ល្អណាស់! Kane បំបែកកំណត់ត្រាដ៏ពិសេសបំផុត ក្រោយជួយអង់គ្លេសយកឈ្នះអ៊ីតាលី
អ៊ីតាលី ៖ ខ្សែប្រយុទ្ធ Harry Kane បានបំបែកកំណត់ត្រាដោយក្លាយជាកីឡាករស៊ុតបញ្ចូលទីច្រើន
អ៊ីតាលី ៖ ខ្សែប្រយុទ្ធ Harry Kane បានបំបែកកំណត់ត្រាដោយក្លាយជាកីឡាករស៊ុតបញ្ចូលទីច្រើនជាងគេបំផុតរបស់ក្រុមជម្រើសជាតិអង់គ្លេស ខណៈដែលពួកគេបានបើកយុទ្ធនាការជម្រុះ Euro 2024 កាលពីយប់មិញជាមួយនឹងជ័យជម្នះលើកដំបូងនៅក្នុងប្រទេសអ៊ីតាលី ចាប់តាំងពីឆ្នាំ១៩៦១។
ជំនួបនៅក្នុង C ដែលធ្វើឡើងនៅកីឡដ្ឋាន Diego Armando Maradona បានបញ្ចប់ទៅដោយក្រុមភ្ញៀវតោកំណាចអង់គ្លេសយកឈ្នះលើក្រុមអសុរីអ៊ីតាលី នៅក្នុងលទ្ធផល ២-១ ខណៈដែលខ្សែប្រយុទ្ធឆ្នើម Harry Kane រកបាន១គ្រាប់នៅនាទី៤៤ តាមរយៈការទាត់បាល់ប៉េណាល់ទី ដែលជាគ្រាប់បាល់ទី៥៤របស់គេ ដើម្បីបំបែកកំណត់ត្រាចាស់របស់អតីតខ្សែប្រយុទ្ធឆ្នើម Wayne Rooney ដែលមានចំនួន៥៣គ្រាប់។
នៅក្នុងការប្រកួតនេះ ខ្សែការពារស្លាបឆ្វេង Luke Shaw របស់អង់គ្លេសទទួលបានកាតលឿង២ដងស្មើនឹងកាតក្រហមបណ្តាញចេញពីការប្រកួតផងដែរ។ ទោះយ៉ាងណា ជាមួយនឹងជ័យជម្នះនេះ អង់គ្លេសកាន់កាប់កំពូលតារាងពូល C បណ្តោះអាសន្ននៅក្នុងការប្រកួតជុំទី១នេះ ដែលនៅក្នុងពូលរួមជាមួយ ម៉ាសេដូនខាងជើង អ៊ុយក្រែន ម៉ាល់តា និងអ៊ីតាលី។
គួរបញ្ជាក់ថា ខ្សែប្រយុទ្ធឆ្នើម Harry Kane របស់ក្រុមមាន់ខ្នាយមាស Tottenham Hotspur ត្រូវបានកោះហៅចូលជម្រើសជាតិឈុតធំនៅក្នុងឆ្នាំ ២០១៥ ដែលគិតរហូតមកទល់ពេលនេះ កីឡាករវ័យ២៩ឆ្នាំរូបនេះ បានបង្ហាញខ្លួនសរុបចំនួន៨១ប្រកួតហើយ សម្រាប់ក្រុមតោកំណាចអង់គ្លេស។
ខាងក្រោមនេះជាលទ្ធផលការប្រកួតទាំងអស់ កាលពីយប់មិញ ៖
ពូល C
អ៊ីតាលី ១-២ អង់គ្លេស
ម៉ាសេដូនខាងជើង ២-១ ម៉ាល់តា
ពូល H
កាហ្សាក់ស្ថាន ១-២ ស្លូវេនី
ដាណឺម៉ាក ៣-១ ហ្វាំងឡង់
សានម៉ារីណូ ០-២ អៀរឡង់ខាងជើង
ពូល J
ព័រទុយហ្គាល់ ៤-០ លិចទេនស្តែន
ស្លូវ៉ាគី ០-០ លុចហ្សំបួរ
បូស្នី ៣-០ អ៊ីស្លង់៕ (ដកស្រង់ចេញពី BBC)
ចែករំលែកព័តមាននេះ