អេ យ៉ានុត ជម្នះសម្ពាធគ្រួសារ
រាជធានីភ្នំពេញ ៖ បើទោះជាក្នុងពេលនេះកីឡាការិនីវ័យក្មេងនាង អេ យ៉ានុត ដែលត្រូវគេស្គាល់ថា
រាជធានីភ្នំពេញ ៖ បើទោះជាក្នុងពេលនេះកីឡាការិនីវ័យក្មេងនាង អេ យ៉ានុត ដែលត្រូវគេស្គាល់ថា ជាកូនស្រីបង្កើតរបស់អតីតកំពូលអ្នកប្រដាល់កម្ពុជាលោក អេ ភូថង មិនសូវបង្ហាញមុខនៅលើសង្វៀនប្រដាល់យ៉ាងណាក្ដី ក៏នាងនៅក្រវិលៗក្នុងរង្វង់អាជីពនេះដដែល ដោយនាងគឺជាគ្រូជំនួយក្នុងការបង្វឹកអ្នកប្រដាល់ជាមួយម្ដាយ និងបានងាកទៅប្រឡូកកីឡាប្រដាល់ដាក់ទ្រុងផ្នែក MMA ច្រើនជាង ។
ទម្រាំទទួលបានកេរ្តិ៍ឈ្មោះមកទល់ពេលនេះនាងត្រូវគេដឹងថា ទទួលនូវការតស៊ូច្រើនណាស់ជាពិសេសគឺសម្ពាធគ្រួសារ សង្គម និងស្ថានភាពជីវភាពដែលខ្វះមុខខ្វះក្រោយពិបាកឱ្យនាងប្រមូលកម្លាំងបានច្រើនក្នុងអាជីពជាអ្នកប្រដាល់ ។
អេ យ៉ានុត ធ្លាប់បានប្រកាសថា នាងបានប្រឡូកការប្រដាល់ក្នុងពេលអតីតកាល គឺមិនមែនចង់ក្លាយជាអ្នកប្រដាល់ល្បីឈ្មោះណាមួយនោះទេ គឺគ្រាន់តែចង់បានលុយ និងចង់ដឹងថាតើសមត្ថភាពរបស់នាងអាចឈានដល់កម្រិតណាបើឡើងប្រដាល់នៅលើសង្វៀនប៉ុណ្ណោះ ។
នាងថា ក្នុងពេលប្រឡូកការប្រដាល់កាលពីវ័យកុមារភាពគឺមានសម្ពាធច្រើនណាស់ ដោយលោកតាលោកយាយរបស់នាងមានការជំទាស់យ៉ាងខ្លាំង ដោយសារតែនាងគឺជាកូនស្រីតែម្នាក់របស់លោក អេ ភូថង ហើយមិនមានការគាំទ្រពីសំណាក់បងប្អូនស្ទើរតែទាំងស្រុងនៅពេលនាងចាប់យកការប្រដាល់ ។ យ៉ាងណាក៏ស្ថានភាពនាពេលនោះគឺម្ដាយរបស់នាងក៏មានបញ្ហាខ្វះខាត និងពិបាកឱ្យនាងបានរៀនដិតដល់ផងដែរ ទើបនាងត្រូវតែឡើងប្រដាល់ដើម្បីយកលុយមកឱ្យម្ដាយផង ទៅសាលាផងកុំឱ្យពិបាក ។ នៅក្នុងពេលនោះនាងថាទទួលរងនូវសម្ពាធយ៉ាងខ្លាំង ក្នុងពេលនាងត្រូវការចេះប្រដាល់ដើម្បីជួយរកលុយគ្រួសារ តែការហក់ចូលប្រឡូករបស់នាងបែរជាមានការជំទាស់ពីសំណាក់សាច់ញាតិបងប្អូន និងជាពិសេសគឺពីមនុស្សនៅជុំវិញខ្លួននាង ។
យ៉ាងហោចជាងពាក់កណ្ដាលអ្នករៀនជាមួយនាងមិនសូវឱ្យតម្លៃលើអាជីពរបស់នាងទេ ដោយអ្នកខ្លះមិនសូវហ៊ានស្និទ្ធស្នាលជាមួយនាង និងមិនសូវហ៊ានបង្ករឿងជាមួយនាងនោះផង ដោយសារតែគេដឹងថានាងគឺជាអ្នកប្រដាល់ដែលច្បាស់ណាស់ថាពិតជាធ្វើឱ្យពួកគេមានបញ្ហាបើជិតស្និទ្ធនឹងនាងពេក ឬមានបញ្ហាជាមួយនាង ។ អេ យ៉ានុត បានអះអាងថានាងទទួលរងនូវការរើសអើងពីអាជីពមួយនេះមិនតិចនោះទេ ប៉ុន្តែក្រោយពេលដែលនាងមានឈ្មោះបោះសំឡេងនៅក្នុងអាជីពប្រដាល់ក៏មានអ្នកសរសើរច្រើនជាងការខ្លាចរអាជំនួសផងដែរ បើទោះជាមានអ្នកខ្លះនៅតែមិនចង់ឃើញនាងប្រឡូកការងារមួយនេះទាំងវ័យក្មេង ។ នាងបានប្រឡូកការប្រដាល់លើរេញតាំងពីវ័យ១២ឆ្នាំ ហើយក្នុងពេលដែលនាងចង់បានលុយខ្លាំងគឺបានទាំងប្រឹងបង្កើនអាយុឱ្យច្រើនដើម្បីមានគូប្រដាល់ជាមួយដើម្បីកុំឱ្យគេថានាងក្មេងពេក ព្រោះតែចង់ជួយដល់គ្រួសារ ។
នាងមានប្រវត្តិឡើងប្រកួតជាមួយក្មេងស្រីដូចគ្នាស្ទើរតែរាប់ភ្លេចមកហើយ ប៉ុន្តែមិនមានការប្រដាល់ណាមួយធ្វើឱ្យនាងមានគ្រោះថ្នាក់ធ្ងន់នោះទេ ហើយ ដោយសារតែការប្រដាល់នាពេលកន្លងមកធ្វើឱ្យនាងទទួលបានផ្លែផ្កាជាវិជ្ជមានផង ទើបនាងចេះតែមានកម្លាំងចិត្តពីមួយដំណាក់កាលទៅមួយដំណាក់កាល ។ នាងថា ក្នុងការប្រឡូកប្រដាល់សេរីនាពេលកន្លងមក គឺនាងចេះច្រើនលើក្បាច់គុនបុរាណខ្មែរហើយក៏យល់ដឹងបច្ចេកទេសប្រកួតពីឪពុក និងពីម្ដាយដែលជាគ្រូបង្វឹកនោះផងដែរ ដែលកាន់តែធ្វើឱ្យនាងក្លាយជាកីឡាករ-កីឡាការិនីមួយរូបដែលមានការទទួលស្គាល់ ។ មកទល់ពេលនេះ គូប្រកួតរបស់នាងបានសម្រេចលាឈប់ពីអាជីពមួយនេះសឹងអស់ទៅហើយ ដោយអ្នកខ្លះបានឈប់ទៅមានគ្រួសារ អ្នកខ្លះទៅធ្វើការក្រៅប្រទេស និងអ្នកខ្លះសម្រេចចិត្តបោះបង់ទៅផ្សងព្រេងតាមកម្លាំងសម្មាអាជីវោរបស់ខ្លួនព្រោះតែការប្រដាល់យូរៗទើបមានឈ្មោះឡើងរេញម្ដង ដោយសារតែខ្សត់កីឡាការិនីឆ្លាស់គ្នាឡើងប្រកួត ហើយក្នុងពេលឡើងប្រកួតម្ដងៗក៏ទទួលបានប្រាក់កម្រៃមិនច្រើន ។ នាងអះអាងថា ហេតុផលដែលធ្វើឱ្យនាងនៅតែបន្តការប្រដាល់បានរហូតមកដល់ពេលនេះ គឺដោយសារតែមានឪពុក និងម្ដាយជាអ្នកជំរុញ ហើយដោយសារតែនាងបានបង្កើនសមត្ថភាពបន្ថែមពីលើការប្រដាល់នោះផង ទើបនាងកាន់តែទទួលជោគជ័យនៅក្នុងវិស័យកីឡា ។
អេ យ៉ានុត ត្រូវបានគេដឹងថា បានបង្កើនការហ្វឹកហាត់ក្បាច់គុនល្បុក្កតោ ហ្វឹកហាត់ក្បាច់គុនប្រដាល់សាកល និងហ្វឹកហាត់ក្បាច់ប្រដាល់ដាក់ទ្រុងជាដើម ដែលកាន់តែធ្វើឱ្យនាងក្លាយជាកីឡាការិនីវ័យក្មេងមួយរូបដែលមានក្បាច់គុនច្រើនប្រភេទក្នុងខ្លួន ។ ម្ដាយរបស់នាងបានអះអាងថា នាងបត់បែនស្ទើរតែគ្រប់ស្ថានការណ៍ដោយសារតែក្នុងពេលសហព័ន្ធត្រូវការឱ្យចេញប្រកួតខាងផ្នែកល្បុក្កតោ ក៏ចេញប្រកួតល្បុក្កតោ ហើយបើមានការតម្រូវឱ្យប្រកួតប្រដាល់សាកលក៏ចេញហ្វឹកហាត់ប្រដាល់សាកល និងមុននេះបន្តិចក៏មានការប្រដាល់ដាក់ទ្រុង MMA នាងក៏បានឡើងរេញជាមួយកីឡាការិនីក្នុងស្រុក និងបរទេសនៅលើសង្វៀនដែលបានរៀបចំដោយអន្តរជាតិ ។ នាងធ្លាប់ប្រកួតជាមួយកីឡាការិនីចិនកាលពីខែកញ្ញា ឆ្នាំ២០១៧ ហើយបើទោះជាពេលនោះទទួលបរាជ័យក៏នាងនៅតែមានការទទួលស្គាល់ពីសមត្ថភាពសម្រាប់ប្រភេទកីឡាប្រដាល់ដាក់ទ្រុង ។
នាងហាក់ស្រវាស្រទេញនៅក្នុងតួនាទីជាអ្នកប្រដាល់លើឆាកអន្តរជាតិក្នុងព្រឹត្តិការណ៍ប្រដាល់ដាក់ទ្រុង និងប្រដាល់ក្បាច់គុនសេរីនៅក្នុងប្រទេសថៃច្រើន បន្ទាប់ពីការប្រដាល់ក្នុងស្រុករបស់នាងស្ទើរតែគ្មានកីឡាការិនីមកប្រកួតជាមួយ និងមិនមានស្ថានីយទូរទស្សន៍ណាមួយរៀបចំការប្រដាល់រវាងនារី និងនារីនាពេលចុងក្រោយ ។
យ៉ាងណាមិញ អេ យ៉ានុត មិនបានបោះបង់ការប្រកួតនោះទេ ដោយនាងគឺជាសិស្សថ្នាក់ទី១១នៅវិទ្យាល័យបាក់ទូកក្នុងពេលចូលកងវិញនេះផង ។ អ្វីដែលគួរឱ្យកត់សម្គាល់គឺថានាងមិនមែនជាសិស្សទទួលបានចំណាត់ថ្នាក់បាតតារាងក្នុងពេលនាងបានក្លាយជាអ្នកប្រដាល់យ៉ាងពេញទំហឹងនោះទេ គឺនាងនៅតែទទួលបានចំណាត់ថ្នាក់ល្អក្នុងការសិក្សា ដោយសារតែនាងបែងចែកច្បាស់លាស់រវាងការសិក្សា និងការប្រដាល់ ។ អេ យ៉ានុត ធ្លាប់បានបញ្ជាក់ថា ទោះបីនាងជាកូនស្រីនៅក្នុងគ្រួសារ តែនាងនឹងធ្វើឱ្យកេរ្តិ៍ឈ្មោះរបស់ខ្លួនបានស្នងតំណែងរបស់ឪពុក បន្ទាប់ពីអាជីពប្រដាល់របស់នាងមានការឈានឡើងហើយធ្វើឱ្យនាងសប្បាយចិត្ត ។ នាងនឹងសកម្មក្នុងការហ្វឹកហាត់ប្រដាល់សាកលផងដែរដើម្បីត្រៀមខ្លួនក្នុងពេលកម្ពុជាធ្វើជាម្ចាស់ផ្ទះព្រឹត្តិការណ៍ស៊ីហ្គេមឆ្នាំ២០២៣ ដោយសារតែប្រដាល់សាកលគឺជាវិញ្ញាសាចាំបាច់ដែលក្នុងព្រឹត្តិការណ៍ស៊ីហ្គេមត្រូវតែមាន ។
អេ យ៉ានុត ប្រកាសថា នាងនឹងផ្អាកការប្រដាល់មួយរយៈក្នុងពេលដែលនាងឈានដល់ថ្នាក់ទី១២ ខណៈក្នុងអំឡុងនាងរៀនថ្នាក់ទី១១ឆ្នាំនេះ ក៏នាងអាចយកចិត្តទុកដាក់ជាមួយនឹងការសិក្សាឱ្យច្រើនផងដែរ ដើម្បីកុំឱ្យពេលនាងឈានដល់ការប្រឡងថ្នាក់ជាតិគឺមិនមានបញ្ហា ។
អេ យ៉ានុត អះអាងថា នាងឆ្លងកាត់ការលំបាកមិនតិចនោះទេ ក្នុងពេលដែលនាងតស៊ូនៅក្នុងការប្រដាល់ក្នុងបរិបទដែលមនុស្សនៅជុំវិញខ្លួន និងគ្រួសាររបស់នាងផ្ទាល់ក្រៅពីឪពុកម្ដាយគឺសុទ្ធតែជំទាស់ ។ នាងថា មកទល់ពេលនេះសាច់ញាតិរបស់គ្រួសារនាងលែងដាក់សម្ពាធជុំវិញការប្រឡូកការប្រដាល់របស់នាងទៀតហើយ តែនាងចាប់ផ្ដើមមានការប្រឈមខ្ពស់ក្នុងពេលដែលនាងឡើងប្រកួតម្ដងៗរមែងមានការរិះគន់ប្រសិនបើនាងប្រកួតចាញ់ ។ នាងថា សម្ពាធក្នុងអាជីពរបស់នាងគឺកាន់តែល្បីតែមានការចាប់អារម្មណ៍ ហើយនាងមានការតូចចិត្តដែលនាងប្រឹងវាយដោយមិនខ្វល់ពីបញ្ហាគ្រោះថ្នាក់ ប៉ុន្តែបើនាងប្រកួតចាញ់គឺខ្វះការលើកទឹកចិត្ត និងការគាំទ្រ ដោយមានតែការយល់ថានាងប្រកួតមិនកើតបែបនេះបែបនោះ។ នាងអះអាងថា កីឡាករ-កីឡាការិនីម្នាក់អត់មានចង់ចាញ់នោះទេ ប៉ុន្តែស្ថានភាពរបបអាហារ និងការថែបំប៉នសុខភាពមិនគ្រប់គ្រាន់រាល់ថ្ងៃ គឺជារឿងពិបាកបំផុតសម្រាប់អាជីពមួយនេះ។
យ៉ាងណាមិញ នាងមានអារម្មណ៍សប្បាយចិត្តដែលមានឪពុកជាអតីតអ្នកប្រដាល់ហើយបច្ចុប្បន្នបានក្លាយជាគ្រូបង្វឹកផង និងជាអ្នកអត្ថាធិប្បាយការប្រដាល់នៅប៉ុស្ដិ៍លេខ៥ផង ព្រមទាំងមានម្ដាយជាគណៈកម្មការផ្ដល់ពិន្ទុនៅសង្វៀនប៉ុស្ដិ៍បាយ័ន ដែលតែងតែលើកទឹកចិត្ត ក្នុងពេលដែលប្អូនៗរបស់នាងក៏ជំរុញឱ្យចង់ក្លាយជាអ្នកប្រដាល់កាន់តែខ្លាំងថែមទៀត ។ នាងមិនខ្វល់នឹងគេថា នារីវ័យក្មេងប្រឡូកការប្រដាល់គឺងាយប៉ះពាល់អនាគតនោះទេ ដោយនាងយល់ថា ខ្លួននៅតែមានអារម្មណ៍ទន់ភ្លន់មិនខុសពីនារីធម្មតា និងថានារីដែលប្រឡូកការប្រដាល់សុទ្ធតែមានចរឹតប្រុសគឺមិនទាំងអស់នោះទេ ដោយសារតែនាងស្រឡាញ់ការប្រដាល់ដូចឪពុក តែចិត្តគំនិតរបស់នាងគឺមិនខុសពីយុវតីទាំងពួងទេ ៕
ចែករំលែកព័តមាននេះ