ខេត្តស្វាយរៀង ៖ ក្រុមការងារបច្ចេកទេសក្រសួងសាធារណៈការ និងដឹកជញ្ជូន សហការជាមួយមន្ត្រីមន្ទីរសាធារណការនិងដឹកជញ្ជូនខេត្តស្វាយរៀង បានចុះឃាត់រថយន្តដឹកទំនិញធុនយក្ស ដែលធ្វើចរាចរណ៍នៅលើដងផ្លូវជាតិលេខ១ ថ្លឹងពិនិត្យទម្ងន់ រកឃើញរថយន្តល្មើស១២គ្រឿងធ្វើការផាកពិន័យ ។…
ខេត្តស្វាយរៀង ៖ ក្រុមការងារបច្ចេកទេសក្រសួងសាធារណៈការ និងដឹកជញ្ជូន សហការជាមួយមន្ត្រីមន្ទីរសាធារណការនិងដឹកជញ្ជូនខេត្តស្វាយរៀង បានចុះឃាត់រថយន្តដឹកទំនិញធុនយក្ស ដែលធ្វើចរាចរណ៍នៅលើដងផ្លូវជាតិលេខ១ ថ្លឹងពិនិត្យទម្ងន់ រកឃើញរថយន្តល្មើស១២គ្រឿងធ្វើការផាកពិន័យ ។
ករណីនេះ បានកើតឡើងនៅព្រឹកថ្ងៃទី២៩ មីនា ២០២៣ ស្ថិតនៅលើកំណាត់ផ្លូវជាតិលេខ១ ត្រង់ចំណុចច្រមុះជ្រូករូបគោ២ ស្ថិតនៅភូមិឃោសាងសង្កាត់ស្វាយតឿ ក្រុងស្វាយរៀង។ បើតាមក្រុមអាជីវករដឹកស្រូវម្នាក់បានលើកឡើងថា គាត់ជាអាជីវករអ្នកប្រមូលទិញស្រូវពីប្រជាពលរដ្ឋនៅខេត្តកំពង់ធំ ដឹកតាមរថយន្តមកលក់នៅច្រកទ្វាអន្តរជាតិព្រៃវល្ល៍ស្រុកកំពង់រោទ៌ ។
រថយន្តរបស់គាត់គឺប្រភេទវ៉េអងផ្ទុកទម្ងន់៣៥តោន ក៏ប៉ុន្តែបើខ្លួនដឹកតាមទម្ងន់កំណត់គឺគ្មានចំណេញទេ ដោយបុរសរូបនេះលើកឡើងថា ស្រូវទិញពីប្រជាពលរដ្ឋផ្ទាល់ហើយដឹកមកដល់កំពង់ទូកលក់ឲ្យវៀតណាមគឺក្នុង១គីឡូ ចំណេញបាន៣០រៀល គិតជាលុយខ្មែរ ដូច្នេះចំណេញសរុប ១,០៥,០០០រៀល ។
ហើយទូទាត់ការចំណាយ សេវា សមត្ថកិច្ចតាមដងផ្លូវពីខេត្តកំពង់ធំ ដល់ចំណតទូកអស់ ២៥០,០០០រៀល ចំណាយទៅលើ ប្រេងម៉ាស៊ូត ទៅមក៩០លីត្រ អស់៤២០,០០០រៀល (ចំណាយសរុប៦៧០,០០០រៀល) នៅសល់ប្រាក់ចំណេញសុទ្ធតែ៣៨០,០០០រៀលប៉ុណ្ណោះ ហើយកាត់ចំណាយលើ អាហារហូបចុក៨០,០០០រៀលនៅសល់ ៣០០,០០០រៀលគត់ ប្រសិនថ្ងៃណារថយន្តខូចរកតែប្រាក់បាយទឹកក៏គ្មានដែរ ទើបដឹកលើស១០តោន បាន៣០០,០០០រៀល ចំណេញបាន៦០០,០០០រៀល ទើបទប់ការចំណាយលើប្តូរប្រេងម៉ាស៊ីននិងប្តូសំបករថយន្ត ។
ក៏ប៉ុន្តែនូវពេលណា សមត្ថកិច្ចក្រសួងចុះដាក់ជញ្ជីងចល័តចាប់ គឺផាកពិន័យលើសទម្ងន់១០តោន គិតក្នុង១តោន៣០ម៉ឺនX១០តោន=៣,០០០,០០០រៀល ដូច្នេះ រកតែលុយផឹកទឹកសុទ្ធគ្មានផង។
ទាក់ទិនករណីនេះដែរ មន្ត្រីមន្ទីរសាធារណការនិងដឹកជញ្ជូនខេត្តស្វាយរៀងម្នាក់ សុំមិនបញ្ចេញឈ្មោះបានបង្ហើបឲ្យដឹងថា ការឃាត់រថយន្តដឹកទំនិញលើសទម្ងន់នេះ គឺក្រុមការងារបច្ចេកទេស (ជញ្ជីងចល័ត) ក្រសួងសាធារណៈការ ចុះពិនិត្យទម្ងន់យានយន្តដឹកទំនិញដឹកស្រូវ ដឹកថ្ម ដឹកខ្សាច់ ដឹកដី ។ល។ លើសទម្ងន់ធ្វើការផាកពិន័យ និងអប់រំធ្វើកិច្ចសន្យាឲ្យបញ្ឈប់ការដឹកលើសទម្ងន់។
ប្រភពបន្តទៀតថា ការចុះពិនិត្យឃើញថា មានរថយន្តផ្ទុកទំនិញលើទម្ងន់គឺចំនួន១២គ្រឿង ក្នុងនោះ រថយន្តបែនដឹកខ្សាច់៤គ្រឿង និងរថយន្តយីឌុបប្រភេទវ៉េអង៨គ្រឿង គឺមានលើសទម្ងន់ចាប់ពី៥តោនទៅ១០តោន ហើយបើលើសត្រឹម៥តោនសមត្ថកិច្ចយើងអនុគ្រោះ គឺបង់ធម្មតា ក៏ប៉ុន្តែបើលើសពី១០តោនឡើងទៅគឺត្រូវផាកពិន័យក្នុង១តោន៣០០,០០០រៀល។
ចំពោះមហាជនបានសាទរចំណាត់ការរបស់សមត្ថកិច្ចដែលអនុវត្តច្បាប់ ផាកពិន័យលើរថយន្តល្មើស ដឹកទំនិញលើសទម្ងន់ដែលបង្កឲ្យស្រុតខូចផ្លូវជនបទត្រូវតែបង្ក្រាប ។ ចំណែកក្រុមអាជីវករវិញបានសំណូមពរថា បើម្ចាស់រថយន្តដឹកទំនិញតាមទម្ងន់ដែលច្បាប់កំណត់ (អត់លើសទម្ងន់) សូមសមត្ថកិច្ចតាមដងផ្លូវឈប់ដាក់កុងត្រូលយកប្រាក់ពីប្រជាពលរដ្ឋ ។
ចែករំលែកព័តមាននេះ