ខេត្តបាត់ដំបង៖ ដើមពោធិដ៏ធំមួយដើម មានអាយុរាប់ទសវត្សរ៏ ដែលអ្នកភូមិតែងគោរពបូជា ល្បីតៗគ្នាថា មានបារមីកាន់ដ៏ពូកែស័ក្គិសិទ្ធិ សូម្បីតែមន្ត្រីជំនាញសាងសង់ផ្លូវក៏មិនហ៊ានប៉ះពាល់ផងនោះ ពេលនេះត្រូវព្យុះព្យូមាវាយប្រហារគ្មានត្រាប្រណីរំលើងទាំងឬស កាលពីល្ងាចថ្ងៃទី ១០…
ខេត្តបាត់ដំបង៖ ដើមពោធិដ៏ធំមួយដើម មានអាយុរាប់ទសវត្សរ៏ ដែលអ្នកភូមិតែងគោរពបូជា ល្បីតៗគ្នាថា មានបារមីកាន់ដ៏ពូកែស័ក្គិសិទ្ធិ សូម្បីតែមន្ត្រីជំនាញសាងសង់ផ្លូវក៏មិនហ៊ានប៉ះពាល់ផងនោះ ពេលនេះត្រូវព្យុះព្យូមាវាយប្រហារគ្មានត្រាប្រណីរំលើងទាំងឬស កាលពីល្ងាចថ្ងៃទី ១០ ឧសភា ដែលដុះនៅចំកណ្ដាលផ្លូវ ស្ថិតក្នុងភូមិអូរតាគាំ១ សង្កាត់ទូលតាឯក ក្រុងបាត់ដំបង តែសំណាងល្អពុំបង្កគ្រោះថ្នាក់ដល់អ្នកដំណើរទេ។
ពុំមានចាស់ទុំណា បានដឹងច្បាស់ពីប្រវត្តិដើមពោធិដ៏ធំសម្បើមមួយដើមដុះចំកណ្ដាលផ្លូវខាងលើនេះទេ។ គេគ្រាន់តែដឹងថា ដើមពោធីនេះមានអាយុច្រើនទសវត្សរីមកហើយ និង មានទំហំមុខកាត់ប្រហែលជាង០១ម៉ែត្រ។
កាលដើមឡើយដើមពោធិនេះមានទំហំតូចល្មម វាហាក់ដូចជាដុះក្បែរផ្លូវនៅក្នុងភូមិ។ ក្រោយមកមានអ្នកភូមិមួយចំនួនអះអាងថា ធ្លាប់ប្រទះឃើញមានរឿង ឬ រូបភាពប្លែកៗ នៅនឹងដើមពោធិនោះ ហើយក៏មានអ្នកខ្លះ ធ្លាប់បែរបន់សុំសេចក្ដីសុខសប្បាយ បានដូចបំណងទៀតផង ទើបពួកគេនាំគ្នាគោរព និង មានជឿជាក់តៗគ្នា រហូតរៀបចំទីនោះ ជាកន្លែងសក្ការៈបូជា ដោយចាត់ទុកដើមពោធីនេះមាន«បារមីពូកែស័ក្គិសិទ្ធិ»រហូតមក។
បើតាមអ្នកភូមិបាននិយាយថា ដោយសារតែផ្លូវលំមួយខ្សែនេះ មានលក្ខណៈតូចចង្អៀត ទើបក្រោយមកមន្ត្រីជំនាញ បានឈូសឆាយពង្រីកផ្លូវនេះឲ្យធំ និង ចាក់បេតុងរឹងមាំ ប៉ុន្តែមន្ត្រីជំនាញមិនហ៊ានប៉ះពាល់ដើមពោធិនេះទេ។ មន្ត្រីជំនាញ សុខចិត្តឈូសឆាយធ្វើផ្លូវវាងជុំវិញ ដោយរក្សាដើមពោធិនៅចំកណ្ដាលផ្លូវ។ នេះទំនងដោយសារតែខ្លាចបារមីដើមពោធិនោះផងក៏មិនដឹង ទើបមន្ត្រីជំនាញសុខចិត្តសាងសង់ផ្លូវបេតុងព័ទ្ធជុំវិញ។
យ៉ាងណាក្ដី ពេលនេះដើមពោធិដែលល្បីមានបារមីកាន់ដ៏ពូកែស័ក្គិសិទ្ធិនេះ បានដូលរលំ រំលើងទាំងឬស បោកខ្លួនលើផ្លូវយ៉ាងកំសត់ ព្រោះតែរិទ្ធអំណាចខ្យល់ព្យុះព្យូមាដ៏កាចសាហាវ។
សូមបញ្ជាក់ថា កាលពីល្ងាចថ្ងៃទី ១០ ឧសភា ភ្លៀងលាយឡំមកជាមួយនូវផ្គររន្ទះ និងខ្យល់កន្ត្រាក់វាយប្រហារយ៉ាងខ្លាំងក្លាផង បានប៉ះទង្កិចទៅលើបណ្ដាស្រុកមួយចំនួននៅក្នុងខេត្តបាត់ដំបង ក្នុងនោះក្រុងបាត់ដំបង ក៏រងនូវបាតុភូតធម្មជាតិនេះ យ៉ាងដំណំដែរ។
ប្រជាពលរដ្ឋមួយចំនួន ដែលធ្លាប់ជឿជាក់លើបារមីដើមពោធិដ៏ធំសម្បើមខាងលើនេះ មានការសោកស្ដាយក្រៃលេង ក្រោយឃើញដើមពោធិដ៏ស័ក្គិសិទ្ធិនេះ រងគ្រោះដេកដួលលើដងផ្លូវ ដោយសារឥទ្ធិពលខ្យល់កន្ត្រាក់៕
ចែករំលែកព័តមាននេះ