ផ្លូវការ! Spurs ចែកផ្លូវជាមួយលោក Conte ដែលបានហែកកេរ្តិ៍ក្លិប និងកីឡាករ
អង់គ្លេស ៖ ក្លិបបាល់ទាត់ Tottenham Hotspur កាលពីថ្ងៃទី២៦ ខែមីនា កន្លងទៅ បានប្រកាសចែក
អង់គ្លេស ៖ ក្លិបបាល់ទាត់ Tottenham Hotspur កាលពីថ្ងៃទី២៦ ខែមីនា កន្លងទៅ បានប្រកាសចែក
អង់គ្លេស ៖ ក្លិបបាល់ទាត់ Tottenham Hotspur កាលពីថ្ងៃទី២៦ ខែមីនា កន្លងទៅ បានប្រកាសចែកផ្លូវជាមួយនឹងលោក Antonio Conte អ្នកចាត់ការទូទៅក្រុមឈុតធំរបស់ខ្លួន បន្ទាប់ពីមានបញ្ហាមិនចុះសម្រុងដែលបង្កជាការបញ្ឆេះកំហឹងរវាងគ្នា ចាប់តាំងពីពេលបុរសជនជាតិអ៊ីតាលីរូបនេះបានធ្វើការអត្ថាធិប្បាយរិះគន់ចំពោះភាពទន់ខ្សោយនៃក្រុមរបស់គាត់ និងវប្បធម៌នៃការបរាជ័យនៅក្នុងក្លិបមួយនេះ។
លោក Antonio Conte បានក្លាយជាអ្នកចាត់ការក្រុមាន់ខ្នាយមាស Tottenham Hotspur កាលពីថ្ងៃទី០២ ខែវិច្ឆិកា ឆ្នាំ២០២១ កន្លងទៅ ដើម្បីមកជំនួសលោក Nuno Espirito Santo ដែលត្រូវបានបណ្តេញចេញពីតំណែង។
ក្រោមការដឹកនាំ៧៦ប្រកួតរបស់លោក Conte ពោលគឺឈ្នះ៤១ ស្មើ១២ និងចាញ់២៣ប្រកួត ដោយពុំឈ្នះពានរង្វាន់អ្វីទាល់តែសោះ ខណៈដែលបច្ចុប្បន្ន ពួកគេនៅសល់តែការប្រកួតក្នុងលីគកំពូលអង់គ្លេស Premier League តែប៉ុណ្ណោះ ដែលកំពុងឈរនៅចំណាត់ថ្នាក់លេខ៤ ក្រោយឆ្លងកាត់២៨ប្រកួតកន្លងទៅ តាមពីក្រោយក្រុមកំពូលតារាង Arsenal រហូតដល់២០ពិន្ទុឯណោះ។ ដូច្នេះពួកគេត្រូវធ្វើការប្រកួតប្រជែងដណ្តើមកៅអីលេងក្របខណ្ឌ UEFA Champions League សម្រាប់រដូវកាលក្រោយ។
ការសម្រេចបញ្ចប់តំណែងលោក Conte ត្រូវបានមើលឃើញថា កើតឡើងបន្ទាប់ពីអ្នកចាត់ការរូបនេះបានហែកកេរ្តិ៍កីឡាកររបស់គាត់ បន្ទាប់ពីលទ្ធផលស្មើគ្នា ៣-៣ នៅលើទឹកដីក្រុម Southampton កាលពីថ្ងៃសៅរ៍សប្តាហ៍មុន ដោយលោកបានហៅពួកគេថា អាត្មានិយម និងបន្ទោសពួកគេចំពោះការរាំងស្ទះដល់ការឈ្នះពានរង្វាន់សម្រាប់ក្លិប។
ដំបូងឡើយគេរំពឹងយ៉ាងទូលំទូលាយថា លោក Conte នឹងចាកចេញនៅពេលកិច្ចសន្យាគាត់ផុតកំណត់នៅបញ្ចប់រដូវកាលនេះ។ ប៉ុន្តែក្រោយការផ្ទុះមានរឿងរកាំរកួសរួចមក គ្រប់គ្នាយល់យ៉ាងច្បាស់ថា កីឡាករក្នុងក្រុមភាគច្រើនមិនសប្បាយចិត្តចំពោះវត្តមានអ្នកចាត់ការរូបនេះ និងចង់គាត់ចាកចេញភ្លាមៗតែម្តង។
ជំនួយការរយៈពេលវែងរបស់លោក Conte គឺលោក Cristian Stellini នឹងក្លាយជាគ្រូបង្វឹកបណ្តោះអាសន្នសម្រាប់រដូវកាលដែលនៅសល់ ដោយមានលោក Ryan Mason ជាជំនួយការរបស់គាត់ ខណៈដែលក្លិបកំពុងតែផ្តោតយ៉ាងខ្លាំងលើលោក Julian Nagelsmann ដែលទើបតែត្រូវបានក្លិប Bayern Munich បណ្តេញចេញពីតំណែងកាលពីថ្ងៃទី២៤ មីនា កន្លងទៅថ្មីៗនេះ ដើម្បីមកធ្វើជាអ្នកចាត់ការអចិន្ត្រៃយ៍របស់ខ្លួន៕ (ដកស្រង់ចេញពី The Guardian)
ចែករំលែកព័តមាននេះ