កម្ពុជាដណ្ដើមបានមេដាយ៩គ្រឿងពីការប្រកួតបើកឆាកជើងឯកអាស៊ីអាគ្នេយ៍លើកទី៦កីឡាវ៉ូវីណាម
- ភ្នំពេញ
រាជធានីភ្នំពេញ ៖ ក្នុងនាមម្ចាស់ផ្ទះ កម្ពុជាដណ្ដើមបានមេដាយចំនួន៩គ្រឿងក្នុងថ្ងៃប្រកួតបើក
រាជធានីភ្នំពេញ ៖ ក្នុងនាមម្ចាស់ផ្ទះ កម្ពុជាដណ្ដើមបានមេដាយចំនួន៩គ្រឿងក្នុងថ្ងៃប្រកួតបើកឆាកនៃព្រឹត្តិការណ៍កីឡាវ៉ូវីណាមជ្រើសរើសជើងឯកអាស៊ីអាគ្នេយ៍លើកទី៦ ជាហេតុធ្វើឱ្យកម្ពុជាមានចំណាត់ថ្នាក់នាំមុខគេជាបណ្ដោះអាសន្នក្នុងចំណោម៧ប្រទេសចូលរួម។
ព្រឹត្តិការណ៍ប្រកួតថ្នាក់តំបន់មួយនេះតាមកាលបរិច្ឆេទត្រូវធ្វើឡើងចាប់ពីថ្ងៃទី២៥ដល់ថ្ងៃទី៣០ ខែមីនា នៅសាលដំបូលទូកក្នុងបរិវេណសាកលវិទ្យាល័យភូមិន្ទភ្នំពេញ ។ ប៉ុន្តែទើបតែប្រកាសបើកការប្រកួតជាផ្លូវការកាលពីល្ងាចថ្ងៃទី២៦ មីនា ដោយកម្ពុជាដណ្ដើមបានមេដាយ៩គ្រឿងក្នុងនោះមេដាយមាស៥គ្រឿង មេដាយប្រាក់២គ្រឿង និងមេដាយសំរឹទ្ធ២គ្រឿង ក្នុងចំណោម៦ប្រទេសផ្សេងទៀតចូលរួមមានដូចជា ថៃ វៀតណាម ឡាវ ឥណ្ឌូណេស៊ី មីយ៉ាន់ម៉ា និងហ្វីលីពីន ។ ប្រទេសវៀតណាមឈរនៅលេខរៀងទី២ដោយដណ្ដើមបានមេដាយចំនួន៦គ្រឿងនាំមុខប្រទេសថៃដែលដណ្ដើមបានមេដាយចំនួន៥គ្រឿង។
លោក អ៊ូ រតនា ប្រធានសហព័ន្ធកីឡាវ៉ូវីណាមកម្ពុជាបានឱ្យដឹងថា ការប្រកួតកីឡាវ៉ូវីណាមជ្រើសរើសជើងឯកអាស៊ីអាគ្នេយ៍លើកទី៦ដែលកម្ពុជាទទួលធ្វើជាម្ចាស់ផ្ទះនេះ គឺជាឱកាសដ៏ល្អ ដែលត្រូវរៀបចំខ្លួនឱ្យបានគ្រប់ជ្រុងជ្រោយ ក្នុងគោលបំណងសម្រួចគោលដៅសម្រាប់ព្រឹត្តិការណ៍កីឡាស៊ីហ្គេមឆ្នាំ២០២៣ ដែលកាន់តែខិតកៀកជិតមកដល់ទៅហើយនោះ ។ ការប្រកួតនេះទៀតទទួលបានការគាំទ្រពីគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ហៅកាត់ថា CAMSOC ក្រសួងអប់រំ យុវជន និងកីឡា ក៏ដូចជាសហព័ន្ធកីឡាវ៉ូវីណាមពិភពលោកផងដែរ។
លោក ម៉ុង គឹមហេង ប្រធានសហព័ន្ធកីឡាវ៉ូវីណាមអាស៊ីអាគេ្នយ៍បានលើកឡើងថា នេះជាលើកទី១ហើយដែលលោកបានមកចូលរួមការប្រកួតជ្រើសរើសជើងឯកកីឡាវ៉ូវីណាមអាស៊ីអាគ្នេយ៍ ក្នុងគោលបំណងដើម្បីវាស់ស្ទង់កម្រិតបច្ចេកទេសរបស់កីឡាករ កីឡាការិនី មន្ត្រីបច្ចេកទេស ចៅក្រម អាជ្ញាកណ្ដាលត្រៀមលក្ខណៈចូលរួមប្រកួតនិងដឹកនាំរៀបចំការប្រកួតកីឡាអាស៊ីអាគ្នេយ៍ឆ្នាំ២០២៣ ដែលកម្ពុជាទទួលធ្វើជាម្ចាស់ដែលនៅសល់តែ៣៨ថ្ងៃទៀតប៉ុណ្ណោះ ។ ដូច្នេះលោកសង្ឃឹមថា ការប្រកួតនេះវានឹងជួយបំពេញបន្ថែមនូវរាល់ចំណុចខ្វះខាត ដើម្បីជួយដល់កីឡាករ កីឡាការិនី គណៈកម្មការបច្ចេកទេស ក៏ដូចជាចៅក្រម អាជ្ញាកណ្ដាលយកទៅអនុវត្តស្របទៅតាមបទដ្ឋាននិងស្តង់ដារត្រឹមត្រូវនៅស៊ីហ្គេមឆ្នាំ២០២៣ ៕
ចែករំលែកព័តមាននេះ