រាជធានីភ្នំពេញ ៖ អ្នកមានមាសច្រើនអាចនឹងសប្បាយចិត្ត នៅពេលដឹងថាតម្លៃមាសបានហក់ឡើង ក្រោយពេលដែលធនាគារធំៗនៅអាមេរិកបានដួលរលំជាបន្តបន្ទាប់នៅក្នុងរយៈពេលប្រមាណជាមួយសប្តាហ៍កន្លងទៅនេះ ជាពិសេសគឺការដួលរលំធនាគារ ស៊ីលីខុន វ៉ាឡេ (Silicon Valley…
រាជធានីភ្នំពេញ ៖ អ្នកមានមាសច្រើនអាចនឹងសប្បាយចិត្ត នៅពេលដឹងថាតម្លៃមាសបានហក់ឡើង ក្រោយពេលដែលធនាគារធំៗនៅអាមេរិកបានដួលរលំជាបន្តបន្ទាប់នៅក្នុងរយៈពេលប្រមាណជាមួយសប្តាហ៍កន្លងទៅនេះ ជាពិសេសគឺការដួលរលំធនាគារ ស៊ីលីខុន វ៉ាឡេ (Silicon Valley Bank) ។
យោងតាមរបាយការណ៍ដែលបានផ្សព្វផ្សាយដោយ https://goldprice.org បានឲ្យដឹងថា ហាងឆេងមាសនៅលើទីផ្សារអន្តរជាតិបានឡើងដល់១.៩០២ ដុល្លារនៅ ក្នុងមួយអោន ហើយបើគិតជាតម្លឹងដូចជា ទីផ្សារមាសនៅកម្ពុជាយើងវិញ គឺដល់ទៅ ២.៥៣០ ដុល្លារឯណោះ ។
ក្រៅពីទីផ្សារអន្តរជាតិទីផ្សារជួញដូរមាសនៅកម្ពុជាក៏ចាប់ផ្តើមមានការប្រែប្រួលខ្លះៗហើយ នៅពេលនេះដោយកាលពីថ្ងៃទី១៤ មីនា ឆ្នាំ២០២៣ មាសគីឡូ លក់ចេញ២២៧ដុល្លារ ផ្លាទីនទឹក៧៥ តម្លៃ ១៧០ដុល្លារ ហើយ ផ្លាទីន ទឹក៧០ តម្លៃ១៥៩ដុល្លារ នៅក្នុងមួយជី ដល់ទៅថ្ងៃទី១៥ ខែមីនា ឆ្នាំ២០២៣វិញ តម្លៃទិញចូលមាសគីឡូឡើងដល់២៣១ដុល្លារ ប្លាទីនទឹក៧៥ ឡើងដល់១៧២ដុល្លារ ប្លាទីនទឹក៧០ ឡើងដល់១៦១ ដុល្លារនៅក្នុងមួយជី។
ប្រភពដដែលបានបន្តថា សម្រាប់តម្លៃទិញចូលវិញនៅក្នុងទី១៤ ខែ មីនា ឆ្នាំ២០២៣ មាសគីឡូ ថ្លៃ ២១៧ ដុល្លារ ប្លាទីនទឹក៧៥ ថ្លៃ១៦០ ដុល្លារ ប្លាទីនទឹក៧០ ថ្លៃ១៤៩ ដុល្លារ ហើយនៅថ្ងៃទី១៥ ខែ មីនា មាសគីឡូឡើងដល់ ២២១ដុល្លារ ប្លាទីនទឹក៧៥ ថ្លៃ១៦២ ដុល្លារ និង ប្លាទិនទឹក៧០ ថ្លៃ១៥១ ដុល្លារនៅក្នុងមួយជី ។
ប្រភពដដែលបានបន្តថា ប្រសិនបើស្ថានការណ៍ហិរញ្ញវត្ថុនៅអាមេរិកកាន់តែធ្ងន់ធ្ងរ ហើយធនាគារផ្សេងៗទៀតអាចនឹងបន្តដួលរលំនោះ តម្លៃមាសនេះនឹងបន្តឡើងយ៉ាងហោចណាស់ដល់ទៅ ២,៦០ ភាគរយ ឬ៤៨,៦៩ដុល្លារបន្ថែម។
អ្នកវិភាគបានអះអាងថា មាសនឹងកាន់តែមានហាងឆេងខ្ពស់បន្ថែមទៀត ប្រសិនបើអាមេរិកដែលជាប្រទេសមហាអំណាចសេដ្ឋកិច្ចទីមួយនៅលើពិភពលោកមិនអាចដោះស្រាយបញ្ហាហិរញ្ញវត្ថុនៅក្នុងប្រទេសរបស់ខ្លួនបានរឹងមាំទេនោះ ។
មកដល់ពេលនេះនៅអាមេរិកមានធនាគារអាមេរិក៣ ហើយដែលបានដួលរលំ ដោយនៅក្នុងនោះ គឺស៊ីលីខុន វ៉ាឡេ ដែលជាធនាគារដ៏ធំរបស់សហរដ្ឋអាមេរិក មានមូលដ្ឋាននៅកាលីហ្វ័ញ៉ាជាមួយនឹងទ្រព្យសកម្មរហូតដល់ទៅ ២០៩ពាន់លានដុល្លារ និងប្រាក់បញ្ញើដល់ទៅ១៧៥,៤ ពាន់លានដុល្លារ។
ធនាគារអាមេរិកដែលបានដួលរលំផ្សេងទៀត គឺមានធនាគារ ស៊ីណេឈ័ (Signature Bank ) ដែលមានមូលដ្ឋាននៅទីក្រុងញ៉ូងយ៉ក ជាមួយនឹងទ្រព្យសកម្ម ១១០,៤ ពាន់លានដុល្លារ និងប្រាក់បញ្ញើ ៨២,៦ ពាន់លានដុល្លារ ។ ហើយធនាគារមួយទៀតដែលដួលរលំដែរនោះ គឺធនាគារ ស៊ីវ័ហ្គេត ( Silvergate Bank) ដែលជាធនាគារឯកទេសមានមូលដ្ឋាននៅកាលីហ្វ័ញ៉ា ដែលផ្តល់សេវាកម្មហិញ្ញវត្ថុ និងជំនួញដែលគេហៅថា cryptocurrency ដែលជាប្រភេទរូបិយប័ណ្ណឌីជីថលមួយប្រភេទ ។
ក្រៅពីធនាគារទាំងបីនេះ ធនាគារអាមេរិកមួយចំនួនទៀតដូចជាធនាគារ ហ្វាយណែនសល រីផាប់ប្លិក (Financial Republic Bank) ដែលមានមូលដ្ឋាននៅទីក្រុងសាន់ហ្វ្រាន់ ស៊ីស្កូ ក៏ ត្រូវបានគេរំពឹងថាអាចនឹងដួលរលំផងដែរ ខណៈដែលភាគហ៊ុនធនាគារនេះបានធ្លាក់ចុះដល់ទៅ ៧០ភាគរយកាលពីម្សិលមិញ ។
ការប្រែប្រួលតម្លៃមាសនៅក្នុងទីផ្សារពិភពលោកនឹងអាចជះឥទ្ធិពលផងដែរដល់តម្លៃមាសក្នុងទីផ្សារនៅកម្ពុជា ។ ដូច្នេះ អ្នកមានមាសអាចចំណេញពីស្ថានភាពនៃភាពមិនប្រាកដប្រជារបស់ធនារគារនៅអាមេរិក៕ដោយៈ ហេង ចេស្តារ
ចែករំលែកព័តមាននេះ