មានករណីផ្ទុះជម្លោះរវាងម្ចាស់ដី និងអាជ្ញាធរ ដោយចោទប្រកាន់គ្នាយកភាពត្រឹមត្រូវរៀងៗខ្លួន រឿងចាក់ដីលុបព្រែកសាធារណៈ ដោយអាជ្ញាធរចោទថា ឈ្មោះ មាសសង្ហា ចាក់ដីលុបព្រែកសាធារណៈ ក៏បានចាត់កម្លាំងទៅ
ខេត្តស្វាយរៀង ៖ មានករណីផ្ទុះជម្លោះរវាងម្ចាស់ដី និងអាជ្ញាធរ ដោយចោទប្រកាន់គ្នាយកភាពត្រឹមត្រូវរៀងៗខ្លួន រឿងចាក់ដីលុបព្រែកសាធារណៈ ដោយអាជ្ញាធរចោទថា ឈ្មោះ មាសសង្ហា ចាក់ដីលុបព្រែកសាធារណៈ ក៏បានចាត់កម្លាំងទៅហាមឃាត់ រួចឲ្យភាគីអ្នកចាក់ដីទៅសុំច្បាប់នៅរដ្ឋបាលស្រុករំដួល។ ចំណែកឯឈ្មោះ មាស សង្ហាវិញ ទៅសុំលោកអភិបាលស្រុក ហែម ស៊ីណា នៅតាមផ្លូវដោយផ្ទាល់មាត់ ហើយលោកអភិបាលស្រុក បានឲ្យមកធ្វើលិខិតជាលាយលក្ខណ៍អក្សរ ទើបអនុញ្ញាតិ ស្រាប់តែផ្ទុះជម្លោះយ៉ាងកក្រើកពេញបណ្តាញព័ត៌មានសង្គម Facebook តែម្តង។
ទាក់ទិនករណីខាងលើនេះដែរ នៅព្រឹកថ្ងៃទី១៦ ខែមីនា ឆ្នាំ២០២៣នេះ លោក ហែម ពិសិដ្ឋ អភិបាលរងខេត្ត តំណាងឯកឧត្តម ម៉ែន វិបុល អភិបាលខេត្តស្វាយរៀង បានដឹកនាំកម្លាំងចម្រុះ បានអញ្ជើញជួបប្រជុំជាមួយអាជ្ញាធរពាក់ព័ន្ធ និងប្រជាពលរដ្ឋ ជុំវិញរឿងចាក់ដីចូលដីចំណីព្រែកមួយកន្លែង ស្ថិតក្នុងភូមិត្រពាំងដំរី ឃុំកំពង់អំពិល ស្រុករំដួល ខេត្តស្វាយរៀង និងបានចុះពិនិត្យផ្ទាល់ដល់ទីតាំងដីផងដែរ។
គួរបញ្ជាក់ថា ការអញ្ជើញចូលរួមក្នុងឱកាសនោះរួមមាន លោកអនុប្រធានមន្ទីរធនធានទឹក និងឧតុនិយមខេត្ត, លោកប្រធាន អនុប្រធាន មន្ទីររៀបចំដែនដីនគរូបនីយកម្ម សំណង់ និងសូរិយោដីខេត្ត, លោកនាយករងទីចាត់ការអន្តរវិស័យសាលាខេត្ត, លោកប្រធានការិយាល័យគ្រប់គ្រងការអភិវឌ្ឍ និងសំណង់សាលាខេត្ត, លោកប្រធានការិយាល័យរៀបចំដែនដីនគររូបនីយកម្ម សំណង់ និងភូមិបាលស្រុករំដួល, លោកមេឃុំកំពង់អំពិល, លោកមេភូមិត្រពាំងដំរី និងប្រជាពលរដ្ឋដែលពាក់ព័ន្ធទាំងអស់។
លោក ហែម ពិសិដ្ឋ អភិបាលរងខេត្ត បានមានប្រសាសន៍ថា ឲ្យលោកប្រធានមន្ទីរធនធានទឹក សហការជាមួយរដ្ឋបាលស្រុក មន្ត្រីសុរិយោដីខេត្ត ស្រុក ចុះពិនិត្យវាស់វែងកំណត់ព្រំដីចំណីព្រែកចំណីអូរ ចាប់ពីចំណុចកើតហេតុនេះរហូតដល់ព្រំដែន ដើម្បីទប់ស្កាត់ទំនាស់ និងជនខិលខូចលួចចាក់ដីរំលោ.ភយកដីព្រែក ចំណីព្រែកសាធារណៈរបស់រដ្ឋទៅធ្វើជាកម្មសិទ្ធិ។ ជាលទ្ធផល ឈ្មោះ មាស សង្ហា ដែលជាម្ចាស់អ្នកចាក់ដី បានយល់ព្រមតាមដំណោះស្រាយ គឺបើអាជ្ញាធរវាស់វែងទៅប៉ះពាល់កំណត់ចំណីព្រែក និងអូរត្រឹមណា ហើយវាស់វែងឲ្យខ្លួនត្រឹមណា គឺទទួលយកប៉ុណ្ណឹង។
ពាក់ព័ន្ធប្រវត្តិរឿងទំនាស់ខាងលើនេះ លោក ហែម ស៊ីណា អភិបាលស្រុករំដួល បានឲ្យដឹងថា កាលពីថ្ងៃទី១៦ ថ្ងៃទី១៧ និងថ្ងៃទី១៨ ខែកុម្ភៈ ឆ្នាំ២០២៣ មានឈ្មោះ មាស សង្ហា អាយុ៤៥ឆ្នាំរ ស់នៅក្នុងភូមិត្រពាំងដំរី ឃុំកំពង់អំពឹល បានដឹកដីលុបព្រែក និងដីចំណីព្រែកលាក់ដំរី យកធ្វើជាកម្មសិទ្ធិ ហើយអាជ្ញាធរឃុំ បានចុះទៅឃាត់ តែអ្នកដឹកដីលុបព្រែកមិនព្រមបញ្ឈប់ ទើបក្រុមការងាររដ្ឋបាលស្រុករំដួល ចុះទៅឃាត់ ហើយរាយការណ៍ជូនលោកអភិបាលខេត្តតែម្តង ។
បន្ទាប់មកលោកអភិបាលខេត្តបានបញ្ជាឲ្យមន្ត្រី មន្ទីរធនធានទឹក ចុះពិនិត្យជាក់ស្តែងឃើញថា ពិតជាចាក់ដីចូលព្រែក និងចំណីព្រែកពិតប្រាកដមែន ដែលមានទទឹង១០ម៉ែត្រ និងបណ្តោយ៥០ម៉ែត្រ ហើយអាជ្ញាធរក៏បានឲ្យកាយដីចេញដូចសភាពដើមវិញ។ មន្ទីរធនធានទឹក ក៏បានធ្វើលិខិតជូនលោកប្រធានមន្ទីរធនធានទឹកពិនិត្យ ហើយក៏បានចេញលិខិតមកលោកអភិបាលស្រុក ដើម្បីសុំអន្តរាគមន៍ និងមានវិធានការកាយដីប្រមាណ១,៧៩៥ម៉ែត្រការ៉េ។
ហើយថ្មីៗនេះ ការរាយការណ៍លោកមេឃុំ បានឱ្យដឹងថា ឈ្មោះ មាស សង្ហា ចង់ចាក់ដីនៅផ្នែកខាងត្បូងជាប់ដីចាក់ថ្មី តែលោកអភិបាលស្រុក បានឲ្យទៅដាក់ពាក្យស្នើសុំមករដ្ឋបាលស្រុក ដោយភ្ជាប់នូវលិខិតពាក់ព័ន្ធមកជាមួយផង ទើបអនុញ្ញាតិឲ្យចាក់ដី។ ស្រាប់តែនៅថ្ងៃទី១៤ ខែមីនា ឆ្នាំ២០២៣ ក៏មានអ្នកសារព័ត៌មានកម្ពុជាឈ្នះ និងឥន្ទ្រី ផ្លឹសញូ បានចុះផ្សាយឡាយផ្ទាល់ ផ្សាយព័ត៌មានមិនពិត ដោយចោទប្រកាន់ថា អាជ្ញាធរហាមឃាត់មិនឲ្យប្រជាពលរដ្ឋចាក់ដីលើដីកម្មសិទ្ធិ។
លោក ហែម ស៊ីណា បន្តទៀតថា ក្នុងនោះក៏មានលោកវរសេនីយ៍ឯក ទឹត ស៊ីថា មេបញ្ជាការវរការពារព្រំដែនគោក នៃតំបន់ប្រតិបត្តិការសឹករងស្វាយរៀង និយាយចោទប្រកាន់មកលើអាជ្ញាធរស្រុកថា ជាអ្នកមិនអនុញ្ញាតិ ហើយដៀលអាជ្ញាធរថា ជាមន្ត្រីផ្លែល្ពៅ គ្មានភាពទទួលខុសត្រូវ ស៊ីញ៉េនិងដៃ លុបនិងជើង ជាអ្នកបំផ្លាញគណបក្សប្រជាជន នេះជាប្រមា.ថយ៉ាងធ្ងន់ធ្ងរ ។
រដ្ឋបាលស្រុករំដួល បានចេញលិខិតប្រតិកម្ម សូមឲ្យអ្នកសារព័ត៌មានទាំងពីរខាងលើនេះ កែតម្រូវព័ត៌មានឡើងវិញ និងឲ្យលោក ទឹត ស៊ីថា ចេញលិខិតសុំទោសជាសាធារណៈ បើពុំដូច្នោះទេ លោក ហែម ស៊ីណា និងមានចំណាត់ការតាមនីតិវិធីច្បាប់។
ទាក់ទិននឹងករណីនេះដែរ លោក ទឹត ស៊ីថា បានប្រាប់កោះសន្តិភាពថា លោកពិតជាបាននិយាយថា មន្ត្រីគ្រាប់ល្ពៅ ពិតប្រាកដមែន ដោយអាជ្ញាធរគ្មានភាពទទួលខុសត្រូវ ស៊ីញ៉េនិងដៃ លុបនិងជើង ចេញលិខិតបញ្ជាក់ទទួលស្គាល់ដីឲ្យប្រជាពលរដ្ឋ ឈ្មោះ សង្ហា បែរជាបដិសេធមិនទទួលស្គាល់។ ហើយហាមឃាត់មិនអនុញ្ញាតិឲ្យប្រជាពលរដ្ឋចាក់ដីលើកភូមិ មន្ត្រីបែបនេះ គឺខ្មែរហៅថាមន្ត្រីគ្រាប់ល្ពៅ មន្ត្រីគ្រាប់ត្នោត។ មន្ត្រីបែបនេះហើយ ជាអ្នកបំផ្លាយសន្លឹកឆ្នោតគណបក្សប្រជាជន ក្នុងនាមលោកជាមន្ត្រីគណបក្សប្រជាជន ត្រូវតែនិយាយ ហើយបើលោកនិយាយភាពត្រឹមត្រូវ ឲ្យទៅសុំទោសជាសាធារណៈ លោកមិនសុំទេ គឺលោកមិនខុស។
លោក ហែម ស៊ីណា បានបញ្ជាក់ថា បើសំអាងលើលិខិតបញ្ជាក់ទទួលស្គាល់ដីធ្លីរបស់ឈ្មោះមាស សង្ហា គឺចុះហត្ថលេខាពីលោកមេភូមិ និងលោកមេឃុំកំពង់អំពឹល នៅថ្ងៃទី១៥ ខែមករាឆ្នាំ២០២១ គឺត្រូវបាននារាករណ៍ហើយ ដោយច្បាប់ភូមិបាល បានបិទមិនឲ្យលោកមេភូមិ លោកមេឃុំ បញ្ជាក់ទៀតទេ។ បើប្រជាពលរដ្ឋចង់ចុះបញ្ជីដីធ្លី ឬលក់ទិញ ផ្ទេរកម្មសិទ្ធិ ត្រូវស្នើសុំទៅរដ្ឋបាលស្រុកជាអ្នកចុះហត្ថលេខា ហើយបុគ្គលនេះមិនព្រមអនុវត្តតាមការណែនាំរបស់អាជ្ញាធរឡើយ។
មហាជនបានលើកឡើងថា បច្ចុប្បន្នដីមានតម្លៃខ្ពស់ គឺអ្នកមានអំណាចអាងខ្នង និងអ្នកមានប្រាក់ គឺរំលោ.ភដីព្រែកដីអូររបស់រដ្ឋ ចាក់ដីលុបព្រែក លុបចំណីព្រែករបស់រដ្ឋ យកទៅធ្វើជាកម្មសិទ្ធិជាច្រើនករណី។ ឧទាហណ៍ ៖ ដីព្រែក ទល់មុខកន្លែងកើតហេតុ ខាងលិចថ្នល់ ក៏ត្រូវបានជនអ្នកមានលុយ ចាក់ដីលុបរំលោ.ភយក និងធ្វើរបងហ៊ុមព័ទ្ធធ្វើជាកម្មសិទ្ធិយ៉ាងរំភើយ មិនឃើញអាជ្ញាធរណារំខានឡើយ៕
ចែករំលែកព័តមាននេះ