មន្ត្រីជំនាញវេជ្ជសាស្ត្រកីឡា ៖ ការហាត់ប្រាណមិនបែងចែកតាមភេទ និងអាយុទេ
រាជធានីភ្នំពេញ ៖ ការរស់នៅប្រកបដោយសុខភាពល្អគឺជា
រាជធានីភ្នំពេញ ៖ ការរស់នៅប្រកបដោយសុខភាពល្អគឺជាបំណងប្រាថ្នាទូទៅរបស់មនុស្សគ្រប់រូប ។ មនុស្សដែលមានសុខភាពរឹងមាំតែងតែទទួលបាននូវសុភមង្គលទាំងផ្លូវកាយ ផ្លូវចិត្ត និងរួមរស់ជាមួយអ្នកដទៃប្រកបដោយភាពចុះសម្រុងដែលជាកត្តាធ្វើឱ្យគេទទួលបានជោគជ័យក្នុងជីវិតរស់នៅប្រចាំថ្ងៃ និងកាត់បន្ថយបានយ៉ាងច្រើនមហិមាទៅលើការចំណាយផ្នែកថ្នាំសង្កូវ និងការព្យាបាលជំងឺផ្សេងៗ។
ផ្ដើមចេញពីការយល់ឃើញបែបនេះ គួបផ្សំនឹងកម្រិតជីវភាពកាន់តែមានភាពប្រសើរឡើង ធ្វើឱ្យពលរដ្ឋកម្ពុជាបច្ចុប្បន្នមិនថានៅទីក្រុង ឬជនបទភាគច្រើនតែងតែគិតគូរពីបញ្ហាសុខភាពរបស់ខ្លួនជាប្រចាំជាពិសេសសុខភាពរាងកាយនេះតែម្ដង ។ តាមការសិក្សាស្រាវជ្រាវ សុខភាពរាងកាយល្អទៅបានអាស្រ័យទៅលើកត្តាជាច្រើន ក្នុងនោះកត្តាលំហាត់ប្រាណមិនអាចខ្វះបានឡើយសម្រាប់មនុស្សគ្រប់វ័យនិងភេទដោយគ្មានបែងចែកអ្វីឡើយ។
លោកវេជ្ជបណ្ឌិត ស្ដើង ជា មន្ត្រីផ្នែកវេជ្ជសាស្ត្រកីឡារបស់ក្រុមជម្រើសជាតិកម្ពុជា បានមានប្រសាសន៍ថា ការហាត់ប្រាណដើម្បីសុខភាពមិនមានបែងចែកតាមភេទ និងអាយុទេ ។ មនុស្សយើងគ្រប់រូបអ្នកជំនាញខាងសុខភាពកំណត់ឱ្យចេះធ្វើលំហាត់ប្រាណចាប់ពីអាយុ៥ទៅ៦ឆ្នាំឡើងទៅតាមបែបធម្មជាតិ ដូចជារត់នៅតាមដងផ្លូវឬតាមទីសាធារណៈ និងតាមបែបវិទ្យាសាស្ត្រដូចជាការធ្វើលំហាត់ប្រាណជាមួយឧបករណ៍ ឬម៉ាស៊ីនទំនើបៗនៅតាមក្លិបកីឡានានាទៅតាមចំណង់ចំណូលចិត្តនិងសុខភាពរាងកាយរបស់ខ្លួនដែលអាចទៅរួចជាមួយឧបករណ៍លំហាត់ប្រាណទាំងនោះ ព្រោះវាផ្ដល់ប្រយោជន៍ចំពោះសុខភាពដូចគ្នា ។ គ្រាន់តែការហាត់ប្រាណតាមទីសាធារណៈផ្ដល់នូវភាពសប្បាយ មិនអស់លុយ អាចស្រូបយកខ្យល់អាកាសបរិសុទ្ធ ប៉ុន្តែក៏មានផលអាក្រក់បន្តិចដែរនៅពេលអាកាសធាតុមិនអំណោយផលដូចជាមានភ្លៀងឬហេតុការណ៍អ្វីកើតឡើងធ្វើឱ្យការហាត់ប្រាណមិនបានទៀងទាត់ ក្នុងពេលការហាត់ប្រាណជាមួយឧបករណ៍ក្នុងក្លិបកីឡាត្រឹមត្រូវមានភាពទៀងទាត់ជាង ប៉ុន្តែក៏ត្រូវចំណាយប្រាក់ផងដែរ ។
លោកវេជ្ជបណ្ឌិត ស្ដើង ជា ដែលបច្ចុប្បន្នមានអាយុ៧២ឆ្នាំទៅហើយប៉ុន្តែសុខភាពរាងកាយនៅរឹងមាំល្អណាស់បញ្ជាក់ថា ដើម្បីឱ្យមានសុខភាពល្អ តាមក្បួនវេជ្ជសាស្ត្រគេកំណត់ឱ្យហាត់ប្រាណក្នុង១ថ្ងៃប្រហែលកន្លះម៉ោង សរុបក្នុង១សប្ដាហ៍ឱ្យបាន២០០នាទីយ៉ាងតិច ។ ប៉ុន្តែសម្រាប់អ្នកទើបងើបពីឈឺ ឬមនុស្សចាស់គឺត្រូវហាត់សន្សឹមៗតាមតែអាចធ្វើទៅបាន ។
ជាចុងក្រោយលោកវេជ្ជបណ្ឌិតបានផ្ដាំផ្ញើដល់បងប្អូនប្រជាពលរដ្ឋទាំងអស់ ទោះបីជាមានកិច្ចការរវល់យ៉ាងណាក៏ត្រូវតែឆ្លៀតពេល៣០នាទីក្នុង១ថ្ងៃដើម្បីហាត់ប្រាណដែរ ។ ការហាត់ប្រាណតាមការកំណត់ច្បាស់លាស់ត្រឹមត្រូវ ធ្វើឱ្យខ្លួនប្រាណយើងចេញញើសបណ្ដេញជាតិពុលពីក្នុងខ្លួន ធ្វើឱ្យយើងមានសុខភាពល្អសម្រស់ស្រស់ស្អាតនិងក្មេងជាងវ័យជាងអ្នកមិនហាត់ប្រាណ ៕
ចែករំលែកព័តមាននេះ