៅជួបគ្រូពេទ្យជំនាញជើងដើម្បីថែរក្សាក្រចករបស់អ្នក ។
៥-ប្រសិនបើអ្នកមានរោគសញ្ញាដូចជាឡើងក្រហមហើម គ្រុនក្តៅ (ក្ដៅនៅនឹងជើង) ឬការចេញខ្ទុះ សូមទៅពិគ្រោះជាមួយវេជ្ជបណ្ឌិតរបស់អ្នក ។ សូមកុំព្រងើយកន្តើយចំពោះរោគសញ្ញារបួសជើង ឬការឆ្លងមេរោគព្រោះវាអាចបង្កឱ្យមានគ្រោះថ្នាក់ធ្ងន់ដល់អ្នក ៕
ចែករំលែកព័តមាននេះ