រាជធានីភ្នំពេញ ៖ អាជ្ញាធរខណ្ឌទួលគោក នៅវេលាម៉ោង១១និង៥៨នាទីព្រឹកថ្ងៃទី២០ ខែមីនា ឆ្នាំ២០២៣ បានចុះណែនាំដល់ម្ចាស់ហាងបេប៊ីអោតឡេត (Baby outlet) ដែលបំពានលើចិញ្ចើមផ្លូវសាធារណៈ…
រាជធានីភ្នំពេញ ៖ អាជ្ញាធរខណ្ឌទួលគោក នៅវេលាម៉ោង១១និង៥៨នាទីព្រឹកថ្ងៃទី២០ ខែមីនា ឆ្នាំ២០២៣ បានចុះណែនាំដល់ម្ចាស់ហាងបេប៊ីអោតឡេត (Baby outlet) ដែលបំពានលើចិញ្ចើមផ្លូវសាធារណៈ ដោយបានចាក់បេតុងហ៊ុំដើមឈើចំនួន០៤ដើម នៅខាងមុខហាង និងតម្រូវឲ្យរុះរើបេតុងនោះចេញវិញ និងរៀបចំឲ្យមានសោភ័ណ្ឌភាពល្អដូចដើម ព្រមទាំងព្រមាន មិនឲ្យធ្វើបែបនេះម្តងទៀតឡើយ ក្នុងករណីម្ចាស់ហាងមិនសហការណ៍ ឬងាប់ដើមឈើខាងលើទាំងនេះ នឹងត្រូវទទួលខុសត្រូវចំពោះមុខច្បាប់ ។
លោក ជា ពិសី អភិបាល នៃគណៈអភិបាលខណ្ឌទួលគោក បានថ្លែងថា ៖ «ក្រោយពីទទួលបានដំណឹង និងការរាយការណ៍ពីប្រជាពលរដ្ឋតាមប្រព័ន្ធបណ្ដាញសង្គមហ្វេសប៊ុកភ្លាមៗនោះ នៅព្រឹកថ្ងៃចន្ទនេះ លោកបានបញ្ជាទៅលោក ចាន់ បណ្ឌិត អភិបាលរងខណ្ឌ បានដឹកនាំកម្លាំងគណៈបញ្ជាការឯកភាពខណ្ឌ ចុះពិនិត្យ និងណែនាំម្ចាស់ហាងហាង បេប៊ីអោតឡេត (Baby outlet) ដែលបំពានលើចិញ្ចើមផ្លូវ ចាក់បេតុងហ៊ុំដើមឈើសាធារណៈ ចំនួន០៤ដើម នៅផ្លូវ២៨៩ ក្នុងសង្កាត់បឹងកក់២ គណៈបញ្ជាការឯកភាពខណ្ឌ បានឲ្យរុះរើបេតុងនោះចេញវិញ និងរៀបចំឲ្យមានសោភ័ណ្ឌភាពល្អដូចដើម ចំពោះដើមឈើ ដែលងាប់ត្រូវដាំឡើងវិញ មានទំហំប៉ុនដូចគ្នា ព្រមទាំងធ្វើកំណត់ហេតុព្រមាន មិនអនុញ្ញាតឲ្យមានការធ្វើបែបនេះម្តងទៀតឡើយ ក្នុងករណីម្ចាស់ហាងមិនសហការណ៍ ហើយធ្វើឲ្យប៉ះពាល់សណ្ដាប់ធ្នាប់សាធារណៈ ឬងាប់ដើមឈើខាងលើនេះ និងត្រូវទទួលខុត្រូវចំពោះមុខច្បាប់ ជាធរមាន» ។
ក្នុងនាមជាអភិបាលខណ្ឌទួលគោក លោក ជា ពិសី សូមថ្លែងអំណរគុណយ៉ាងជ្រាលជ្រៅ ចំពោះបណ្ដាញសារព័ត៌មាន ក៏ដូចសាធារណជនទាំងអស់ ដែលបានផ្ដល់ព័ត៌មានទាន់ហេតុការណ៍ ដល់អាជ្ញាធរមានសមត្ថកិច្ច ដើម្បីមានវិធានការទប់ស្កាត់ជាបន្ទាន់ និងទាន់ពេលវេលា ៕
ចែករំលែកព័តមាននេះ