តម្លៃប្រេងឡើងថ្លៃ ក្រោយបណ្តាប្រទេសយក្សផលិតប្រេងកំពុងកាត់បន្ថយផលិតកម្ម
បរទេស ៖ តម្លៃប្រេងបានឡើងថ្លៃ បន្ទាប់ពីក្រុមហ៊ុននាំចេញប្រេងធំជាងគេក្នុងពិភពលោកមួយ
បរទេស ៖ តម្លៃប្រេងបានឡើងថ្លៃ បន្ទាប់ពីក្រុមហ៊ុននាំចេញប្រេងធំជាងគេក្នុងពិភពលោកមួយចំនួន បានប្រកាសអំពីការកាត់បន្ថយផលិតកម្មប្រេងដ៏គួរឱ្យភ្ញាក់ផ្អើលជាទីបំផុត។ នេះបើយោងតាមប្រភពពីសារព័ត៌មាន BBC បានចេញផ្សាយនៅថ្ងៃ០៣ ខែមេសា ឆ្នាំ២០២៣។
តម្លៃប្រេងឆៅ Brent បានកើនឡើងជាង៥ដុល្លារក្នុងមួយបារ៉ែល ឬ ៧% ដែលលើសពី៨៥ដុល្លារនៅពេលការជួញដូរបានចាប់ផ្តើម។ ការកើនឡើងតម្លៃនេះកើតឡើង បន្ទាប់ពីប្រទេសអារ៉ាប៊ីសាអូឌីត អ៊ីរ៉ាក់ និងរដ្ឋឈូងសមុទ្រជាច្រើនបានប្រកាសកាលពីថ្ងៃទៅ០២ ខែមេសា ឆ្នាំ២០២៣ ថាពួកគេបានកាត់បន្ថយទិន្នផលប្រេងជាងមួយលានបារ៉ែលនៅក្នុងមួយថ្ងៃ។
តម្លៃប្រេងបានឡើងថ្លៃនៅពេលរុស្ស៊ីឈ្លានពានលើអ៊ុយក្រែន ប៉ុន្តែឥឡូវបានត្រឡប់មកវិញ នៅក្នុងកម្រិតដែលគេមើលឃើញមុនពេលជម្លោះចាប់ផ្តើម។ ទោះជាយ៉ាងណាក៏ដោយ សហរដ្ឋអាមេរិកបាននឹងកំពុងអំពាវនាវឱ្យអ្នកផលិតបង្កើនទិន្នផលរបស់ខ្លួន ដើម្បីជំរុញឱ្យតម្លៃថាមពលធ្លាក់ចុះ ខណៈតម្លៃថាមពល និងឥន្ធនៈខ្ពស់កាលពីឆ្នាំមុន បានជួយជំរុញអតិផរណា ការចំណាយកើនឡើង ដែលបានដាក់សម្ពាធយ៉ាងខ្លាំងលើផ្នែកហិរញ្ញវត្ថុលើគ្រួសារជាច្រើន។
ឆ្លើយតបទៅនឹងព័ត៌មាននៃការកាត់ផ្តាច់ចុងក្រោយនេះ អ្នកនាំពាក្យក្រុមប្រឹក្សាសន្តិសុខជាតិអាមេរិកបាននិយាយថា «យើងមិនគិតថា ការកាត់បន្ថយត្រូវបានណែនាំនៅពេលនេះទេ ដោយសារភាពមិនច្បាស់លាស់នៃទីផ្សារ ហើយយើងបានបញ្ជាក់យ៉ាងច្បាស់ចំពោះរឿងនេះ»។
ការកាត់បន្ថយទិន្នផលប្រេងកំពុងត្រូវបានធ្វើឡើងដោយសមាជិកនៃប្រទេសផលិតប្រេង OPEC+ ដែលក្រុមនេះមានប្រហែល ៤០% នៃទិន្នផលប្រេងឆៅទាំងអស់របស់ពិភពលោក។ អារ៉ាប៊ីសាអូឌីតកំពុងកាត់បន្ថយទិន្នផលប្រេង ៥០ម៉ឺនបារ៉ែលក្នុងមួយថ្ងៃ និងអ៊ីរ៉ាក់ ២១១,០០០បារ៉ែល ចំណែកអេមីរ៉ាតអារ៉ាប់រួម គុយវ៉ែត អាល់ហ្សេរី និងអូម៉ង់ ក៏កំពុងកាត់បន្ថយផងដែរ។
ទីភ្នាក់ងារសារព័ត៌មានផ្លូវការរបស់អារ៉ាប៊ីសាអូឌីតបានរាយការណ៍ថា មន្ត្រីក្រសួងថាមពលអារ៉ាប៊ីសាអូឌីត បានបញ្ជាក់ថា វិធានការនេះ គឺជាវិធានការដ៏ប្រុងប្រយ័ត្ន សំដៅជួយដល់ស្ថិរភាពនៃទីផ្សារប្រេង។
លោក Nathan Piper អ្នកវិភាគប្រេងឯករាជ្យបានប្រាប់ BBC ថា ការផ្លាស់ប្តូររបស់សមាជិក OPEC+ ហាក់ដូចជាការប៉ុនប៉ងដើម្បីរក្សាតម្លៃប្រេងលើសពី៨០ដុល្លារក្នុងមួយបារ៉ែល ដោយសារតម្រូវការអាចរងផលប៉ះពាល់ដោយការធ្លាក់ចុះនៃសេដ្ឋកិច្ចពិភពលោក ហើយការដាក់ទណ្ឌកម្មក៏ជាផលប៉ះពាល់មានកម្រិតលើការរឹតបន្តឹងការផ្គត់ផ្គង់ប្រេងរបស់រុស្ស៊ីផងដែរ៕ (ដកស្រង់ចេញពី BBC)
ចែករំលែកព័តមាននេះ