ធនាគារ Silicon Valley (SVB) ត្រូវបានបង្ខំឱ្យបិទទ្វារកាលពីថ្ងៃទី១០ ខែមីនា ដែលបានក្លាយជាធនាគារដ៏ធំបំផុតដែលត្រូវបិទចាប់តាំងពីវិបត្តិហិរញ្ញវត្ថុឆ្នាំ២០០៨។

Silicon Valley ដែលជាធនាគារធំជាងគេទី១៦ របស់សហរដ្ឋអាមេរិក បានបរាជ័យបន្ទាប់ពីអ្នកដាក់ប្រាក់បញ្ញើ ដែលភាគច្រើនជាបុគ្គលិកបច្ចេកវិទ្យា និងក្រុមហ៊ុនដែលគាំទ្រដោយការបណ្តាក់ទុន  បាននាំគ្នាប្រញាប់ដកប្រាក់របស់ពួកគេក្នុងសប្តាហ៍នេះ ដោយសារចំពេលមានការព្រួយបារម្ភអំពីសុខភាពរបស់ធនាគារ។ ធនាគារមិនអាចទប់ទល់នឹងការដកប្រាក់ដ៏ច្រើនរបស់អតិថិជនរបស់ខ្លួនទៀតទេ ទើបបណ្តាលឱ្យអស់សាច់ប្រាក់បង្វិល។

ដូច្នេះអាជ្ញាធរអាមេរិក បានកាន់កាប់ធនាគារនេះជាផ្លូវការ ហើយបានប្រគល់វាទៅឱ្យ ទីភ្នាក់​ងារ U.S. Federal Deposit Insurance Corp (FDIC)។

SVB គឺជាធនាគារពាណិជ្ជកម្មសាធារណៈដែលមានទីស្នាក់ការកណ្តាលនៅ Santa Clara រដ្ឋ California ដែលជាបេះដូងនៃ Silicon Valley ។ SVB ត្រូវបានគេចាត់ទុកថាជាអ្នកផ្តល់ប្រាក់កម្ចីឈានមុខគេសម្រាប់ការចាប់ផ្តើមអាជីវកម្មបច្ចេកវិទ្យា។ នៅចុងខែធ្នូ ឆ្នាំ២០២២ SVB មានទ្រព្យសកម្មសរុបចំនួន ១០៩ពាន់លានដុល្លារ ដែលធ្វើឱ្យវាក្លាយជាធនាគារដែលមានការធានារ៉ាប់រងសហព័ន្ធធំជាងគេទី២ ដែលបានបិទក្នុងប្រវត្តិសាស្ត្រសហរដ្ឋអាមេរិក បន្ទាប់ពីការបិទធនាគារ Washington Mutual Bank ដោយសារតែវិបត្តិហិរញ្ញវត្ថុឆ្នាំ ២០០៨៕