រាជធានីភ្នំពេញ ៖ នគរបាលព្រហ្មទណ្ឌរាជធានីភ្នំពេញ កាលពីថ្ងៃទី១៤ មីនា ឆ្នាំ២០២៣ បានធ្វើការឃាត់ខ្លួនបុរសម្នាក់ (ដែលអ្នកខ្លះស្គាល់គាត់ថា ជាមន្ត្រីយោធាពាក់ផ្កាយ៣ ត្រូវចូលនិវត្ត)…
រាជធានីភ្នំពេញ ៖ នគរបាលព្រហ្មទណ្ឌរាជធានីភ្នំពេញ កាលពីថ្ងៃទី១៤ មីនា ឆ្នាំ២០២៣ បានធ្វើការឃាត់ខ្លួនបុរសម្នាក់ (ដែលអ្នកខ្លះស្គាល់គាត់ថា ជាមន្ត្រីយោធាពាក់ផ្កាយ៣ ត្រូវចូលនិវត្ត) បញ្ជូនទៅតុលាការពាក់ពន្ធពីបទ.មិនបំពេញកាតព្វកិច្ច ចំពោះឧបករណ៍អាចជួញដូរបាន ពោលគឺចេញសែកស្អុយលើទឹកប្រាក់ប្រមាណ២០ម៉ឺនដុល្លារអាមេរិក ។
បុរសរូបនោះឈ្មោះ វង្ស វន ភេទប្រុស អាយុ៦៦ ឆ្នាំ មានទីលំនៅផ្ទះលេខ០៨ ផ្លូវ Maple ១ បុរីសាន់វ៉េទួលគោក សង្កាត់បឹងកក់ ២ ខណ្ឌទួលគោក រាជធានីភ្នំពេញ។ សំណុំរឿងជនសង្ស័យខាងលើ បានស្ថិតនៅលោក សាយ ណូរ៉ា ព្រះរាជអាជ្ញារង តំណាងអយ្យការអមសាលាដំបូងរាជធានីភ្នំពេញ បើកការស៊ើបសួរ ។ ការស៊ើបសួរនៅតំណាក់កាលស្ថាប័នអយ្យការ រហូតល្ងាចថ្ងៃដដែលទើបត្រូវបានបញ្ចប់ ហើយដោយផុតម៉ោងរដ្ឋបាលរបស់មន្ត្រីរាជការ ជនសង្ស័យត្រូវបានផ្ញើទៅសមត្ថកិច្ចវិញ ដែលមិនទាន់សម្រេចចោទប្រកាន់ ឬមិនចោទប្រកាន់ជាផ្លូវនៅឡើយទេ ។
ជនសង្ស័យឈ្មោះ វង្ស វន ត្រូវបានកម្លាំងសមត្ថកិច្ចឃាត់ខ្លួន កាលពីល្ងាចថ្ងៃទី១៣ ខែមិនា ឆ្នាំ២០២៣ នៅប្លុកបឹងកក់ ខណ្ឌទួលគោក ដោយអនុវត្តតាមដីកាបញ្ជាឲ្យចូលខ្លួនពីស្ថាប័នអយ្យការ ខណៈរូបលោកកំពង់ធ្វើដំណើរតាមរថយន្តទំនើប១គ្រឿង ។ ដើមចមនៃការឃាត់ខ្លួនបុរសខាងលើនេះ ត្រូវបានប្រភពព័ត៌មាននៅសាលាដំបូងរាជធានីភ្នំពេញបង្ហើបឲ្យដឹងថា មានក្រុមហ៊ុនប្ដូរប្រាក់មួយ បានពឹងពាក់មេធាវីការពារក្តីតំណាងដោយអាណត្តិប្តឹងឈ្មោះ វង្ស វន ទៅសមត្ថកិច្ចនគរបាលព្រហ្មទណ្ឌកម្រិតស្រាលរាជធានីភ្នំពេញ ដោយចោទប្រកាន់ពីបទ.ចេញមូលប្បទានបត្រគ្មានសាច់ប្រាក់ «សែកស្អុយ» ។
តាមពាក្យបណ្តឹងបានបញ្ជាក់ថា កាលពីអំឡុងខែ មេសា ដល់ខែកក្ដដា ឆ្នាំ២០២២ ឈ្មោះ វង្ស វន បានផ្ដិតមេដៃជាបន្តបន្ទាប់ចំនួន៣លើក ដើម្បីខ្ចីប្រាក់ពីក្រុមហ៊ុនមួយប្រមាណ២០ម៉ឺនដុល្លារអាមេរិក ដែលប្រាក់ដើមទាំងអស់នោះ នឹងត្រូវទូទាត់មកវិញ តាមរយៈមូលប្បទានប័ត្រ៣សន្លឹក ។ ប៉ុន្តែដល់ថ្ងៃកំណត់ត្រូវបានក្រុមហ៊ុននោះ យកសែកទៅបើកនៅធនាគារ ស្រាប់តែខាងធនាគារឆ្លើយតបថា មូលប្បទានប័ត្រទាំង៣សន្លឹកនេះគ្មានប្រាក់ «ពោលគឺសែកស្អុយ»ទាំងអស់ ។
ក្រោយពីដឹងថា មូលប្បទានបត្រចេញដោយបុរសនោះគ្មានសាច់ប្រាក់ហើយ ភាគីដើមបណ្តឹងបានទាក់ទងទៅកូនបំណុល ដើម្បីជួបដោះស្រាយក្រៅប្រពន្ធតុលាការ តែលទ្ធផលត្រូវបានភាគីចុងចោទគេចវេស មិនអាចរកការចចារគ្នាបាន ទើបភាគីដើមបណ្តឹងសម្រេចចិត្ត ដាក់ពាក្យបណ្តឹងទៅសមត្ថកិច្ចឲ្យជួយចាត់ ការតាមផ្លូវច្បាប់ ។ ដូច្នោះសំណុំរឿងនៅបន្តបើកការស៊ើបសួរនៅថ្ងៃទី១៥ មីនា នេះទៀត ។
ព័ត៌មានបន្ថែមនឹងមានផ្សាយជូនបន្ត ។
ចែករំលែកព័តមាននេះ