កាលពីពេលថ្មីៗនេះ រឿងរ៉ាវក្តៅគគុកមួយបានកើតឡើង បន្ទាប់ពី លោកស្រី ម៉ន ដានី ស្ថាបនិកបុរី ក្រុមហ៊ុន ម៉នដានី រៀលអ៊ីស្ទេត ឯ.ក និងស្វាមីជនជាតិឡាវ សញ្ញាត្តិខ្មែរ បានធ្វើការ Live លើបណ្តាញសង្គមហ្វេសប៊ុក និងស្រែកទ្រហោយំ ថា
រាជធានីភ្នំពេញ៖ កាលពីពេលថ្មីៗនេះ រឿងរ៉ាវក្តៅគគុកមួយបានកើតឡើង បន្ទាប់ពី លោកស្រី ម៉ន ដានី ស្ថាបនិកបុរី ក្រុមហ៊ុន ម៉នដានី រៀលអ៊ីស្ទេត ឯ.ក និងស្វាមីជនជាតិឡាវ សញ្ញាត្តិខ្មែរ បានធ្វើការ Live លើបណ្តាញសង្គមហ្វេសប៊ុក និងស្រែកទ្រហោយំ ថា លោកស្រី និងស្វាមី ឈ្មោះ ឃុនថាវង្ស ផងផាន់ បានចំណាយលុយ ១២លាន ៧សែនដុល្លារ ទិញដី ១០០ហិកតា នៅស្រុកគងពិសី ខេត្តកំពង់ស្ពឺ តែមិនបានប្លង់ និងស្នើសុំដល់ថ្នាក់ដឹកនាំ មេត្តាជួយរកយុត្តិធម៌ បង្កនូវការភ្ញាក់ផ្អើលជាខ្លាំង។
យ៉ាងណាមិញ សំណួរដែលគួរពិចារណាមួយនោះ គឺថា KP ម៉ន ដានី ថា ចាយលុយអស់ ១២,៧ លានដុល្លារអត់បានប្លង់ តើពិតមែនក៏អី?
យោងតាមលិខិតជូនដំណឹងជាសាធារណៈរបស់មេធាវី វិញ គីមលី ដែលធ្វើកិច្ចតំណាងដោយអាណ្ណត្តិ សម្រាប់ម្ចាស់ដី ដែលមានឈ្មោះ សូ សុវណ្ណ អៀម បូផារី និងឈ្មោះ សូ លីតា ដែលបានផ្ញើជូនម្ចាស់បុរី ម៉ន ដានី គម្រោងទី២៩ ដែលមានទីតាំងស្ថិតនៅស្រុកគងពិសី ខេត្តកំពង់ស្ពឺ បានឱ្យដឹងថា ឈ្មោះ ម៉ន ដានី និងប្តីឈ្មោះ ឃុនថាវង្ស ផងផាន់ បានទិញដី ទំហំ ១០០ ហិកតា ពីឈ្មោះ សូ សុវណ្ណ និងឈ្មោះ អៀម បូផារី និងឈ្មោះ សូ លីតា ដែលជាអ្នកលក់ដី ក្នុងតម្លៃសរុប ៣៥ លានដុល្លារអាមេរិក (សាមសិបប្រាំលាន ដុល្លារអាមេរិក) តាមកិច្ចសន្យាទិញ-លក់ អចលនវត្ថុ ចុះថ្ងៃទី ១៤ ខែធ្នូ ឆ្នាំ២០២០ និងកិច្ចព្រមព្រៀងស្តីពីការកែប្រែកិច្ចសន្យាលក់-ទិញ អចលនវត្ថុ ចុះថ្ងៃទី ១៣ ខែឧសភា ឆ្នាំ២០២២ បានបង្ហាញឱ្យឃើញថា លោកស្រី ម៉ន ដាលី មិនបានប្រគល់លុយគ្រប់តាមកិច្ចសន្យានោះទេ។
មេធាវី វិញ គីមលី បានបញ្ជាក់ក្នុងលិខិតចុះថ្ងៃទី២៤ ខែមីនា ឆ្នាំ២០២៣ ដែលមានកម្មវត្ថុ ៖ «ឆ្លើយតបនឹងការផ្សាយផ្ទាល់ (Live Video) និងសំណេរជាអក្សរដែលបង្ហោះជាបន្តបន្ទាប់ របស់ឈ្មោះ ម៉ន ដានី ភេទ ស្រី និងប្តីឈ្មោះ ឃុនថាវង្ស ផងផាន់ តាមគណនីហ្វេសប៊ុកឈ្មោះ ម៉ន ដានី លើករណីលក់-ទិញដី ទំហំ១០០ហិកតា ស្ថិតនៅគម្រោងទី២៩ ដែលមានទីតាំងស្ថិតនៅ ស្រុកគងពិសី ខេត្តកំពង់ស្ពឺ»។
យោងតាមលិខិតជូនដំណឹងជាសាធារណៈរបស់មេធាវី វិញ គីមលី បានឱ្យដឹងថា ឈ្មោះ ម៉ន ដានី និងប្តីឈ្មោះ ឃុនថាវង្ស ផងផាន់ បានផ្សាយផ្ទាល់ តាមគណនីហ្វេសប៊ុកឈ្មោះ ម៉ន ដានី ចំនួន០៣លើក ដែលលើកប្រធានបទថា «KP ចាយលុយ 12,7 លានដុល្លារ ទិញដី អត់បានប្លង់ ចុងក្រោយអ្នកវិនិយោគប្តីបរទេសសញ្ជាតិខ្មែរដូចខ្ញុំ ត្រូវរងគ្រោះអស់គ្រប់យ៉ាង» ជាដើម នោះ គឺ «ជាការអះអាងផ្ទុយពីការពិត និងទំលាក់កំហុសដោយចេតនាទុច្ចរិត ដោយធ្វើឱ្យសាធារណជន និងតតិយជនទិញដី-ផ្ទះបុរី ម៉ន ដានី គម្រោងទី២៩ ដែលមានទីតាំងនៅស្រុកគងពិសី ខេត្តកំពង់ស្ពឺ ព្រមទាំងកម្មករ មានការភាន់ច្រឡំមកលើម្ចាស់ដីថា ម្ចាស់ដីបានទទួលប្រាក់ថ្លៃលក់ដីគ្រប់ចំនួនហើយ បែរជាមិនព្រមប្រគល់ប្លង់ទំហំ ១០០ ហិកតា ជូនអ្នកទិញដីទៅវិញ»។
«ការលើកឡើងនេះ គឺជាចេតនាទុច្ចរិតក្នុងគោលបំណងបង្ខំឱ្យម្ចាស់ដី ប្រគល់ដី និងប្លង់ដីច្បាប់ដើមជូនអ្នកទិញ ទាំងដែលអ្នកទិញដីមិនបានបង់ប្រាក់ថ្លៃទិញដី តាមកិច្ចសន្យា» និង «បំពានកិច្ចសន្យាធ្ងន់ធ្ងរតាមការមិនអនុវត្តកាតព្វកិច្ច» ដោយ លោកស្រី ម៉ន ដានី និងស្វាមីបានលើកយកកិច្ចសន្យាទី១ ដែលជា «កិច្ចសន្យាមិនមានអានុភាព» លើការទូទាត់ប្រាក់ថ្លៃទិញដី និងចុះបញ្ជីផ្ទេរសិទ្ធិកាន់កាប់រវាងអ្នកទិញដី និងម្ចាស់ដី ដែលត្រូវជំនួសដោយកិច្ចសន្យាទី២។ នេះជាការបញ្ជាក់របស់លោកមេធាវី។
នៅក្នុងលិខិតដដែល លោក មេធាវី វិញ គីមលី បានបន្តថា «ម្ចាស់ដី គឺជាជនសុច្ចរិត និងស្មោះត្រង់ ពីព្រោះម្ចាស់ដី គឺមានដីពិតប្រាកដ និងរង់ចាំប្រគល់ប្លង់ដីច្បាប់ដើមជូនអ្នកទិញ ដោយបានអនុវត្តកាតព្វកិច្ចតាមកិច្ចសន្យា»។ លោកមេធាវី បន្តថា «តាមរយៈព័ត៌មានដែលទទួលបាន គឺឈ្មោះ ម៉ន ដានី និងប្តីឈ្មោះ ឃុនថាវង្ស ផងផាន់ បានលក់ និងប្រមូលប្រាក់លើដីដែលមានទំហំ១០០ ហិកតា ស្ថិតក្នុងបុរី ម៉ន ដានី គម្រោងទី២៩ ដែលមានទីតាំងស្ថិតនៅ ស្រុកគងពិសី ខេត្តកំពង់ស្ពឺ ឱ្យទៅតតិយជនស្ទើតែទាំងស្រុងទៅហើយ»។
ជាមួយគ្នានោះ ក្នុងនាមមេធាវីតំណាងឱ្យអាណត្តិឱ្យម្ចាស់ដី និងមានការឯកភាពពីម្ចាស់ដី លោក មេធាវី វិញ គីមលី សូមអញ្ជើញឈ្មោះ ម៉ន ដានី និងប្តីឈ្មោះ ឃុនថាវង្ស ផងផាន់ មកទទួលប័ណ្ណសម្គាល់សិទ្ធិកាន់កាប់អចលនវត្ថុលេខៈ ក.ស 011239 ចុះថ្ងៃទី ២៥ ខែតុលា ឆ្នាំ២០២២ ច្បាប់ដើម មានទំហំដី ៥០ ហិកតា ដោយភ្ជាប់កាតព្វកិច្ចបង់ប្រាក់ថ្លៃដី ចំនួន ៤,១៥០០,០០០ ដុល្លារអាមេរិក និងប្រាក់ថ្លៃដីដំណាក់កាលទី១ ចំនួន ៤,៣៥០,០០០ ដុល្លារអាមេរិក លើការសុំចុះបញ្ជីផ្ទេរសិទ្ធិកាន់កាប់ដី ៥០ ហិកតា បន្ទាប់ទៀត។ សរុបប្រាក់ដែលអ្នកទិញដីត្រូវបង់គឺចំនួន ៨,៥០០,០០០ ដុល្លារអាមេរិក ជូនម្ចាស់ដី គិតចាប់ពីថ្ងៃជូនដំណឺងនេះតទៅ ក្នុងអំឡុងពេលសមរម្យ ដើម្បីអនុវត្តកាតព្វកិច្ចតាមកិច្ចសន្យាទី២ ខាងលើព្រមគ្នា តាមការព្រមព្រៀងនាពេលកន្លងមក។
សូមរម្លឹកផងដែរថា ក្រុមហ៊ុន ម៉នដានី រៀលអ៊ីស្ទេត ឯ.ក របស់លោកស្រី ម៉ន ដានី ត្រូវបាននិយ័តករអាជីវកម្មអចលនវត្ថុ និងបញ្ចាំ បញ្ឈប់សកម្មភាពអាជីវកម្ម នៅគម្រោងទី២៩ តាមផ្លូវជាតិលេខ៣ ក្នុងខេត្តកំពង់ស្ពឺ ក្រោមហេតុផល គ្មានអាជ្ញាប័ណ្ណពី និយ័តករអាជីវកម្មអចលនវត្ថុ និងបញ្ចាំ និងកំពុងមានវិវាទជាមួយម្ចាស់ដី ព្រមទាំងអតិថិជន។ ករណីនេះ នាំឱ្យប្រជាពលរដ្ឋ ជាអ្នកទិញផ្ទះ បានលើកគ្នាទៅតវ៉ានៅក្រុមហ៊ុន កាលពីថ្ងៃ ទី១៩ ខែមីនា ឆ្នាំ២០២៣ ខណ:ម្ចាស់ដី បានសុំដីការក្សាការពារលើដី ដែលម្ចាស់បុរី កំពុងសាងសង់ផ្ទះល្វែងលក់ ហើយក៏ទទួលបានលុយពីអ្នកទិញផ្ទះ ក៏មិនតិចនោះដែរ។
សូមបញ្ជាក់ថា លោកស្រី ម៉ន ដានី និងស្វាមី បានស្រែកយំ សម្រក់ទឹកភ្នែក នៅក្នុងការ Live តាមហ្វេសប៊ុក ដោយអ្នកទាំងពីរ បានអះអាងថា រកស៊ីដោយស្របច្បាប់ មិនមែនជាការសម្ដែង ហើយបាន ចោទប្រកាន់ថា ម្ចាស់ដីបានធ្វើបាបគ្រួសាររបស់ខ្លួន និងបានបង្ហាញលិខិតទិញ-លក់ (លិខិតទិញ-លក់លើកទី១) កិច្ចសន្យាទី១ ដែលជាកិច្ចសន្យាមិនមានអានុភាពលើការទូទាត់ប្រាក់ថ្លៃទិញដី និងចុះបញ្ជីផ្ទេរសិទ្ធិកាន់កាប់រវាងអ្នកទិញដី និងម្ចាស់ដី ដែលត្រូវជំនួសដោយកិច្ចសន្យាទី២៕។ ប្តីប្រពន្ធរូបនេះ បានលើកឡើងថា ម្ចាស់ដី បានទទួលលុយពីខ្លួនគ្រប់ចំនួន១២លានដុល្លារកន្លះ (អាមេរិក) តែមិនប្រគល់ប្លង់ឱ្យខ្លួន។
គួររំលឹកថា ៖ ចៅហ្វាយខេត្តថា ម្ចាស់បុរី ម៉ន ដានី នៅកំពង់ស្ពឺ ទិញដីគេហើយ មិនទាន់ទូទាត់ប្រាក់គ្រប់ ទើបកើតរឿងរ៉ាវ! ។
ខាងក្រោមនេះ គឺជាលិខិតជូនដំណឹងជាសាធារណៈរបស់មេធាវី វិញ គីមលី ចំពោះ លោកស្រី ម៉ន ដានី និងស្វាមី៖
ខាងក្រោមនេះ ជាកិច្ចសន្យាទិញ ១ ដែលជាកិច្ចសន្យាមិនមានអានុភាពលើការទូទាត់ប្រាក់ថ្លៃទិញដី និងចុះបញ្ជីផ្ទេរសិទ្ធិកាន់កាប់រវាងអ្នកទិញដី និងម្ចាស់ដី ដែលត្រូវជំនួសដោយកិច្ចសន្យាទី២៖
ចែករំលែកព័តមាននេះ