អតីតកីឡាករឆ្នើមក្រុម Arsenal និង Real Madrid ២រូបប្រកាសព្យួរស្បែកជើងពីពិភពបាល់ទាត់
បរទេស ៖ អតីតកីឡាករឆ្នើមរបស់ក្រុមកាំភ្លើងធំ Arsenal និងក្រុមស្តេចស Real Madrid ២រូបគឺខ្សែ
បរទេស ៖ អតីតកីឡាករឆ្នើមរបស់ក្រុមកាំភ្លើងធំ Arsenal និងក្រុមស្តេចស Real Madrid ២រូបគឺខ្សែប្រយុទ្ធ Emmanuel Adebayor និងខ្សែបម្រើប្រយុទ្ធ Mesut Özil បានប្រកាសចូលនិវត្តន៍ពិភពបាល់ទាត់ជាផ្លូវការហើយ ពោលគឺមុនក្រោយគ្នាមួយថ្ងៃ។
កីឡាករ Emmanuel Adebayor អតីតខ្សែប្រយុទ្ធក្រុម Arsenal និងក្រុមជម្រើសជាតិតូហ្គោបានប្រកាសចូលនិវត្តន៍ពីពិភពលោកបាល់ទាត់ហើយ កាលពីថ្ងៃទី២១ ខែមីនា កន្លងទៅ។ កីឡាករវ័យ៣៩ឆ្នាំរូបនេះ បានព្យួរស្បែកជើងរបស់ខ្លួនបន្ទាប់ពីចំណាយពេលប្រមាណ២២ឆ្នាំ ជាមួយនឹងអាជីពមួយនេះ។ នៅក្នុងវីដេអូដែលបានចែករំលែកនៅលើប្រព័ន្ធផ្សព្វផ្សាយសង្គម Adebayor បានសម្តែងការដឹងគុណចំពោះអ្នកគាំទ្រ អតីតមិត្តរួមក្រុម និងក្រុមគ្រូបង្វឹកទាំងអស់របស់គេ។
ជាមួយអាជីពដ៏អស្ចារ្យនេះ Adebayor បានលេងឱ្យក្លិបសរុបចំនួន១១ ក្នុងនោះរួមទាំងក្លិបកំពូលនៅអឺរ៉ុបដូចជា Arsenal, Manchester City, Real Madrid និង Tottenham Hotspur ខណៈអាជីពចុងក្រោយរបស់គេគឺជាមួយក្លិប Semassi នៅស្រុកកំណើត។
Adebayor បានរួមចំណែកដ៏ធំធេងសម្រាប់ក្រុមជម្រើសជាតិតូហ្គោចាប់ពីឆ្នាំ ២០០០ រហូតដល់ ២០១៩។ កីឡាកររូបនេះ ស៊ុតបញ្ចូលទីបាន ២៣៧គ្រាប់ពីការបង្ហាញខ្លួនសរុប ៦៧៩ប្រកួតទាំងក្លិប និងជម្រើសជាតិ ដោយបានឈ្នះពានរង្វាន់ Copa del Rey ១លើកជាមួយ Real Madrid។
ដោយឡែក កាលពីថ្ងៃទី២២ ខែមីនា កន្លងទៅ កីឡាករ Mesut Özil អតីតខ្សែបម្រើប្រយុទ្ធក្រុម Arsenal និងក្រុមជម្រើសជាតិអាល្លឺម៉ង់ បានប្រកាសចូលនិវត្តន៍ពីបាល់ទាត់ជាផ្លូវការហើយនៅអាយុ៣៤ឆ្នាំ បន្ទាប់ពីចំណាយពេលជាង១៨ឆ្នាំជាមួយនឹងអាជីពដ៏អស្ចារ្យមួយនេះ។
កីឡាករនាំលេងរូបនេះ (Key Player) បានលេងឱ្យក្លិបសរុបចំនួន៦ ដោយរូបគេល្បីល្បាញខ្លាំងបំផុតជាមួយក្រុម Real Madrid និង Arsenal ខណៈដែលអាជីពចុងក្រោយរបស់គេគឺជាមួយក្រុម İstanbul Başakşehir នៃលីគកំពូលតួកគី។ Özil ត្រូវបានកោះហៅចូលក្រុមឈុតធំជម្រើសជាអាល្លឺម៉ង់ក្នុងឆ្នាំ២០០៩ នឹងបញ្ចប់នៅឆ្នាំ២០១៨។
ខ្សែបម្រើប្រយុទ្ធកម្ពស់១.៨០សង់ទីម៉ែត្ររូបនេះ ស៊ុតបញ្ចូលទីបាន ១២១គ្រាប់ពីការបង្ហាញខ្លួនសរុប ៦៩៧ប្រកួតទាំងក្លិប និងជម្រើសជាតិ ដោយបានឈ្នះពានរង្វាន់ជាច្រើនក្នុងរួមទាំង La Liga, Copa del Rey, Spanish Super Cup, FA Cup និង FA Community Shield។ ពិសេសលើសពីនេះទៀត រូបគេបានរួមចំណែកយ៉ាងសំខាន់ជួយអាល្លឺម៉ង់ឈ្នះពានរង្វាន់ FIFA World Cup នៅក្នុងឆ្នាំ២០១៤៕
ចែករំលែកព័តមាននេះ