រាជធានីភ្នំពេញ ៖ ជនសង្ស័យ ជាក្មេងជំទង់ ១ក្រុម មានគ្នា៥នាក់ បាននាំគ្នាទៅលួចមាន់គក នៅផ្ទះអ្នកភូមិមួយកន្លែង ហើយត្រូវបានម្ចាស់មាន់ឃើញទាន់ ក៏បានជិះម៉ូតូដេញតាម…
រាជធានីភ្នំពេញ ៖ ជនសង្ស័យ ជាក្មេងជំទង់ ១ក្រុម មានគ្នា៥នាក់ បាននាំគ្នាទៅលួចមាន់គក នៅផ្ទះអ្នកភូមិមួយកន្លែង ហើយត្រូវបានម្ចាស់មាន់ឃើញទាន់ ក៏បានជិះម៉ូតូដេញតាម ខណៈនោះ ជនសង្ស័យភ័យពេក បានជិះម៉ូតូរត់យ៉ាងលឿន លុះពេលទៅដល់ត្រង់ចំណុចផ្លូវកោង បានជ្រុលធ្លាក់ផ្លូវ បន្ទាប់មកក៏ខំកាច់ចង្កូតឡើងមកលើផ្លូវវិញ តែជាអកុសលបុកចិញ្ចើមផ្លូវ បណ្ដាលឲ្យដួលបោកផ្ទប់ថ្នល់ស្លាប់១នាក់ របួសធ្ងន់១នាក់ និងរបួសស្រាល១នាក់ ។
ឧប្បត្តិហេតុនោះ បានកើតឡើងកាលពីវេលាម៉ោង៣និង៤០នាទីរសៀលថ្ងៃទី០៩ ខែមករា ឆ្នាំ២០២៥ នៅតាមផ្លូវបេតុងភូមិគោកខ្សាច់ សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ។
ក្មេងប្រុសជំទង់ ដែលស្លាប់ឈ្មោះ រតនៈ លីនម៉េង អាយុ១៧ឆ្នាំ មានទីលំនៅភូមិកប់ភ្លុក សង្កាត់ភ្លើងឆេះរទេះ ខណ្ឌកំបូល។ អ្នករបួសធ្ងន់ឈ្មោះ ហេង សុខហៃ អាយុ១៧ឆ្នាំ មានទីលំនៅភូមិព្រៃកី សង្កាត់ភ្លើងឆេះរទេះ ខណ្ឌកំបូល។ រីឯអ្នករបួសស្រាលឈ្មោះ នៅ ដេវីត អាយុ១៧ឆ្នាំ មានទីលំនៅសង្កាត់ចោមចៅ ខណ្ឌពោធិ៍សែនជ័យ ដោយឡែកបក្ខពួក២នាក់ទៀត មិនស្គាល់អត្តសញ្ញាណ ។
ក្មេងប្រុសជំទង់ឈ្មោះ នៅ ដេវីត បាននិយាយថា នៅមុនពេលកើតហេតុ ពួកខ្លួនមានគ្នា៥នាក់ ជិះម៉ូតូ២គ្រឿង ទៅភូមិភ្លើងឆេះរទេះលិច សង្កាត់ភ្លើងឆេះរទេះ ខណ្ឌកំបូល ហើយមុនដំបូង ខ្លួននិងឈ្មោះ ហេង សុខហៃ ដែលរងរបួសធ្ងន់ ជិះម៉ូតូម៉ាកហុងដាឌ្រីមសេ១២៥ ពណ៍ខ្មៅ ពាក់ស្លាកលេខភ្នំពេញ1KZ-9250 ។ ចំណែកឈ្មោះ រតនៈ លីនម៉េង ដែលស្លាប់ ជិះម៉ូតូ១គ្រឿងទៀត ម៉ាកហុងដាស្កូបពី ជាមួយបក្ខពួក២នាក់ទៀត លុះពេលទៅដល់បានចូលលួចមាន់គកនៅក្នុងផ្ឬះមួយកន្លែង ដោយឈ្មោះ រតនៈ លីនម៉េង ដែលជិះពីក្រោយគេ គឺជាអ្នកចុះទៅចាប់មាន់ ។
ក្មេងប្រុសរូបនោះ បាននិយាយបន្តថា ប៉ុន្តែខណៈនោះ ត្រូវបានម្ចាស់មាន់ឃើញទាន់ ឈ្មោះ រតនៈ លីនម៉េង(អ្នកស្លាប់) ក៏រត់ឡើងជិះម៉ូតូហុងដាឌ្រីម ជាមួយខ្លួនវិញ និងនាំគ្នាជិះគេចខ្លួន ដោយពេលនោះឈ្មោះ ហេង សុខហៃ ជាអ្នកបើកម៉ូតូ ចំណែកខ្លួនជិះកណ្ដាល និងឈ្មោះរតនៈ លីនម៉េង ជិះខាងក្រោយ។ ដោយឡែកម្ចាស់មាន់ ក៏បានជិះម៉ូតូដេញតាមពីក្រោយដែរ លុះពេលទៅដល់ត្រង់ចំណុចផ្លូវកោង បានជ្រុលធ្លាក់ផ្លូវ បន្ទាប់មកបានកាច់ចង្កូតឡើងមកលើផ្លូវវិញ តែជាអកុសលបុកចិញ្ចើមផ្លូវបេតុង បណ្ដាលឲ្យដួលបោកផ្ទប់ថ្នល់ ស្លាប់ និងរបួសធ្ងន់ស្រាលបែបនេះតែម្ដង ហើយបក្ខពួក២នាក់ទៀត គេចខ្លួនបាត់ ។
បើតាមប្រជាពលរដ្ឋ ដែលទៅចោមរោមមើលនៅកន្លែងកើតហេតុនោះ បាននិយាយថា ប៉ុន្មានថ្ងៃកន្លងមកនេះ អ្នកភូមិបានបាត់សត្វមាន់ ទា និងក្ងាន ជាបន្តបន្ទាប់ ដែលពួកគាត់បានដាក់ការសង្ស័យថា ក្រុមក្មេងទាំងនេះ ជាអ្នកលួច។ ដោយឡែកនគរបាលប៉ុស្តិ៍ភ្លើងឆេះរទេះនិងនគរបាលខណ្ឌកំបូល ក៏បានចុះទៅពិនិត្យជាក់ស្ដែង ប៉ុន្តែមិនបានឃាត់ខ្លួនយុវជន ដែលនៅរស់ទេ ដោយសារតែពុំមានភស្តុតាង និងគ្មានអ្នកប្ដឹងពីការបាត់បង់មាន់ ទា ក្ងានដើម្បីដាក់បន្ទុកលើពួកនោះ។ បន្ទាប់មក នគរបាលបានប្រគល់សពជូនក្រុមគ្រួសារសាច់ញាតិយកទៅធ្វើបុណ្យតាមប្រពៃណី ចំណែកអ្នករបួសធ្ងន់ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យព្រះកុសុមៈ ហើយនគរបាលបាននាំយកម៉ូតូទៅរក្សាទុកនៅអធិការដ្ឋានខណ្ឌកំបូល ជាបណ្ដោះអាសន្នសិន ៕
ចែករំលែកព័តមាននេះ