ខេត្តបាត់ដំបង ៖ ហាងលក់ទូរស័ព្ទមួយកន្លែង ត្រូវជនមិនស្គាល់អត្តសញ្ញាណគាស់ទ្វារ និងជញ្ជាំងខាងក្រោយ ចូលលួចយកទូរស័ព្ទអស់គ្មានសល់ពីក្នុងទូ ខណៈម្ចាស់ហាងជាប់រវល់ទៅចូលរួមភ្ជាប់ពាក្យបងប្អូន ហើយបានដឹង និងភ្ញាក់ផ្អើលនៅពេលត្រឡប់មកដល់ផ្ទះវិញ នៅវេលាម៉ោងជាង៤រសៀលថ្ងៃទី១៧…
ខេត្តបាត់ដំបង ៖ ហាងលក់ទូរស័ព្ទមួយកន្លែង ត្រូវជនមិនស្គាល់អត្តសញ្ញាណគាស់ទ្វារ និងជញ្ជាំងខាងក្រោយ ចូលលួចយកទូរស័ព្ទអស់គ្មានសល់ពីក្នុងទូ ខណៈម្ចាស់ហាងជាប់រវល់ទៅចូលរួមភ្ជាប់ពាក្យបងប្អូន ហើយបានដឹង និងភ្ញាក់ផ្អើលនៅពេលត្រឡប់មកដល់ផ្ទះវិញ នៅវេលាម៉ោងជាង៤រសៀលថ្ងៃទី១៧ មីនា នៅចំណុចភូមិកំប្រ៉ង់ ឃុំតាក្រី ស្រុកកំរៀង ។
សេចក្ដីរាយការណ៍បានឲ្យដឹងថា ហាងលក់ទូរស័ព្ទនោះ មានយីហោ «រឿន រ៉ូហ្សា» និងមានម្ចាស់ឈ្មោះសុខ រឿន ភេទប្រុស អាយុ២៦ឆ្នាំ រស់នៅចំណុចកើតហេតុ ។ ហាងលក់ទូរស័ព្ទនេះ ត្រូវចោរចូលលួចយកទូរស័ព្ទ ពេលម្ចាស់បិទទ្វារទុកចោល រួចនាំគ្នាទៅចូលរួមពិធីភ្ជាប់ពាក្យបងប្អូន លុះចប់កម្មវិធីត្រឡប់មកដល់ផ្ទះវិញទើបដឹង នៅពេលបើកទ្វារចូលឃើញបាត់ទូរស័ព្ទអស់ពីក្នុងទូ ។ បើតាមម្ចាស់ហាងលក់ទូរស័ព្ទនេះ លោក សុខ រឿន បាននិយាយថា នៅថ្ងៃកើតហេតុ គាត់និងក្រុមគ្រួសារបានចេញពីផ្ទះតាំងពីម៉ោង១០ព្រឹក ទៅភ្ជាប់ពាក្យបងប្អូននៅភូមិស្រះទឹកថ្មី ។
លោកបានបន្តថា រហូតដល់ថ្ងៃរសៀល គាត់ក៏ត្រឡប់មកផ្ទះវិញ តែពេលបើកទ្វារចូលក្នុងផ្ទះ ស្រាប់តែប្រហោងពោះធ្លុង និងភ្ញាក់ផ្អើលយ៉ាងខ្លាំង ដោយសារបាត់ទូរស័ព្ទអស់រលីងពីក្នុងទូ ។ ពេលនោះ លោកក៏ទៅមើលទ្វារខាងក្រោយ ស្រាប់តែឃើញមានស្នាមកាត់ស័ង្កសី និងគាស់ទ្វារ ទើបដឹងថា មានចោរចូលលួចទូរស័ព្ទ។ នៅក្នុងរបាយការណ៍ ដែលសមត្ថកិច្ចបានសាកសួរជនគ្រោះទ្រព្យសម្បត្តិដែលបាត់បង់រួមមានទូរស័ព្ទម៉ាកចម្រុះសរុបចំនួន៦០គ្រឿង ក្នុងនោះ ភាគច្រើនជាទូរស័ព្ទមួយទឹកៗ ។ ទូរស័ព្ទទាំងនោះមាន ម៉ាក OPPO ពណ៏សនិងខ្មៅចំនួន៤៥គ្រឿង ម៉ាកRealme ពណ៏ក្រហមចំនួន០៥គ្រឿង ម៉ាក ViVo ពណ៏ស្វាយចំនួន១០គ្រឿង និង នៅមានដុំសាកថ្មទូរស័ព្ទមួយចំនួនទៀត។
ជុំវិញករណីនេះ គេមិនទាន់ដឹងថា តើសមត្ថកិច្ចមានតម្រុយពីមុខសញ្ញាជនសង្ស័យហើយ ឬគ្មាននោះទេ ? ព្រោះបើតាមព័ត៌មាន បានរាយការណ៌ថា កម្លាំងសមត្ថកិច្ចទាំងកម្លាំងកងរាជអាវុធហត្ថ ទាំងកម្លាំងនគរបាល បានចុះទៅកាន់កន្លែងកើតហេតុភ្លាមៗដែរ ក្រោយជនរងគ្រោះផ្ដល់ព័ត៌មាន ដើម្បីសួរនាំជនរងគ្រោះ និង ពិនិត្យទីតាំងកើតហេតុ ។ ប៉ុន្តែបើតាមប្រភពពីសមត្ថកិច្ចបានប្រាប់ថា កម្លាំងសមត្ថកិច្ចបានចុះទៅសួរនាំព្រោងព្រាតដល់ទីតាំងកើតហេតុមែន តែរហូតមកដល់ពេលនេះ ភិនភាគ នៃជនសង្ស័យហាក់ស្ងាត់ឈឹងគ្មានតម្រុយណាបន្តិចនៅឡើយទេ ។
ព័ត៌មានបន្ថែមកោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ