ភូមិនិងសហគមន៍មួយចំនួននៅខណ្ឌពោធិ៍សែនជ័យកំពុងខ្វះខាតទឹកប្រើប្រាស់ ខណៈអាជ្ញាធរដឹកជញ្ជូនឱ្យទាំងយប់ទាំងថ្ងៃ (វីដេអូ)
- ភ្នំពេញ
រាជធានីភ្នំពេញ ៖ ភូមិនិងសហគមន៍មួយចំនួននៅខណ្ឌពោធិ៍សែនជ័យកំពុងខ្វះខាតទឹកស្អាត
រាជធានីភ្នំពេញ ៖ ភូមិនិងសហគមន៍មួយចំនួននៅខណ្ឌពោធិ៍សែនជ័យកំពុងខ្វះខាតទឹកស្អាត ដើម្បីប្រើប្រាស់យ៉ាងខ្លាំងនៅក្នុងរដូវប្រាំងឆ្នាំ២០២៣នេះ ដោយភូមិខ្លះពេលថ្ងៃបើកអត់ចេញសោះ ប៉ុន្តែពេលយប់ទឹកចេញអាចបើកប្រើប្រាស់បាន រីឯភូមិខ្លះទៀតដាច់ទាំងស្រុងបើកបង្ហូរអត់ចេញទាំងយប់ទាំងថ្ងៃតែម្ដង ។ ខណៈប្រជាពលរដ្ឋជួបការលំបាកបែបនេះ អាជ្ញាធរសង្កាត់ និងអាជ្ញាធរខណ្ឌពោធិ៍សែនជ័យ សហការណ៍ជាមួយអាជ្ញាធររាជធានីភ្នំពេញ បានដឹកជញ្ជូនយកទៅផ្គត់ផ្គង់ឲ្យប្រជាពលរដ្ឋតាមភូមិទាំងនោះទាំងយប់ទាំងថ្ងៃជាច្រើនថ្ងៃកន្លងមកហើយ។
យោងតាមប្រភពពីអាជ្ញាធរបានឲ្យដឹងថា រហូតមកទល់និងពេលនេះមានភូមិមួយចំនួន៥និងសហគមន៍ចំនួន៦ នៅក្នុងសង្កាត់ចំនួន៣របស់ខណ្ឌពោធិ៍សែនជ័យកំពុងជួបបញ្ហាដាច់ទឹកដែលបង្កឲ្យប្រជាពលរដ្ឋជួបការលំបាក ក្នុងនោះទី១-សង្កាត់ចោមចៅទី៣ មាន៣ភូមិគឺភូមិត្រពាំងពោធិ៍ ភូមិព្រៃព្រីងជើង១និងភូមិព្រៃទា ទី២-សង្កាត់សំរោងក្រោម មាន២ភូមិគឺភូមិព្រៃពពេល និងភូមិអណ្ដូងតាអន ទី៣-សង្កាត់ត្រពាំងក្រសាំងមាន៦សហគមន៍ ។ ក្រោយពីមានបញ្ហាដាច់ទឹកបែបនេះបានធ្វើឲ្យប្រជាពលរដ្ឋជួបការលំបាកខ្លាំង ប៉ុន្តែសាលាសង្កាត់ទាំងអស់ខាងលើរួមជាមួយសាលាខណ្ឌពោធិ៍សែនជ័យនិងសាលារាជធានីភ្នំពេញបានចាត់ចែងដឹកទឹកទៅចែកជូនប្រជាពលរដ្ឋនៅតំបន់ទាំងនោះទាំងយប់ទាំងថ្ងៃជាប្រចាំរៀងរាល់ថ្ងៃនិងច្រើនថ្ងៃមកហើយ។
លោកហៃ សុឃីម ចៅសង្កាត់សំរោងក្រោមបាននិយាយថា នៅក្នុងសង្កាត់របស់លោកមាន៣ភូមិក្នុងចំណោម១១ភូមិ ដែលបានដាច់ទឹកទាំងស្រុង ដែលត្រូវការផ្គត់ផ្គង់ជូនប្រជាពលរដ្ឋជាចាំបាច់គឺភូមិអណ្ដូងតាអន និងភូមិព្រៃពពេល ។ ដោយឡែកភូមិចំនួន៩ផ្សេងទៀតក៏ខ្វះដែរ ប៉ុន្តែខ្វះតែពេលថ្ងៃទេ លុះដល់ម៉ោង១ឬម៉ោង២យប់ឡើងទឹកចេញអ្នកភូមិអាចនាំគ្នាបើកបង្ហូរប្រើបានមិនដាច់ទាំងស្រុងនោះឡើយ ។
លោកចៅសង្កាត់បានប្រាប់បន្តទៀតថា ក្រុមការងារសង្កាត់លោកបានតាមដាននូវបញ្ហាដាច់ទឹកនេះនៅតាមបណ្ដាភូមិទាំងអស់ជាប់ជាប្រចាំផងដែរ ហើយក្រោមការដឹកនាំរបស់លោកសក់ កញ្ញារិទ្ធ អភិបាលខណ្ឌពោធិ៍សែនជ័យ។ ក្រុមការងារសង្កាត់សំរោងក្រោមបានរៀបចំដាក់ស៊ីទែនស្តុកទឹកនៅក្នុងភូមិអណ្ដូងតាអន និងភូមិព្រៃពពេល ដែលកំពុងជួបបញ្ហាដាច់ទឹក ដើម្បីស្តុកទឹកចែកជូនប្រជាពលរដ្ឋបង្ហូរយកទៅប្រើប្រាស់ ។ ក្រោយពីមានការដាក់ស៊ីទែនស្តុកទឹកជូនបែបនេះបានធ្វើឲ្យបងប្អូនប្រជាពលរដ្ឋមានការសប្បាយចិត្ត និងបាននាំគ្នាយកប៊ីដុង និងធុងទៅបង្ហូរយកទៅប្រើប្រាស់តាមផ្ទះរៀងៗខ្លួន។
លោកវ៉ា សាវឿន ចៅសង្កាត់ចោមចៅទី៣ បាននិយាយថា នៅសង្កាត់ចោមចៅមានភូមិចំនួន៣ក្នុងចំណោម១៤ភូមិដែលបានដាច់ទឹកទាំងស្រុងបើកអត់ចេញតែម្ដង ហើយសង្កាត់និងខណ្ឌបានដឹកទឹកយកទៅចែកជូនប្រជាពលរដ្ឋទាំងយប់ទាំងថ្ងៃរយៈពេល១អាទិត្យមកហើយ ។ ក្រៅពីនេះភូមិចំនួន១១ទៀតពេលយប់ឡើងអាចបើកប្រើប្រាស់បាន ហើយ អត់បញ្ហាទេ អ្នកភូមិបានបង្ហូរស្តុកទុកក្នុងអាងរបស់ពួកគាត់បានជាធម្មតាទេ៕
ចែករំលែកព័តមាននេះ