ខេត្តកោះកុង ៖ បន្ទាប់ពីកោះសន្តិភាពបានចុះផ្សាយកាលពីដើមខែមីនា ឆ្នាំ២០២៣ អំពីករណីមេខ្យល់វៀតណាម២នាក់ប្តីប្រពន្ធនាំទូកនេសាទវៀតណាមរាប់រយគ្រឿងចូលមកនេសាទក្នុងសមុទ្រកម្ពុជា ជាពិសេស ក្នុងដែនសមុទ្រខេត្តកោះកុង ជាថ្នូរនឹងការបង់ប្រាក់ប្រចាំខែ ជូនសមត្ថកិច្ចទាំង៣ស្ថាប័ន គឺសមត្ថកិច្ចជលផលសមុទ្រ…
ខេត្តកោះកុង ៖ បន្ទាប់ពីកោះសន្តិភាពបានចុះផ្សាយកាលពីដើមខែមីនា ឆ្នាំ២០២៣ អំពីករណីមេខ្យល់វៀតណាម២នាក់ប្តីប្រពន្ធនាំទូកនេសាទវៀតណាមរាប់រយគ្រឿងចូលមកនេសាទក្នុងសមុទ្រកម្ពុជា ជាពិសេស ក្នុងដែនសមុទ្រខេត្តកោះកុង ជាថ្នូរនឹងការបង់ប្រាក់ប្រចាំខែ ជូនសមត្ថកិច្ចទាំង៣ស្ថាប័ន គឺសមត្ថកិច្ចជលផលសមុទ្រ សមត្ថកិច្ចប៉ូលិសជើងទឹក និងសមត្ថកិច្ចទាហានជើងទឹក ចន្លោះចាប់ពី1000$ឡើងទៅ ក្នុងទូកមួយគ្រឿងអស់រយៈពេលយូរឆ្នាំកន្លងមកហើយនោះ គេសង្កេតឃើញក្រសួងមហាផ្ទៃ ក៏បានមានចំណាត់ការជាបន្ទាន់ភ្លាមៗដែរ ដើម្បីបើកការស្រាវជ្រាវករណីល្មើសច្បាប់ខាងលើ ។
ប៉ុន្តែរហូតមកទល់ពេលនេះ អស់រយៈពេលពេញមួយខែហើយ ចំណាត់ការទប់ស្កាត់បទល្មើសនេសាទសមុទ្ររបស់ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ហាក់ដូចជាគ្មានប្រសិទ្ធិភាពនៅឡើយ ។ ផ្ទុយទៅវិញ មេខ្យល់ជនជាតិវៀតណាម២នាក់ប្តីប្រពន្ធ ដែលមកស្នាក់នៅអចិន្ត្រៃយ៍ខុសច្បាប់ក្នុងទឹកដីខេត្តកោះកុងខាងលើ កាន់តែផ្គើនឡើងថែមទៀត ហើយសំរុកនាំទូកនេសាទយួនចូលកាន់តែច្រើន រួចបង់លុយជាថ្នូរនឹងការធ្វើនេសាទខុសច្បាប់ អោយសមត្ថកិច្ចខ្មែរទាំង៣ស្ថាប័នគ្មានញញើតឡើយ ។
ករណីនេះ ធ្វើអោយប្រជានេសាទខ្មែរត្អូញត្អែរប្រាប់កោះសន្តិភាពថា មិនអាចចេញទៅនេសាទបានដូចពេលមុនៗ និងជីវភាពកាន់តែដុនដាបទៅៗ ព្រោះតែរកប្រាក់បង់អោយធនាគារលែង
បាន ។
មន្ត្រីអាជ្ញាធរស្រុកគីរីសាគរជាច្រើននាក់បានបញ្ជាក់ថា ក្នុងរយៈពេលមួយសប្តាហ៍ចុងក្រោយនេះ គេសង្កេតឃើញទូកប្រជានេសាទខ្មែរបានវិលត្រឡប់មកផ្ទះវិញរាប់សិបគ្រឿង ដោយពុំឃើញបានផលនេសាទមកជាមួយឡើយ ។ ប្រជានេសាទទាំងនោះបានលើកឡើងថា ពួកយើងនេសាទមិនឈ្នះទូកយួនទេ ព្រោះឧបករណ៍នេសាទយួនទំនើប ហើយលឿនជាងឧបករណ៍ទូកនេសាទខ្មែរ ។ ម្យ៉ាងទៀត ទូកនេសាទយួនកាន់តែមានចំនួនច្រើនឡើងៗស្ទើរតែពាសពេញលើផ្ទៃសមុទ្រ ហេតុនេះមានតែសំរេចចិត្តវិលត្រឡប់មកផ្ទះវិញ ដេករង់ចាំថ្ងៃបោះឆ្នោតមកដល់ ក្រែងរាជរដ្ឋាភិបាលថ្មីអាចដេញទូកនេសាទយួនចេញវិញបានខ្លះ ។
លោក ចេង មុន្នីរិទ្ធ អភិបាលស្រុកគីរីសាគរបានបញ្ជាក់ប្រាប់កោះសន្តិភាពតាមទូរស័ព្ទថា ការចូលមកធ្វើនេសាទក្នុងដែនសមុទ្រកម្ពុជា ពីសំណាក់ទូកនេសាទបរទេស (ទូកយួន) មិនមែនជាសមត្ថកិច្ចរបស់លោកឡើយ ។ លោកមានសិទ្ធិទទួលខុសត្រូវ តែក្នុងតំបន់សហគមន៍នេសាទប៉ុណ្ណោះ ។ ទន្ទឹមនេះដែរ កោះសន្តិភាពបានព្យាយាមទំនាក់ទំនងទូរស័ព្ទទៅលោកពុំ សុថា អគ្គនាយកជលផលសមុទ្រកម្ពុជា លោកឧត្តមនាវីទោ ឯក សំអាន បញ្ជាការរងវរៈការពារលំហសមុទ្រ ទទួលបន្ទុកកិច្ចការបង្ក្រាបបទល្មើសលើផ្ទៃសមុទ្រ និងលោកវរសេនីយ៍ឯក ស៊ិន ដារ៉ូ មេបញ្ជាការ វរសេនាតូចលេខ២៦៩ នគរបាលការពារព្រំដែនទឹក ប្រចាំខេត្តកោះកុង ដើម្បីបំភ្លឺជុំវិញករណីបើកដៃអោយទូកនេសាទយួន ចូលនេសាទក្នុងដែនសមុទ្រខ្មែរ ដ៏ច្រើនសន្ធឹកសន្ធាប់នោះ តែទូរស័ព្ទសុទ្ធតែមិនអាចទំនាក់ទាក់ទំនងបាន ។
គួររំលឹកថា ដោយសារតែសមត្ថកិច្ចពាក់ព័ន្ធទាំង៣ស្ថាប័នខាងលើ សង្ស័យនៅតែជាមន្ត្រីគិតតែប្រយោជន៍ផ្ទាល់ខ្លួន ធំជាងប្រយោជន៍បក្សប្រយោជន៍ជាតិ និងជាពិសេសជឿជាក់ថា គុណវិបត្តិដែលខ្លួនបានប្រព្រឹត្តិកន្លងមកនេះ គ្មានអ្នកណាដឹង គ្មានអ្នកណាមើលឃើញ ទើបមិនព្រមកែខ្លួន ធ្វើអោយប្រជាជាតិទាំងមូលនៅបន្តជាប់ឈ្មោះជាប្រទេសជាប់ក្នុងបញ្ជីខ្មៅ ឬកាតក្រហមពីបណ្តាប្រទេសសហភាពអឺរ៉ុបចោទថា ជាប្រទេសការធ្វើនេសាទដោយគ្មានច្បាប់អនុញ្ញាតនិងគ្មានរបាយការណ៍ ជាមួយនឹងដែនសមុទ្រអន្តរជាតិ ហើយផលនេសាទសមុទ្រកម្ពុជា ត្រូវបានបិទមិនអោយជនចូលទៅកាន់ទីផ្សារសហភាពអឺរ៉ូបឡើយ ។
ព័ត៌មានបន្ថែមនឹងមានផ្សាយជូនលើទំព័រកាសែតកោះសន្តិភាព ។
ចែករំលែកព័តមាននេះ