រាជធានីភ្នំពេញ ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ និងកីឡាអាស៊ានប៉ារ៉ាហ្គេមលលើកទី១២ ឆ្នាំ២០២៣…
រាជធានីភ្នំពេញ ៖ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ និងកីឡាអាស៊ានប៉ារ៉ាហ្គេមលលើកទី១២ ឆ្នាំ២០២៣ បានថ្លែងឱ្យដឹងថា ព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេមនឹងលើកតម្កើងកេរិ៍ឈ្មោះកម្ពុជា និងជាកម្លាំងថាមពលដែលត្រូវដាក់បង្ហាញពិភពលោកអំពីវប្បធម៌ខ្មែរដ៏រុងរឿង ព្រមទាំងផ្កំផ្កើនថែមទៀត តាមរយៈនយោបាយ ឈ្នះ-ឈ្នះ។
ថ្លែងក្នុងព្រះរាជពិធីប្រោសព្រះរាជទាន ព្រះអគ្គិជ័យកីឡា សម្រាប់ព្រឹត្តិការណ៍ប្រកួតកីឡាអាស៊ីអាគ្នេយ៍លើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣ ក្រោមព្រះរាជាធិបតីដ៏ខ្ពង់ខ្ពស់បំផុត ព្រះករុណា ព្រះបាទ សម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា នៅប្រាសាទអង្គរវត្ត ខេត្តសៀមរាប នាថ្ងៃទី២១ ខែមីនា ឆ្នាំ២០២៣ សម្តេច ទៀ បាញ់ បានគូសបញ្ជាក់ថា៖ «រាជរដ្ឋាភិបាលសម្រេចយកឆ្នាំ២០២៣ ធ្វើជាម្ចាស់ផ្ទះកីឡាស៊ីហ្គេម និងអាស៊ានប៉ារ៉ាហ្គេម ព្រឹត្តិការណ៍នេះនឹងបង្ហាញមុខមាត់ លើកតម្កើងកេរិ៍ឈ្មោះកម្ពុជា និងជាកម្លាំងថាមពល ដែលត្រូវដាក់បង្ហាញពិភពលោករបស់យើង អំពីវប្បធម៌ អរិយធម៌ ទេសចរណ៍ សេដ្ឋកិច្ច និងសង្គមខ្មែរដ៏រុងរឿងផ្កុំផ្កើនថែមទៀត តាមរយៈនយោបាយ ឈ្នះ-ឈ្នះ»។
សម្ដេចពិជ័យសេនាបានបន្ដថា បានធ្វើឲ្យប្រទេសជាតិមានសុខសន្ដិភាព និងការឯកភាពជាតិពេញលេញស្ថិរភាពនយោបាយ និងការអភិវឌ្ឍរីកចម្រើនលើគ្រប់វិស័យដែលអនុញ្ញាតឲ្យរាជរដ្ឋាភិបាល មានលទ្ធភាពគ្រប់គ្រាន់ក្នុងការធ្វើម្ចាស់ផ្ទះព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម ដ៏ធំបែបនេះ។
ជាមួយគ្នានោះដែរ សម្ដេច ទៀ បាញ់ លើកឡើងថា ព្រះរាជពិធីប្រោសព្រះរាជទាន ព្រះអគ្គិជ័យកីឡា នាពេលក៏បានបង្ហាញថា រហូតមកដល់ពេលនេះ រាជរដ្ឋាភិបាលកម្ពុជាតាមរយៈគណៈកម្មធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ និងកីឡាអាស៊ានប៉ារ៉ាហ្គេមលើកទី១២ ឆ្នាំ២០២៣ បានរៀបចំខ្លួនរួចរាល់ទាំងការរៀបចំហេដ្ឋារចនាសម្ព័ន្ធកីឡា និងហេដ្ឋារចនាសម្ព័ន្ធសាធារណៈគាំទ្រដ៏ទៃទៀត ដើម្បីនាំមកជ័យជំម្នះជាប្រវត្តិសាស្ដ្រជូនជាតិ មាតុភូមិ និងមុខមាត់កេរិ៍ឈ្មោះកម្ពុជា បង្ហាញដល់ពិភពលោកឲ្យស្គាល់ និងយល់អំពីវប្បធម៌ អរិយធម៌ និងទេសចរណ៍របស់កម្ពុជា នាពេលបច្ចុប្បន្ននេះ។
សូមបញ្ជាក់ថា គិតត្រឹមថ្ងៃទី២១ ខែមីនា ឆ្នាំ២០២៣នេះ សល់រយៈពេលតែ៤៥ថ្ងៃទៀតប៉ុណ្ណោះនៃដំណើរឆ្ពោះទៅធ្វើម្ចាស់ផ្ទះនៃការប្រកួតកីឡាស៊ីហ្គេមលើកទី៣២ ដែលត្រូវប្រារព្ធពិធីបើកការប្រកួត នាថ្ងៃទី០៥ ខែឧសភា ឆ្នាំ២០២៣ខាងមុខ។
ប៉ុន្ដែមុនឈានដល់ការប្រកួតនេះត្រូវរៀបចំព្រះរាជពិធីសុំភ្លើងព្រះអគ្គិកីឡា នៅប្រាសាទអង្គរវត្ត នាថ្ងៃទី២១ ខែមីនា ឆ្នាំ២០២៣ ដើម្បីដង្ហែរភ្លើងគប់ជុំវិញបណ្ដាប្រទេសអាស៊ាន និងបឹងទន្លេសាប រហូតដល់ពេលវេលាប្រារព្ធពិធីបើកការប្រកួតកីឡាស៊ីហ្គេម លើកទី៣២ ជាផ្លូវការតែម្ដង៕
ចែករំលែកព័តមាននេះ